د نتاشا د مهاجرت سفر ډير پيچلی او لالهاند دی. هغه په ۲۰۱۵م کال کې له پاکستانه وتښتيده. نتاشا وايي چې په پاکستان کې په پرله پسې توګه د تبعيض او تاوتريخوالو سره مخ وه. هغه زياتوي د دغو تاوتريخوالو له امله يې بلاخره په ۲۰۱۵م کال له پاکستانه د تښتې پريکړه وکړه.
هغې په لومړي سر کې له پاکستان څخه د یوه نارينه په توګه خپل د مهاجرت سفر پیل او ترکيې ته ورسيده. نتاشا دويچه ويله ته وويل: «ما په ترکيه کې کار کاوه. خو کله به چې بهر وتلم خلکو به په جسمي او لفظي توګه زورولم. يوه ورځ هغوی حتی زما د پيژندګلوۍ اسناد هم راڅخه واخيستل. تر هغې وروسته مې يونان ته د سفر پريکړه وکړه.»
نتاشا په لومړي ځل د يونان ليسبوس ټاپو ته ورسيده او بيا د يونان په سويل کې د «لاکونيا» په نوم سيمه ته ولاړه او هلته يې په يو فارم کې کار پيل کړ. هغې غوښتل تر څو د کار له لارې يوه اندازه پيسې ټولې او خپل سفر ته ادامه ورکړي. خو کله چې د دغه فارم چيښتن نتاشا ته نور د کاري اجورې له ورکړې څخه ډډه وکړه، نتاشا هغه ځای پريښود او ادوميني ته راغله. دا د يونان او مقدونيې سرحدونو تر منځ پرته هغه سيمه ده، چې لا د مخه په کې په زرونو مهاجر اوسیدل.
د کمپ ژوند او زورونۍ
نتاشا وايي: « هلته (په ادوميني کې) يوه پاکستاني مهاجر راسره تاوتريخوالی وکړ. هلته به زه يوازې هغه وخت له خپل کمپ څخه بهر وتلم چې غوښتل به مې لږ ډوډۍ وخورم.»
ترانس جندره مهاجره: په افغانستان کې هر شیبه د مرګ ګواښ وو
فتوی: له نر ښځیانو سره هم واده کیدای شي
څرنګه چې په ځينو نورو هيوادونو کې ترانس جيندر افرادو ته د «حقارت» په سترګه کتل کيږي او په مختلفونو نومونو زورول کيږي، په پاکستانۍ ټولنه کې هم دغه قشر له ورته ستونزې سره مخ دی.
په ټوله کې ترانس جيندر ته تر ډيره د يو داسې قشر چې د موقتي او نامشروع جنسي موخو له پاره وي، کتل کيږي. همدا ډول د انساني کرامت خاطر يې هم دومره نه کيږي.
نتاشا په ادومينې کې د اوسيدو پر وخت، په پر له پسې توګه له ويرې او تکليف ډګ ژوند تيراوه. په دغه ځای کې تر څو مياشتو اوسيدو وروسته هغې له يوه رضاکار سره معرفي شوه چې هغه وشو کړای نتاشا سره مرسته وکړي. تر هغې وروسته نتاشا ته د خونديتوب احساس په لاس ورغی آن تر دې چې اعتراف يې وکړ چې هغه يو نارينه نه، بلکه يوه ښځه ده. اوس نتاشا په تهيالونسکي کې د تونس هيواد له يوې بلې ترانس جيندر، ګابي، سره ګډ ژوند کوي. په دغه ځای کې د «ايکليپس» (Eclipse) په نوم يوه مرستندويه موسسې له هغې ملاتړ کوي.
د خوښۍ احساس
نتاشا له دويچه ويله سره په مرکه کې وويل چې هغې ځان په حقيقت کې د يو نارينه په څير نه، بلکه د يوې ښځي په توګه احساسوي. هغه وايي له همدې امله يې د پيژندګلوۍ په اسنادو کې د خپل جنسيتي حالت د بدلون چارې پيل کړې. اوس مهال يونان کې داسې يو قانون تصويب شوی دی چې په رڼا کې يې ترانس جيندران کولای شي خپل جنسيتي حالت په قانوني توکه له يو حالت نه بل ته واړوي.
د نتاشا په وينا چې اوس د خوښۍ احساس لري، هغه وايي: «اوس زه د Eclipse ملاتړ لرم او خوښه يم. دا په ځانګړې توګه ترانس جيندر مهاجرو له پاره يو امن ځای دی.»
دا چې پاکستانۍ ترانس جيندر مهاجره نتاشا خپل جنسيت حالت له نارينه نه ښځينه ته اړولی دی پرې خوشحاله ده. دا په واقعيت کې د هغې د ژوند يو تر ټولو مهم دور دی. نتاشا اوس خپل ځان آزاد او خوندي احساسوي. هغې دويچه ويلې سره د مرکې پر مهال وويل: « زه اوس هيڅ ويره نه لرم. بالاخره ما خپل هغه کارت ترلاسه کړ څنګه چې زه په حقيقت کې يم.»
د دويچه وېله له آرشيف څخه يو انځوريز البوم:
د نړۍ په کومو هیوادونو کې د مهاجرت کړکیچ روان دی؟
اوس مهال په نړۍ کې د بې کوره او مهاجرت ته د اړ شوو کسانو شمیر ډیر لوړ دی چې له کبله یې په یو شمیر هیوادونو کې د مهاجرت کړکیچ روان دی.
انځور: picture-alliance/Zuma Press/London News Pictures/P. Hackettد روان میلادي کال د می میاشتې په وروستیو ورځو کې د افریقایي هیواد بروندي د مهاجرو شمیر ۴۲۴۴۷۰ تنو ته رسیده. د دغو مهاجرو کابو ۵۷ سلنه په تنزانیا کې او نورو یې په اوګندا، کانګو او رواندا کې پناه اخیستې. په بروندي کې د اقتصاد خرابوالی، د خوراک څښاک د توکو قلت او ناروغۍ د تیښتې سبب ګرځي. د ملګرو ملتونو عالي کمیسارۍ سږ کال د بروندي مهاجرو له پاره د د ۳۹۱ میلیونه امریکایي ډالرو غوښتنه کړې.
د می میاشتې په په پای کې په افریقايي هیوادونو کې د کانګو جمهوریت د پناه غوښتونکو شمیر ۷۳۵۰۰۰ تنو ته رسیده. د کانګو جمهوریت په بیلا بیلو سیمو کې وسله وال کړکیچونه روان دي او د دغه هیواد د مهاجرینو کړکیچ ډیر پیچلی انګیرل کیږي. له ۲۰۱۷م کال راهیسې د دغه هیواد په میلیونو کسان بې کوره شوي دي او پر دې سربیره د نورو ګاونډیو هیوادونو شا او خوا ۵۰۰ زره خلکو هم په کانګو کې پناه اخیستې ده.
په عراق کې د وسله وال کړکیچه له کبله له ۲۰۱۴م کال راهیسې تر اوسه له درو میلیونو زیات کسان بې کوره شوي دي. د تازه شمیرو له مخې دا مهال ۲.۱ میلیونه عراقیان بې کوره دي او د خپل هیواد دننه په سرپناوو کې ژوند کوي. شا او خوا ۲۶۰ زره عراقیانو بیا په نورو هیوادونو کې د پناه اخیستو له پاره خپل هیواد پریښی دی.
د ۲۰۱۷م کال د اګست میاشتې له ۲۵مې نیټې څخه د روان میلادي کال د می تر وروستیو ورځو پورې په بنګله دیش کې د پناه اخیستونکو روهنګیا مسلمان لږکیو شمیر ۷۱۳ زره کسانو ته رسیدلی دی. روهنګیا د میانمار لږکي دي چې د هیڅ کوم هیواد تابعیت نه لري. ملګرو ملتونو په خپلو بیلا بیلو رپوټونو کې د روهنګیا پر وړاندې د میانمار د پوځ تاوتریخوالی له نسل وژنې سره پرتله کړی دی.
سوریه چې د کورنۍ جګړې سره لاس او ګریوان ده، دا مهال یي ۱۳،۱ میلیون وګړي بیړنیو مرستو ته اړتیا لري. په دغه هیواد کې د بې کوره شوو کسانو شمیر ۶.۶ میلیونه کسانو ته رسیږي. پر دې سربیره له ۲۰۱۱م کال راهیسې چې کورنۍ جګړه پکښې پیل شوه پنځه میلیونه سوریایانو د پناه اخیستو له پاره نورو هیوادونو ته تللي دي.
مرکزي افریقا جمهوریت د نړۍ یو له بې وزلو هیوادونو شمیرل کیږي. اوس مهال په نورو هیوادونو کې د دغه هیواد د پناه غوښتونکو شمیر ۵۸۲ زرو تنو ته رسیږي، په داسې حال کې چې د هیواد دننه د بې ځایه شوو کسانو شمیر یې بیا ۶۸۷۳۹۸ تنه دی. هلته پر بې وزلۍ سربیره د وسله والو ډلو او د خراب امنیتي وضعیت له کبله ځایي اوسیدونکي کډوالۍ ته اړ شوي دي.
اروپا ته په ۲۰۱۸م کال کې د سمندر له لارې د رسیدونکو مهاجرو شمیر ۳۲۶۰۱ تنه دی او د مدیترانې سمندرګې له لارې اروپا ته د رسیدو په هڅه کې ۶۴۹ تنو خپل ژوند له لاسه ورکړی دی. د یو ان اچ سي آر، په وینا په ۲۰۱۷م کال ۱۷۲۳۰۱، په ۲۰۱۶م کال کې ۳۶۲۷۵۳ په ۲۰۱۵م کال کې ۱۰۱۵۰۷۸ مهاجر اروپا ته رسیدلي دي. دغه مهاجر له منځني ختیځ، افریقا، ختیځي اروپا او همداشان له آسیايي هیوادونو راغلي وو.
په یمن کې د حوثي یاغیانو پر ضد د سعودي عربستان په مشرۍ د پوځي ائتلاف له هوایي بریدونو وروسته څه د پاسه ۱۹۲ زرو کسانو په نورو ګاونډیو هیوادونو کې پناه اخیستې ده. په یمن کې چې یو له غریبو هیوادونو څخه شمیرل کیږي پر بې وزلۍ او بې ثباتۍ سربیره وسله وال کړکیچونه د خلکو د تیښتي لامل شوي دي. په دغه هیواد کې اوس په میلیونونو کسانو بیړنیو بشري مرستو ته اړتیا لري.
په دغه افریقایي هیواد کې د تندلارې ډلې بوکو حرام، د حملو له کبله تر ۲۰۰ زرو زیات خلک نورو هیوادونو ته کډه شوي او د هیواد دننه د بې ځایه شوو کسانو شمیر ۱،۷ میلیون ته رسیږي. په نایجیر، چاد او کمرون هیوادونو کې هم د بوکوم حرام د بریدونو له کبله شاو او خوا ۵۰۰ زره خلک بې کوره شوي دي.
په جنوبي سودان کې له ۲۰۱۳م کال راهیسې د پیل شوي وسله وال کړکیچ له کبله د دغه هیواد تر ۲،۴ میلیونو زیات وګړي نورو هیوادونو ته کډه شوي دي. پر دې سربیره د هیواد دننه د بې ځایه شوو کسانو شمیر په سلونو زرو ته رسیږي.
په افغانستان کې د اویایمي لسیزې له پای او همداشان تر هغې وروسته د جګړې د دوام له کبله په میلیونونو افغانان ګاونډیو هیوادونو او په سلونو زره نور د نړۍ نورو هیوادونو ته کډه شوي. په پاکستان کې اوس مهال یوازې د راجستر شوو افغان کډوالو شمیر ۱،۴ میلیونه ته رسیږي. پاکستان له اوږدې مودې راهیسې د کډوالو کوربه توب کوي. همداشان په ایران کې د راجستر شوو افغان کډوالو شمیر تر یو میلیون زیات دی.
