يوه روسي زده کوونکي پر ټولگيوالو تر ډزو وروسته خپل ځان وژلی
۱۳۹۸ آبان ۲۳, پنجشنبه![Russland Ein Toter und drei Verletzte bei Schusswaffenangriff an Schule in Blagoweschtschensk](https://static.dw.com/image/51235429_800.webp)
د آلمان خبري آژانس د روسي چارواکو په حواله خبر ورکړې چې دغه پيښه د پنجشنبې په ورځ د چين سرحد ته نژدې په يوه کالج کې رامنځ ته شوې ده. د روسيې يوې معتبرې تحقيقاتي ادارې له خوا په خپره شوې اعلاميه کې د پيښې عامل يو ۱۹ کلن ځوان ښوول شوی. زياته شوې چې هغه د روسيې په بلاګووشچنسک ښار کې زده کړې کولې. دغه ځوان د کالج په څلورم کال کې وو او د يوه غلي او آرام زده کوونکي په توګه معرفي شوی دی.
اعلاميه کې زياته شوې چې هغه د يوه ښکاري ټوپک څخه په استفادې لومړی پر خپلو څلورو ټولگيوالو ډزې کړي او بيا يې خپل ځان ويشتلی دی. د پيښې درې قربانيان روغتون ته رسول شوي او تر عاجلو درملنو لاندې نيول شوي دي.
دغې ادارې يوه ويډيو هم خپره کړې چې په هغې کې چارواکي په هغه ټولګي کې چې ډزې پکښې شوي، د څيړنو پر مهال ښيي.
د روسيې دولتي رسنيو د پيښې د عامل په هکله ويلي چې هغه د خپل ټوپک خوله تر هغه وروسته خپل ځان ته واړوله چې چارواکي د پيښې ځای ته ورسېدل.
د روسيې خبري آژانس د هغه په اړه د يوه زده کوونکي له قوله ليکلي: « هغه یو غلی او آرام هلک وو. هغه ته چا څه نه وو ویلي، حتی يو کس هم.» سرچينې د زده کوونکي له قوله زياته کړې: «هغه کالج ته له يو ټوپک سره راغی او له رسيدو سره سم يې ډزې پیل کړې.»
د روسيې په ښوونځيو کې د وسلو د بريدونو دغه ډول پيښې په ډير ندرت سره رامنځ ته کيږي. په روسیه کې د خلکو له خوا د وسلو پر ليږد ډيره سخته پابندي موجوده ده. دولتي رسنيو ويلی دي چې دغه زده کوونکي خپل ټوپک په قانوني توګه په خپل نوم ثبت کړی وو.
د رپوټونو په حواله تير کال هم روسيې پورې اړوندې کريميا په مربوطاتو کې پر زده کوونکو باندې يوه خونړۍ حمله ترسره شوې وه. دغه حمله په ۱۹۹۹م کال کې د امريکا متحده ایالاتو د کولومباين ليسې عام وژنې ته ورته حمله ښوول شوې وه.