پر ایران تر حملې وروسته پاکستان بېړنۍ امنيتي غونډه کوي
۱۴۰۲ دی ۲۹, جمعه
د پاکستان صدراعظم نن د دغه هېواد د پوځ او استخباراتو ادارې له مشرانو سره بېړنۍ امنيتي غونډه کوي. دغه غونډه د ایران خاوره کې د پاکستان هغو هوايي بریدونو وروسته کيږي چې وايي اورپکي ېې پکې په نخښه کړي.
اعلان
د پاکستان موقت صدراعظم انوارالحق کاکړ، د جمعې په ورځ (د جنوري ۱۹) د پوځ او استخباراتو له مشرانو سره دغه ډول په ندرت سره جوړېدونکې غونډه د ایران او پاکستان تر منځ د وروستیو پوځي تحرکاتو په ادامه رابللې.
د دواوړو هېوادونو تر منځ د بلوچستان په سرحدي سیمه کې دغو تحرکاتو د وضعیت لاخرابوالي ته لمن وهلې ده کوم چې وار دمخه د اسرائيل او حماس تر منځ پيل شوې جګړې له کبله خراب شوی دی.
دغه پوځي تحرکات لومړی د ایران له خوا پیل شول. ایران د سه شنبې په شپه د پاکستان په خاوره کې د ډرون او توغندی حمله وکړه چې په وینا ېې «تروریستي» اهداف ېې پکې په نخښه کړل. پاکستان د ایران دغه حمله وغندله او د پنجشنبې په ورځ ېې د ایران په خاوره کې ورته حمله وکړه. پاکستان هم وويل چې په دغه حمله کې ېې اورپکي په نخښه کړي دي.
تر دغو حملو وروسته ملګرو ملتونو او امریکا متحده ایالاتو د زغم غوښتنه کړې او په ورته وخت کې چين د پاکستان او ایران تر منځ د منځګړيتوب وړانديز کړی دی.
د پاکستان او ایران ترمنځ شخړه - د جنوري په ۱۸مه د پاکستان له خوا د یو توغول شوي توغندي یوه برخه چې د ایران په خاوره کې لګېدلیانځور: Ghani Kakar/DW
د اسلام آباد يو امنيتي چارواکي وويل چې دغه غونډه به ماسپښین پیل شي چې پکې به د پاکستان د پوځ مشر او د پاکستان د استخباراتو ادارې، آی اس آی، مشر ګډون ولري.
د هغه موقت حکومت به د پاکستان راروان عمومي انتخابات اداره کوي چې یوازې درې اوونۍ ورته پاتې دي خو له اوسه په دغو انتخاباتو کې د درغلیو ادعاوې شوي دي.
د سیاسي چارو شنونکی آفراسیاب خټک دویچه ویله سره په یوه ځانګړې مرکه کې وويل چې د ایران او پاکستان ترمنځ به ظاهراً نور بریدونه ونشي خو «تنش به وي او بریدونه خو د دوی آخری ګوزار وي او په اصل کې دوی خپل بریدونه د نیابتي ډلو په ذریعه کوي، او زما خیال دی چې د نیابتي ډلو له لارې به دغه جنګ ادامه ولري.» هغه وايي د ایران او پاکستان په بریدونو کې دواړو خواو ته بلوڅان په نخښه شوي دي.
د خټک په خبره پاکستان او ایران ظاهراً په خپلو کې ښه دي خو په ژوره کې خپل اختلافات لري، ځکه پاکستان له امریکا سره ولاړ دی په داسې حال کې چې ایران د اسلامي انقلاب راوروسته له امريکا سره ښه روابط نه لري.
(AFP)mks/nz
له آرشیف څخه:
پاکستان څه ډول توغندي لري؟
د پاکستان د اتومي انرژۍ کمېسيون، کهوټا تحقيقاتي ادارې، سپارکو او د دفاعي علومو او تکنالوژۍ سازمان په ګډه د توغنديو پر تخنيک څېړنې پېل کړې وې. په دې ګالرۍ کې د پاکستاني توغنديو په اړه جزيات ترلاسه کولی شئ:
انځور: ISPR
پاکستاني توغندي او واټن یې
د پاکستان د بالستيک ميزايل پروګرام له نزدې واټن څخه نيولې تر منځني واټن ويشتلو پوري وړتيا لرونکي ميزايل لري.
حتف يو میزايل
حتف ون يا حتف يو د لنډ واټن لومړی بالستېک میزايل وو چې پاکستان جوړ کړی وو او په لومړي سر کې یې له ۷۰ تر ۱۰۰ کلوميترو پورې واټن وهلای شوای. دا ميزايل د سپارکو شرکت د نورو په مرسته په ۱۹۸۹م کال کې جوړ کړی وو. دا په ۱۹۹۲م کال کې د پاکستان پوځ ته وسپارل شو.
انځور: ISPR
حتف اته، رعد کروز توغندی
حتف اته يا رعد دوه توربو جېټ پاور کروز ميزايل دی. پاکستان د ۲۰۰۷م کال په اګست کې د دې آزموينه پيل کړې وه. د رپوټونو په حواله تر يو شمير تجربو وروسته د ۲۰۱۶م کال په جنورۍ کې ترسره شوې تجربه یې تر اوسه تر ټولو بريالۍ وه. دا ميزايل تر ۳۵۰ کيلومترو پوري واټن وهي.