په روان دوبي کي په لیتون کي تودوخه تقریباً ۵۰ درجې اندازه سوې. دا د کاناډا په لویدیځ کي پرته دې نسبتاً سړې سیمي له پاره سخته ګرمي. له همدې امله دا کلی چي ۲۵۰ تنه نفوس لري په بشپړ توګه وسوځیدی. په شمالي امریکا کي هم اقلیم مخ په تودیدو دی. دا ځکه چي د مځکي د ګرمۍ له امله بادونه کرار سوي او دغه ډول ګرمي څو اونۍ دوام کوي.

د فنلند په لاپلند کي له ۱۹۱۴ م کال راهیسي هوا دومره نه وه ګرمه سوې، لکه د سږکال په جولای کي چي وه. د فنلنډ په شمال کي د هوا تودوخه ۳۳،۶ ګراد اندازه سوې او همدارنګه ددغه سکندیناوي هیواد په ځینو نورو سیمو کي هم تر پخوا ۱۰ تر ۱۵ درجې پوري هوا ګرمه سوې ده. هواپیژندونکي د اروپا په شمال کي د هوا دومره ډیر ګرمیدل په شمالي امریکا کي د ګرمۍ سره په تړاو کي ویني.

همدارنګه په هند کي هم سږکال ډیره ګرمي ده. په پلازمینه نوي ډيلي کي د جولای په سر کي د هوا درجه ۴۳،۱ ته ورسیده چي له نهو کلنو څخه یې ساری نه درلود. په هند کي مون سون يا موسمي بارانونه هم يو اوونۍ وورسته پېل شول. په دغه هیواد کي له ۲۰۱۰ کال راهیسي لږ تر لږه ۶ زره ۵۰۰ انسانان د سختي ګرمۍ له امله مړه سوي.

همدارنګه سایبریا هم په ۲۰۲۱ کال کي سختي ګرمۍ اغیزمنه کړه. هلته د می په میاشت کي لا د هوا درجه له ۳۰ څخه پورته وه. په دې ډول په سایبریا کي د ځینو اروپایی سیمو په پرتله ډیره ګرمي وه. سخته ګرمي او وچکالي ددې سبب سوه چي د روسیې په شمال کي سختي اورلګیدني رامنځته سي. سخته ګرمي او وچکالي د پرمافروست د ویلي کيدو باعث کیږي او دا بيا هوا ته میتان ګاز د افرازيدو باعث ګرځي.

د جنوبي کُرکې د نوي زېلاند په هاستینګ کي چيرې چې اوس په اصل کي ژمی دی، د هوا درجه ۲۲ سانتي ګراد اندازه سوې. په دې ډول په دغه هېواد کي د ۲۰۲۱ کال د جون میاشت له ۱۱۰ کلونو راهیسي تو ټولو توده میاشت وه. په دغه هیواد کي په اوسط ډول د هوا حرارت دوې درجې پورته سوی. تود ژمی زراعت ته تاوان رسوي او د سکي وهلو په ځایونو کي واوره کمیږي.

د ۵۱،۴ درجو تودوخه آن د مکسيکو له پاره چېرې چې ډېره ګرمي، ډيره زياته ده. دا په جون مياشت کې اندازه شوې تر ټولو ډېره تودوخه ده. اوسمهال دغه هېواد له داسې سختې وچکالۍ سره لاس او ګريوان دی چې له ديرشو کلونو راهیسې ساري نه لري. په تېره بيا د دغه هېواد باجا کليفورنيا سيمه، چېرې کولورادو سيند قسماً وچ شوی دی، سخته اغیزمنه شوې. همدارنګه په مکسیکو سیتي هم د اوبو سطحه مخ په کمیدو ده.

همدارنګه د شمالي افریقا په عربي نیمه ټاپو کي هم سږکال ډیره ګرمي وه. په صحرا کي د جون په میاشت کي د تودوخي درجه له ۵۰ سانتې ګرادو څخه پورته وه. د هوا پیژندونکو په حواله، د لیبیا په لویدیځ کي د جون په پای کي هوا تر پخوا لس درجې ګرمه اندازه سوې. په پلازمینه طرابلس کې بیا ۴۳ درجې وه.