که څه هم په پاکستان کې د اختر په ورځو کې وسلوال بریدونه په ندرت پېښيږي، خو چارواکو ويلي چې استخباراتي ادارو د کورنيو چارو وزارت ته خبرداری ورکړی وو چې وسلوال ياغیان کېدای شي پر دغه ورځ پر حکومت، ملکیانو، د پولیسو او پوځ پر تاسیساتو، ساختمانونو او کورونو بریدونه وکړي.
په هغو سیمو کې هم کلک امنیتي تدابیر نیول شوي چې تمه ده مطرح افراد پکې د اختر لمونځونه او یا خلکو ته ویناوې کوي.
د پاکستان د پنجاب ایالت پولیسو په یوه اعلامیه کې ويلي دي چې د اختر ورځو د امنیتي پلان مطابق د پولیسو ۲۵زره ځواکونه په مسجدونو او ۸زره نور د لاهور ښار په مهمو برخو او مارکیټونو کې استخدام شوي دي.
پاکستان په وروستیو کې د خونړيو پېښو شاهد پاته شوی. د اکثرو دغو حملو مسئولیت پاکستاني طالبانو منلي. همدارنګه بلوچ بيلتون غوښتونکي چې تر ډېره په بلوچستان ایالت کې فعال دي هم وسلوال بریدونه کړي دي.
په افغانستان کې د طالبانو د کورنیو چارو وزارت هم وايي چې د اختر ورځو کې د ټول هېواد په سطحه امنيتي تدابیر نيول شوي دي. د دغه وزارت ویاند، عبدالمتين قانع وويل چې امنیتي ځواکونه د مسجدونو په ګډون د ټولو ښارونو په مهمو او د ګڼې ګوڼې ډکو ځایونو کې په دندو ګمارل شوي دي. له دې نه علاوه په کابل کې د پولیسو مشر، له خلکو غوښتي چې د پټاقيو څخه استفاده ونه کړي.
له آرشیف څخه:
انځوريز راپور: کوچنی اختر د نړۍ په ګوټ ګوټ کي
په دغه انځوريز راپور کي د نړۍ په بيلو هيوادونو کي د کوچني اختر د لومړۍ ورځي انځورونه کتلای سئ. له دغو څخه په يو شمير هيوادونو کي د کرونا پاندمي تر څنګ تاوتريخوالي او بحرانونو هم خپله لمنه غوړولې ده:
انځور: Mahmoud Illean/AP/picture alliance
فلسطين ـ د بحران تر سيوري لاندي
د روژې مياشت په داسي وخت کي پای ته ورسېده چي د اسرائيلو او فلسطينيانو تر منځ تاوتريخوالی زيات سو. د رسنيو د راپورونو له مخي د اختر په لومړۍ ورځ پنجشنبه تقريبا ۱۰۰ زره مسلمانان و بيت المقدس ته د اختر د لمونځ له پاره راټول سوي ول. دغه ځای چي پکښي د اقصی مسجد هم واقع دی، د مسلمانانو لومړۍ قبله او د اسلام دريم تر ټولو مقدس ځای دی.
انځور: Mahmoud Illean/AP Photo/picture alliance
سېلفي له مسجد اقصی دباندي
د اقصی مسجد دباندي ساحه د روانې اونۍ په پيل کي د تاتريخوالي مرکز وګرځېد. دا هغه وخت کله چي د فلسطيني احتجاج کوونکو او اسرائيلي امنيتي چارواکو تر منځ اخ و ډب رامنځته سو. احتجاج کوونکو پر پوليسو ډبري وغورځولې او هغوی ورباندي اوښکي بهېونکی ګاز او ربړي مرمۍ فاير کړې. خو د اختر په لومړۍ ورځ دغه ساحه بېرته د زياتو سېلفيانو شاهده وه.
انځور: Mahmoud Illean/AP Photo/picture alliance
سعودي عربستان ـ د اختر مبارکي
پنجشنبه په سعودي عربستان کي د اختر لومړۍ ورځ وه. په دغه انځور کي د اختر تر لمونځ وروسته خلک يو له بل سره د اختر مبارکي کوي.
انځور: Ahmad Yosri/REUTERS
عراق ـ د اختر لمونځ په کڼدوالو کي
د عراق د موصل ښار په المصفي مسجد کي د اختر لمونځ وسو. دغه مسجد چي ۱۴۰۰ کاله پخوا جوړ سوی دی، له داعش سره د جګړو پر وخت يې يوه برخه زيانمنه سوه. خو مسلمانان اوس هم دلته لمونځ کوي.
انځور: Abdullah Rashid/REUTERS
اندونيزيا ـ د اختر د سپوږمۍ په تلاښ
عموماً هر اسلامي هيواد پخپله د اختر په سپوږمۍ پسي لټون کوي او بيا اختر اعلانوي. لکه د اندونيزيا په مصيرين نومي دغه مسجد کي چي په دوديزو آلاتو لټون روان دی. دغه مسجد په جکارتا کي دی.
انځور: Willy Kurniawan/REUTERS
اندونيزيا ـ د اختر شپه په مشعلونو کي
په اندونيزيا کي د اختر شپه د ماشومانو له خوا د مشعلونو په لېږدولو لمانځل کيږي. په دې ترڅ کي د ګاونډ ماشومان سره راټوليږي او بيا په کوڅو کي د يو کوچني لاريون په شکل د ځان سره مشعلونه لېږدوي.
انځور: Willy Kurniawan/REUTERS
پاکستان ـ د کوچنيانو اختر
اختر په زياته د ماشومانو له پاره د خوښۍ يوه ښه موقع وي. نژدې په ټولو مسلمان هيوادونو کي ماشومان د خپلوانو د اختر مبارکي ترلاسه کوي، د اختر له پاره جوړو سوو ميلو ته ورځي او د لوبو شيان په بازار کي رانيسي. په دغه انځور کي د پاکستان په کراچي ښار کي د اختر لومړۍ ورځ انځور سوې ده.
انځور: Arif Ali/AFP/Getty Images
آلمان ـ د اختر لمونځ خو په واټن سره
په آلمان کي دويم ځل کوچنی اختر د کرونا پاندمي پر وخت تجليليږي. سږکال هم په آلمان کي اوسيدونکو مسلمانانو د اختر په لمونځ کي ګډون وکړ. البته په ټولو مساجدو کي لمونځ کوونکو ته د مساجدو د اداره کوونکو ټولنو له خوا هدايات سوي ول چي د لمونځ پر وخت واټن وساتي. د جرمني په بن ښار کي د اختر لومنځ د فوټبال په يوه ميدان کي وسو.
انځور: Lindita Arapi/DW
بوسنيا هرڅګووينا ـ تر خلاص آسمان لاندي
د بوسنيا هرڅګووينا تقريبا نيم نفوس مسلمانان دي. د اختر په لومړۍ ورځ په اکثرو مساجدو کي هغوی تر خلاص آسمان لاندي او په مساکونو کي د اختر لمونځ ادا کړ.
انځور: Armin Durgut/PIXSELL/picture alliance
افغانستان ـ د تاوتريخوالي سره مل درې ورځنی اوربند
د افغانستان په لانجه کي ښکيل دواړو اړخونو د کوچني اختر د درو ورځو له پاره اوربند اعلان کړی وو. خو د هغه باوجوده د اختر په لومړۍ ورځ په ځينو ولايتونو کي چاودني وسوې او مرګژوبله به يې هم رامنځته کړه. د کابل د عبدالرحمن په دغه مسجد کي امنيت ساتونکی سرتيری او لمونځ کوونکي تر سترګو کيږي.
انځور: Wakil Kohsar/AFP/Getty Images
عراق ـ د بيلو خوراکونو ورځ
اختر په اکثرو هيوادونو کي د ځايي خوراکونو او په زياته بيلا بيلو دوديزه خوږو د خوراک ورځي وي. لکه په دغه انځورکي چي يوې عراقۍ مېرمنی د خپلي سيمي ځانګړي خوږې کلچې په پتنوس کي را اخيستي دي.
