د رويټرز په حواله، د هند حکومت لوړپوړي چارواکي، موکيش پرمر، وويل چې د مړېنې دغه پېښې د ګجرات ایالت په احمد آباد او بوټاډ ولسوالیو کې رامنځ ته شوي، چيرته چې د شرابو تولید، خرڅلاو او څښاک په کې ممنوع دي.

په سملاسي توګه روښانه شوې نه ده چې په دغو شرابو کې کومه کيمياوي ماده ګډه شوې چې د مصرف کونکو د مړېنې سبب ګرځيدلې ده.

د پریس ترست آف اينډيا په نوم هندي خبري آژانس ويلي دي چې پولیسو د پیښې په تړاو ګڼ شمیر مشکوک کسان نيولي چې د شرابو په خرڅلاو کې ښکيل دي. ويل شوی چې نیول شوي کسان هغه افراد دي چې ممنوعه توکي پلوري.

په هندوستان کې د غیرقانوني شرابو د څښکلو له کبله مړينې معمول دي او دغه ډول شراب په کې ارزانه دی. د دا ډول شرابو تولیدونکي ډیری وخت په هغو کې د قوت د ډيرولو په خاطر زیان اړوونکي کیمياوي مواد وراضافه کيږي.

د ناقانونه مشروباتو تولید او خرڅلاو د ټول هندوستان په سطحه يوه لويه عایداتي سرچینه ګڼل کيږي کوم چې غیرمجاز پلورنکي ېې د خرڅلاو له بابته مالیه نه ورکوي. د دغو شرابو کاروباريان په پریمانه کچه دغه ډول شراب په بې وزلو خلکو په ارزانه بیه پلوري. په ۲۰۲۰ کال کې د هندوستان په شمالي ایالت پنجاب کې لږ تر لږه ۱۲۰ کسان د ککړو شرابو د څښکلو له کبله مړه شوي ول.