هند او پاکستان همدارنګه د خپلو اتومي زېرمو او هغو تسحیلاتو لیستونه هم تبادله کړي چې د یوه توافق له مخې له درو لسیزو راهیسې د اجرا په حال کې دي. دغه څرګندونې د دواړو هیوادونو په رسمي اعلاميو کي ‌ذکر شوي دي.

د اسوشتيد پریس په حواله، پاکستان د شنبې په ورځ، په اسلام آباد کې هندي لوړپوړو دیپلوماتانو سره، د ۶۲۸ هندي بندیانو نوملړ شریک کړی چې په دې ډله کې ۵۷۷ تنه يې کب نيونکي دي. پر دوی باندې تور دی چې د پاکستان حریم په اوبو کې يې په غیرقانوني توګه کبان نيول. په دغه نوملړ کې ۵۱ نور کسان هم شامل دي.

هندوستان هم پاکستان سره یو ورته نوملړ شریک کړی، داسې کسان کوم چې اوس په هندوستان کې بندیان دی. په دغه لست کې ۲۸۲ تنه بندیان او ۷۳ کب نیونکي دي.

په تیره جنوري کې هندوستان پاکستان ته د ۲۶۳ پاکستاني بندیانو او ۷۷ کب نیونکو د توقیف نوملړ سپارلی وو. پاکستان هم په ۲۰۲۱م کال کې د ۲۷۰ تنو هندي کب نیونکو او ۴۹ تنه نورو بندیانو د توقیف لیست هندوستان ته سپارلی وو.

هند او پاکستان چې دواړه د اتومي ځواک خاوندان دي، په ۱۹۴۷ کال له بریتانيا څخه د خپلواکۍ اخیستو راهیسې ښه روابط نه لري.