هند؛ د یوې ټاکنیزې غونډې پر مهال د لسګونو کسانو وژل کېدل
۱۴۰۴ مهر ۶, یکشنبه
پارلماني استازو ویلي، چې د هندوستان په سویل کې د یوې ټاکنیزې غونډې پر مهال د ګڼې، ګوڼې له امله ۳۶ کسان وژل شوي او له ۵۰ ډېر ژوبل دي.
د هندي تامیل سینماستوری ویجی په وروستیو کلونو کې د سیاست ډګر ته وتلی. نوموړی د تامیل نادو ایالت په کارور ښار کې د «تامیلګا او تري کازهاګام» ګوند له پاره د یوې ټاکنیزې غونډې پر جوړولو بوخت و. ځايي رسنیو خبر ورکړی، چې وژل شویو کې شپږ ماشومان هم شامل دي.
د رپوټونو له مخې، ګڼه ګوڼه هغه وخت ډېره شوه، چې شاوخوا ۳۰ زره کسیزې ناستې د سینماستوري، ویجی وینا ته شېبې شمېرلې. د هندي خبري رسنیو د رپوټونو پر اساس، چې د دغې ستوري وینا له ټاکل شوي وخت څو ساعته وروسته شوه او له همدې امله د خلکو ناکراري زیاته شوې وه.
اړوند: هند: د مذهبي مراسمو په ګڼه ګوڼه کې تر ۱۰۰ ډېر کسان مړه شوي
دا رپوټونه هم شته، چې د غونډې ځینو ګډونوالو هڅه کړې، د دغې سیاستوال د سپرلۍ پر بس برید وکړي. عیني شاهدانو ویلي، چې ډېر شمېر کسان په ګڼه ګوڼه کې بې هوښه شوي وو.
قرباني کورنیو ته د مودي او ویجی تسلیت
د هند لومړي وزیر نریندرا مودي په یو بیان کې ویلي: « زه له هغو کورنیو سره خواخوږي څرګندوم، چې نیږدې خپلوان یې له لاسه ورکړي. په دې سخت وخت کې هغوی ته د صبر هیله کوم.»
هندوستان ټایمز ورځپاڼې د ویجی له قوله لیکلي: « زړه مې مات دی... زه د خپلو ګرانو خویندو او ورونو هغو کورنیو ته ژوره خواخوږي او تسلیت وړاندې کوم، چې په کارور کې یې خپل عزیزان بایللي دي.»
اړوند: هند: د يوه مندر په دروازه کې ټيل ماټيل د ۶ کسانو ژوند اخیستی
د ټامیل نادو ایالت لومړي وزیر ام. کی. سټالین د یوه متقاعد قاضي په مشرۍ د یوه کمیسیون د جوړېدو حکم ورکړی، څو دا «دردوونکې پېښه» وڅېړي. هغه دغه راز اعلان وکړ، چې قرباني کورنۍ به یو میلیون هندي روپۍ غرامت هم تر لاسه کړي.
په هند کې د خلکو دا وړ هجوم اوږده مخینه لري. په جنورۍ میاشت کې هم د «ماهاکومبه» مېله کې یوه مقدس سیند ته د ځان رسولو پر مهال ګڼې، ګوڼې کې ۳۰ کسان تر پښو لاندې شوي وو. دغه راز، د تېر ۲۰۲۴ کال جولای کې د هند په اوتارپردېش ایالت کې د یوې مذهبي راټولېدنې پر مهال هم ۱۲۱ کسان وژل شوي وو.