د طالبانو ویاند، ذبیح الله مجاهد، د اکتوبر مياشتي پر څلورمه پر خپلې ټويټر پاڼې لیکلي: «په پاکستان کې د افغان مهاجرو سره چلند د منلو نه دی.» مجاهد د پاکستان دغه ادعا چې د پاکستان په ناامنیو کې افغانان ښکيل دي، ردوي: «باید پاکستاني لوری په دې اړوند خپل پلان باندې له سره غور وکړي. افغان مهاجر د پاکستان په امنيتي ستونزو کې لاس نه لري.»
جيلاني په دغه مرکه کې ويلي: «هر کله چې یوه ستونزه رامنځ ته شوې، خلکو [افغانانو] پاکستان ته مهاجرت کړی، په پاکستان کې يې پناه اخيستې.» هغه زیاتوي: «خو اوس زه فکر کوم چې دا له ۴۰ کلونو ډېر شو، ځکه خو د پاکستان حکومت یو تصمیم ونیو.»
جیلاني وويل چې پاکستان »له اوږدې مودې راهيسي» د مهاجرت پر موضوع له افغانستان سره په خبرو بوخت دی. هغه همدارنګه پر نړېوالو سازمانونو غږ وکړ چې له دغې پروسې سره همکاري وکړي.
دا په داسې حال کې ده چې مرستندوی چارواکي وايي افغانستان وار دمخه له بشري بحرانونو سره مخ دی او له پاکستانه په لوي شمېر کې اجباري اخراجونه به د افغانستان ستونزې نورې هم ډېرې کړي.
د طالبانو له واکمنۍ راهیسې د ځينو رسنيو تړل کېدو، امنیتي ننګونو او پر رسنیو د محدودیتونو له امله ځینو ژورنالیستانو افغانستان پرېښود او اوس په ګاونډیو هیوادونو لکه ایران او پاکستان کې له نامعلوم برخلیک سره مخامخ دي.
انځور: Z. F.
د تخلیې په تمه د انتظار سختې شیبې
اغلې پوپلزۍ وايي چې «ما خپل کیس ډېرو سفارتونو ته ولېږو، ځينو یې ځواب را نه کړ او ډېرو زما له خوا د پناه غوښتنې وړاندیز رد کړی.» پر افغانستان د طالبانو تر بیا حاکمیت وروسته ډېر خبریالان بهرنیو هیوادونو ته د تخلیې په تمه ایران او پاکستان ته تللي دي. د دوی زیاتره د نامعلوم برخلیک په هکله شکایت لري.
اغلې پوپلزۍ وايي، تراوسه هیڅ نړیوالې ادارې مالي مرسته نه ده ورسره کړې او له تیرو نهه میاشتې راهیسې يې مصارف به بهر کې مېشت مشر ورور ورکوي. خو پاکستان ته په تللو افغان خبریالانو کې بیا ډېر نور داسې هم شته چې، مالي لګښتونه يې خپل دي او له بې سرنوشتۍ ځورېږي.
انځور: Z. F.
مهاجرت او اقتصادي ستونزې
افغان خبریال شریف شګېوال نهه میاشتې کیږي چې په پاکستان کې ژوند کوي او په دغه هیواد کې له اقتصادي ستونزو شکایت کوي: «زما دوسیه د بېپولې خبریالانو له ټولنې سره ثبت ده، په لومړي سر کې يې رد ځواب راکړی و، خو ترهغې وروسته چې مې جزییات ورسره شریک کړل، تېره اوونۍ يې مثبت ځواب و.»
افغان ویډیو ژونالیست او اېډيټر رمان پناه وايي چې هر ځای یې دوسیې رد شوي. رمان زیاتوي: «هغه راپورونه چې ما جوړ کړي، یادونه پکې نه شوې چې ايډيت يې ما کړی، نو چې هر ادرس ته چې خپله دوسیه لېږم، زما د ژورنالیستک کار بېلګه غواړي، څو زما کار ورته ثابت شي، همدا لامل دی چې هر ځای مې دوسیه رد کېږي.»
انځور: Z. F.
د خبریالانو د ستونزو اوریدو له پاره اقدام
په اسلام اباد کې یو شمېر افغان خبریالانو د ''Afghan Journalists at Risk'' په نوم حرکت رامنځ ته کړی، څو د تخليې په تمه پاکستان ته د تللو افغان خبریالانو له پاره لابي وکړي. د دغه حرکت د رهبرۍ بورډ غړی عبدالله همیم مني چې تراوسه يې کومه مثبته پایله نه ده ترلاسه کړې خو هڅې به دوامداره ساتي.
انځور: Z. F.
په خپله لاس په کار کیدل
دغه حرکت، پاکستان ته تللي شاوخوا ۲۰۰ افغان خبریالان لیست کړي، خو وايي، دا شمېر ښايي تر دې هم ډېر وي. د افغانستان د خپلواکو ژورنالیستانو ټولنې رئیس حجت الله مجددی وايي، په تېر یوه کال کې له ۷۰۰ تر ۱۰۰۰ پورې رسنيزو کاروونکو هيواد پرېښی، چې ځینې يې لا هم په ګاونډيو هېوادونو کې بې سرنوشته پاتې دي.
