د اسوشتید پریس خبري آژانس په حواله تیره شپه په کمکي موادو بار نهمه الوتکه د متحده عربي اماراتو څخه د اسلام آباد هوايي ډګر ته رسیدلې. په دې ترڅ کې له ازبکستان څخه په مرستو بار لومړنۍ الوتکه هم پاکستان ته رسیدلې ده.

د بشري مرستو دغه پروازونه داسې مهال پاکستان ته رسيږي، چې د دغه هیواد په سيلابونو کې د مړو شمیر له ۱۲۰۰ څخه اوښتی او د سېلابونو له کبله بې کوره شوې کورنۍ او ماشومان د ناروغيو له ځانګړي خطر سره مخ دي.

د پاکستان د بهرنیو چارو وزارت د جمعې په ورځ په یوه اعلامیه کې وويل چې په دغو الوتکو کې خوراکي مواد، درمل او خېمې راوړل شوي دي.

د پلان له مخې د پاکستان صدارعظم شهباز شریف د شنبې په ورځ متحده عربي اماراتو ته سفر کاوه خو هغه په هیواد کې دننه له ځپل شوو سیمو د کتنې په خاطر دغه سفر شاته غورځولی دی.

پاکستان تر اوسه پورې له چين، سعودي عربستان، قطر، ترکېې، ازبیکستان، متحده عربي اماراتو او نورو هیوادونو څخه مرستې ترلاسه کړي دي.

امریکا متحده ایالاتو هم روانه اوونۍ اعلان وکړ چې د پاکستان سېلاب ځپلو سره د ۳۰ ميلیونه ډالرو په ارزښت مرستې کوي.

پاکستان سږني ویجاړوونکي سيلابونه د اقليمي بدلون له کبله بولي. د پاکستان د بهرنيو چارو وزارت ویاند، آصف افتخار تیره ورځ په ېوې لنډې خبري ناسته کې وويل چې دغه بحران د اقليمي بدلون په اړه د پوهانو خبرداري ته اعتبار ورکړی دی. هغه وویل: «دا کومه عادي خبره نه ده، دا یو حقیقت دی او موږ باید په دې باندې پوه شو.»

د ملګرو ملتونو د سر منشي، آنتونیو ګوتریش په ګډون، ګڼو چارواکو هم د پاکستان سيلابونه د اقليمي بدلون پایله بولي. د حکومت د ابتدايي ارقامو پر اساس، سيلابونو پاکستان ته د ۱۰ ميليارډ ډالرو په ارزښت زیان اړولي دي.

پاکستان او ملګرو ملتونو سازمان روانه اوونۍ يو مشترک اپیل خپور کړ او په هغه کې يې د درې اعشاريه ۳ ميلیونه کسانو له پاره چې په سيلابونو کې زیانمن شوي د ۱۶۰ ميلیون ډالرو عاجلې مرستې غوښتنه وکړه. د ویلو ده چې په دغو سيلابونو کې له يو ميليون څخه ډير کورونه ويجاړ شوي دي.

پاکستان په رارونو ورځو کې هم د سيلابونو د خطر وړاندوېنه کړې ده. چارواکو د جمعې په ورځ د سېند ايالت د دادو ولسوالۍ اوسیدونکو ته خبرداری ورکړ چې امن سيمو ته ووځي. د سيندونو د ډکېډو له کبله وړاندوينه شوې چې روانه اوونۍ به سيلابونه دغه سیمه وځپي.