کن اوکويا د جاپان د اورګاډو شرکت له پاره د «شيکي شيما» په نوم يو ډېر لوکس ریل ګاډی طراحی کړی دی چې په اصطلاح پر پټليو يو پنځه ستوري هوټل دی. د دې ريل لوکسې کوټې آن يو کامين او د لامبلو ټپ هم لري. شيکي شيما د څلورو فصلونو معني ورکوي او په دې ريل ګاډي کې سفر او د مسافرو ټورونه د کال له فصلونو سره همغږي شوي دي.

د «شيکي شيما» په لسو واګنونو کې حداکثر ۳۴ مسافرين سفر کولای شي او په دې ريل کې د سفر موده د دريو او څلورو ورځو په منځ کې ده. د دې سفر بيه د ۲۵۰۰ او ۹۰۰۰ یورو ترمنځ ده.

د «وينس- سيمپلون-اورینت ايکسپرس» اورګاډي سفر چې ۱۲۰ کاله پخوانی دی، په اروپا کې د اورګاډو له ګران بيو او لوکسو سفرونو څخه دی. که څه هم چې په لومړي سر کې به دا ريل له استانبول څخه تیريده خو اوس سړی کولای شې د يوې او څلورو ورځو ترمنځ له بېلابیلو لارو سفر وکړي.

په دې ريل ګاډي کې د سفر قيمت چې د اروپا له يو شمير سترو ښارونو څخه تیريږي، د ۲۴۰۰ او ۷۰۰۰ يورو ترمنځ ده. په دې اورګاډي کې يو رستورانت، د پيانو ژوندی کنسرت او نور ډېر لوکس خدمات وړاندې کيږي.

تر نوي کلونو زيات وخت کيږي چې د «ګلاسير ايکسپرس» په نوم ريل ګاډی د سويس په غرونو کې له زرمات څخه تر سانت موریڅ پوري چليږي. دا اورګاډی د ۲۹۱ کيلومتره لاري په وهلو سره له ۹۱ پلونو څخه د تیريدو پر وخت مسافرو ته د الپ د غرونو زړه راکښونکي مناظر ښيي.

په دې ريل کې ۸ ساعته سفر له ۱۵۰ يورو پيليږي او د لومړۍ درجې په واګن کې د سفر بیه ۴۵۰ یورو ده. په دې ريل کې حداکثر ۲۰ مسافر سفر کولای شي.

«بلموند رويال سکاتسمن» د سکاتلند يو لوکس ريل ګاډی دی چې يو اتوبس له ځان سره يوځای کوي او مسافر د ریل د پټلۍ له لارې په ښکلو او د ليدو وړ سيمو کې ګرځوي. په دې ريل کې په يو ځل يوازې ۴۰ سفر کولی شي او د شپې د مسافرو د آرام او ښه خوب په خاطر دريږي.

دغه ریل چې مسافرو ته ځانګړی شوی يو کتابتون هم لري، سفر يې د دريو او پنځو ورځو ترمنځ دی او بيه یې د ۳۷۰۰ او ۶۶۰۰ يورو ترمنځ ده. د دې ريل ګاډي د يوې اونۍ د ګښت بيه ۷۴۵۰ يورو کیږي.

په جنوبي افريقا کې د «آبي ريل» د ۱۷ ساعته لوکس سفر په ترڅ کې سړی د وحشي ژويو له سېلونو هم خوند اخيستلای شي. په دغه ريل کې نارينه يوازي په رسمي لباس کې رستورانت ته داخليدو اجازه لري.

په دې ريل کې د کيپ ټاون او پريتوريا ترمنځ يو طرفه سفر د ۱۸۰۰ او ۲۶۰۰ يورو ترمنځ بيه لري. پريتوريا ملي پارک ته دوه طرفه سفر بیا د ۳۶۰۰ او ۴۸۰۰ يورو ترمنځ بيه لري.

د «غان» يا افغان په نوم اورګادی د اديلايد څخه د استرليا په سويل شمال کې تر داروين پورې ۳۰۰۰ کيلومتره لاره وهي. دې اورګاډی ته دا نوم د هغو افغانانو په ياد ورکړل شوی دی چې په سونو کاله پخوا استرليا ته تللي ول او پر اوښانو په يې بارونه له يوه ځايه بل ځای ته انتقالول.

په دې ۵۴ ساعته سفر کې چې په ترڅ کې مسافر دوې شپې بايد په ريل کې تیرې کړي، پر نورو لوکسو خدماتو سربیره مسافر کولی شي د توريستي سفرونو په ترڅ کې د اوښ له سپرلۍ خوند واخلي او يا د کښتۍ سفرونه وکړي. په دې ريل کې د سفر بیه د ۱۴۰۰ او ۴۶۰۰ يورو ترمنځ ده.

د هند کرناتاکا ایالت له مرکز بنګلور څخه چې يو زرغون او ښه آب و هوا لرونکی ایالت دی، د «ګولدن شيريوت» په نوم دا ريل ګاډی خپل سفر پيلوي. دې اورګاډي خپل سفرونه په لومړي ځل په ۲۰۰۷م کال کې پيل کړل او په ۲۰۲۰م کال کې دا ريل په بشپړه توګه له سره ترمیم شو.

د «ګولدن شیريوت» سفر چې آن د ورزش يو سالون هم لري، د دريو او شپږو ورځو ترمنځ دی. د دې سفر په ترڅ کې سړی د هند د پخوانيو واکمنانو د قصرونو سيل کولای شي. په دې اورګاډي کې د سفر بيه د ۴۱۰۰ او ۷۰۰۰ یورو ترمنځ ده.