افغانستان ته د چین-پاکستان اقتصادي دهلیز سره د هند مخالفت
۱۴۰۴ مرداد ۳, جمعه
د هندي رسنیو د راپورونو له مخې، د دغه هېواد حکومت د چین-پاکستان اقتصادي دهلیز د پراخولو له پلان سره مخالفت کړی او په دې پروژه کې یې د دریمې ډلې شاملول «د نه منلو وړ» ګڼلي دي.
د هند ټایمز ورځپاڼې راپور ورکړی دی چې د بهرنیو چارو وزیر کیرتي وردان سینګ، پارلمان ته په یوه لیکلي ځواب کې ویلي دي چې هند په دوامداره توګه د چین-پاکستان اقتصادي دهلیز د شاملولو په اړه له ښکیلو اړخونو سره مخالفت کړی او له هغوی یې غوښتي چې خپل فعالیتونه ودروي.
اړوند:هند په افغانستان کې د پراختيايي پروژو د عملي کولي په اړه غور کوي
په دې پروژه کې د افغانستان د ګډون پلان
په دې پروژه کې د افغانستان د شاملولو پلان په اړه، هغه وویل: «د دریمو هیوادونو هر ډول وړاندیز شوی ګډون یا د چین-پاکستان اقتصادي دهلیز پروژې دریمې هیوادونو ته غځول د منلو وړ نه دی.»
د چین-پاکستان اقتصادي دهلیز د چین نوښت دی. په دې نوښت کې، بیجینګ له پاکستان سره د ۶۰ ميلیاردو ډالرو په ارزښت د زیربنایي پروژو ژمنه کړې، چې ډېره برخه به یې د پورونو په بڼه چمتو شي.