يونان ـ په «خطرناکو موادو»بار الوتکه لوېدلې ده
۱۴۰۱ تیر ۲۶, یکشنبه![Griechenland | Flugzeugabsturz in Kavala](https://static.dw.com/image/62501009_800.webp)
دغه الوتکه چې بنګله دیش ته روانه وه اته کارکوونکي یې وژل شوي دي. ياده اوکرایني «انتونوف» ډوله الوتکه چې ۵۱ کاله مخکې جوړه شوې وه د شنبې په شپه د یونان په شمالي ښار کاوالا کې ولوېده.
په ورته وخت کې د اوکراین هوايي شرکت «میریډیان» تایید کړې چې په الوتکه کې له اتو تنو سپرو کسانو یو هم ژوندی نه دی پاتې
د زهرجن لوګي له امله د پېښې ځای ته څېرمه له اوسېدونکو غوښتل شوي چې د خپلو کورونو کړکۍ دې بندې وساتي او کولرونه فعال نه کړي .
دا لا څرګنده نه ده چې دا زهرجن مواد څه دي، خو په الوتکه کې د مهماتو او وسلو خبر هم ورکړل شوی، ځکه چې له غورځېدو وروسته د څو چاودنو غږونه اورېدل شوي دي.
په الوتکه کې ۱۱.۵ ټنه مهمات بار وو
د صربیا د دفاع وزیر نیبوجا سټیفانوویچ په بلګراد کې خبریالانو ته ویلي چې الوتکې هغه هاوانونه لیږدول چې په سربیا کې تولیدیږي.
نوموړي د رسنیو هغه ادعاوې رد کړې، چې ګواکې «انتونوف» الوتکې اوکراین ته د صربستان وسلې لېږدولې.
د دغه صربیايي چارواکي په وینا، دغې الوتکې بنګله دېش ته د بار وړونکو توکو د لېږدولو ټول اړین جوازونه درلودل.
د صربیا د دفاع وزیر زیاته کړه چې دغه تجهیزات د شنبې په شپه د صربیا د نیس ښار په هوايي ډګر کې بار شوي و او بیا الوتکې په حرکت پیل وکړ.
ټاکل شوې وه دغه الوتکه په اردن او سعودي عربستان کې د لنډمهال لپاره دمه وکړي.
نيپال: د لوېدلي مسافر وړونکي الوتکي ټوټې وموندل سوې
پیلوټ د یونان په هوايي حریم کې د الوتکې د انجن په برخه کې د ستونزې خبر ورکړی و او د کاوالا ښار په هوايي ډګر کې یې د بیړنۍ ناستې غوښتنه کړې وه، خو الوتکې له اتو مسافرو سره ونه شوای کړای په ځمکه کیني او له هوايي ډګر څخه څلوېښت کیلومتره لیرې نسکوره شوه.
د پیلوچوري په کلي کې د پېښې عیني شاهدانو ویلي، چې دا د لوی خوشبختۍ خبره وه، چې الوتکه په استوګنیزه سیمه کې ونه لویده او له کورنو څخه تیره شوه.
الوتکې د غورځیدو پر مهال د برېښنا ستنې ویجاړې کړي او نږدې کلي هم په موقتي ډول له برېښنا بې برخې شول.