برلین د سه شنبې په ورځ د ښځو د ځواکمنولو په اړه یوې غونډې کوربه وو. په دې غونډه کې د آلمان صدراعظمې انګلا میرکل، د پیسو نړیوال صندوق مشرې کریستین لاګارد او یو شمیر نورو ښځو چې په مهمو دندو کې کار کوي ګډون کړی وو. د غونډې د ویناوالو په ډله کې د امریکا متحدو ایالاتو د ولسمشر دونالد ترمپ لور ایوانکا ترمپ هم وه. ایوانکا په وروستیو وختونو کې د خپل پلار د مشاورې په توګه هم کار کوي.
کله چې ایوانکا هڅه وکړه چې د ښځو پر وړاندي د خپل پلار د چلن دفاع وکړي، نو د غونډي پر ګډونوالو ښه و نه لګیده او څرګنده یې کړه چې د هغې له خبرو سره موافق نه دي.
تر دې مخکې چې دونالد ترمپ، د امریکا متحدو ایالاتو ولسمشر شي، هغه داسې څرګندوني کړې دي چې ښيي هغه ښځو ته جنسیتي نظر کوي. په دې اړه تر هغه وروسته بحثونه زیات شول چې د امریکا د ولسمشریزو ټاکنو پر مهال، د دونالد ترمپ یوه داسې پخوانۍ ویدیو رسنیو ته راووته، چې پکښې یې ښځو ته سپکې سپورې ویلې وې.
هغه دغه شان خبري په وار وار په خپلو مرکو کې هم کړې دي او پرې یوه لویه نیوکه، ښځو ته سپک نظر کول دي. خو ایوانکا بیا هڅه وکړه چې وښيي دا هر څه سم نه دي او ټینګار یې وکړ چې پلار یې د ښځو پر وړتیاو باندې باور لري.
د غونډې نطاقې له ایوانکا څخه وپوښتل چې ایا هغه باور لري چې پلار به یې پر هغو خبرو سربیره چې کړي یې دي، د مساوي حقونو په برخه کې لاس ته راوړني ولري. ایوانکا له ترمپ څخه د دفاع هڅه وکړه او ویې ویل: «په یقیني توګه چې ما په رسنیو کې دغه شان نیوکې اوریدلي دي خو دې هر څه ته یو ډول دایمي بڼه ورکړل شوې ده.»
د هغې تر دې څرګندونو وروسته د W20 کنفرانس ګډونوالو داسې غږ پورته کړ چې وښيي د ايویانکا ترمپ له خبرو سره هیڅ موافق نه دي. ایوانکا زیاته کړه: «په زرونو هغو ښځو چې زما له پلار سره او یا یې هم د هغه له پاره کار کړی دی، د دې شاهدانې دي چې پلار مې د ښځو پر ظرفیت او د هغوې پر وړتیا باندي چې هر کار د نارینه و په څیر ښه سر ته ورسوي، باور لري.»
ایوانکا زیاته کړه: «زه په داسې یوه کور کې لویه شوې یم چې د هغه څه پر وړاندي چې زه یې تر لاسه کولای شي هیڅ ممانعت موجود نه وو. زما او زما د ورونو تر منځ هیڅ توپیر نه وو.»
د پلار د سیاستونو په اړه ګنګ معلومات
ایوانکا د ښځو اقتصادي پیاوړتیا د پالیسي په یوې موضوع بدله کړې ده او وایي چې له پاره به یې مبارزه وکړي. هغې د جمهوري غوښتونکو کنګرې ته په وینا کې ژمنه وکړه چې د هغو میندو له پاره به د معاش لرونکي رخصتي غوښتنه وکړي چې تازه یې ماشوم زېږولی وي.
خو کله چې له هغې څخه په کنفرانس کې په دې اړه پوښتنه وشوه چې پلار یې کوم مشخص پلانونه لري چې د ښځو او نارینه وو تر منځ مساوات رامنځ ته شي، نو د ایوانکا ځواب ډیر روښانه نه وو. هغې یوازې وویل چې دغه موضوع یې د پلار په لومړیتوبونو کې شامله ده.
دونالد ترمپ ایوانکا او د هغې میړه جیراد کوشنر، ته په خپله اداره ډیر مهم نقشونه ورکړي دي. ایوانکا ترمپ د خپل پلار مشاوره ده او په ډیرو غونډو کې له هغه سره حاضره وي، خو میړه یې بیا تر دې هم پراخ نقش لري. او د حکومت د ډیرو پلانونو د پلې کولو دنده ورته سپارل شوې ده.
زموږ له ارشيف څخه:
د امريکا ولسمشرۍ ته بریالی کاندید دونالد ترمپ چې له بارک اوباما څخه به د ولسمشرۍ واک ورسپارل کيږي، په خپل تير ژوند کې د مينې او یارانې ډیر سرګذشتونه لري. د نوموړي د ژوند د ښځو او کورنۍ انځوريز رپوټ دلته کتلای شئ:
انځور: picture-alliance/abacaدونالد ترامپ خپلو سيالانو ته تر ماتې ورکولو وروسته، د امريکا متحده ايالتونو په انتخاباتو کې د جمهوري غوښتونکو د ګوند رسمي کانديد وګرځيد. ترامپ چې د امريکا یو ناندريز ميلياردر دی، تر دې مخکې يې د لوړو ژورو ډګ مينه ناک ژوند لری دی.
په امريکا کې ولسمشرۍ لپاره ډیر لږ کانديدان داسې دي چې د خپل ګوند د غړو په منځ، ټولنه او حتې له هيواده بهر دې داسې جنجالي او ناندريز وي.( انځور: د ویسکانسن ايالت یو استاځي په کليولند کې د جمهوري غوښتونکو په کنګره کې د دونالد ترامپ له کانديداتورۍ څخه خپل مخالفت په ډاګه کړ).
دونالد ترامپ د ۱۹۴۶ کال د جون په ۱۴ مه نيويارک کې وزيږيد. هغه د فدريک ترامپ او مري آن مک لئود په پنځو اولادونو کې څلورم زوې دی. پلار ته یې د ميليونو ډالرو دارايي، د هستوګنځايونو د کاروبار له بابته ترلاسه شوي دي. ترامپ هم د خپل پلار لاره تعقیب کړه، حتې د پوهنتون په دوره کي یې د پلار په پيسو کورنو اخیستل او پلورل. په ۱۹۷۴ کې د لوړو زدکړو تر پاي ته رسيدو وروسته یې د پلار شرکت مسئوليت پر غاړه واخیست.
د ترامپ لمړنۍ ښځه چکي ماډله ایوانا مری زلنیچکوا وه. دواړو په ۱۹۷۷ کال کې واده وکړ. ترامپ له دغه واده څخه دوه زامن او يوه لور لري.
د هغه مشر زوی دونالد ترامپ يونيور دی. دی ۳۸ کاله عمر لري او د دونالد ترامپ د سوداګريز شرکت معاون دی. انځور کې يونيور د خپلې ميرمنۍ وانسا سره.
ایوانکا ترامپ، د دونالد ترامپ ۳۴ کلنه لور ده. دا ترڅنګ د دې چې د پلار په سوداګريز شرکت کې معاونه ده، د بوټونو د خرڅلاو په برخه کې هم فعاله ده.
ايوانکا ترامپ له جارد کوشنر سره چې ۳۵ کاله عمر لري واده کړی دی. دغه ميرمن نه یوازې د کورنو په تجارت کې فعاله ده، بلکه د يوې ورځپاڼې د امتياز خاونده هم ده.
له ايوانا مري زلنيچکو څخه د دونالد ترامپ وروستی اولاد د هغه ۲۳ کلن زوی اریک ترامپ دی. دی هم تر څنګ د دې چې د پلار په سوداګريز شرکت کې معاون دی، د ترامپ د هوټلونو رئیس هم دی.
وروسته له هغې چې ترامپ له خپلې لمړنۍ ميرمنۍ څخه جلا شو له مارلا ماپلس سره یې واده وکړ. (له ۱۹۹۳ تر ۱۹۹). مارلا ماپلس چې یوه سندرغاړې وه له ترامپ څخه یې ۱۷ کاله کم عمر لرود.
ترامپ له مارلا ماپلس څخه یوه لور لري چې تیفانی نوميږي. نوموړې د مدلينګ او سندرو ویلو په برخه کې فعاله ده او روان کال له پوهنتون څخه فارغيږی. تیفانی د پلار په سوداګريز سيستم کې ځای نلري او د هغه تر نوماند کيډو د مخه، له خپلې مور سره په کالفورنيا کې اوسيده.
دونالد ترامپ له مار لا ماپلس څخه تر جلا کیدو وروسته، د يو لنډ وخت لپاره د کار لا بروني سره ملګرتيا لرله. هغې له ترامپ څخه تر جلا کيدو وروسته د نیکلا سارکوزي سره واده وکړ، چې بيا د فرانسې ولسمشر شو.
دونالد ترامپ له خپلې دويمې ميرمنۍ سره تر جلا کيدو وروسته، په ۲۰۰۵ کال کې له سلوانۍ ماډلې، ملانیا کناوس سره واده وکړ.
اوس د ترامپ لمسی او د هغه کشری ځوی «بارون ویليام» سره تقريباً همځولي دي. ویليام چې اوس ښوونځي وايي، له ملانیا سره د ترامپ د واده حاصل دی. ترامپ د اتو لمسيانو نيکه دی.
ترامپ د کورنو، هوټلونو او قمارخانو شرکتونو ترڅنګ، تر ۲۰۱۵ کاله پورې د «ان بي سي یونيورسل» رسنۍ سره په ګډه، د نړۍ د ښکلا ملکې د سياليو پروسې اختيار هم په لاس کې لرود.
ټولې هغه ښکلې ښځې چې تر تيرو کلونو پورې دونالد ترامپ سره په يوه لاره تللې، اوس، په ځانکړې توکه د انتخاباتو پر وخت ترامپ لپاره د سترو ستونزو لامل شوې. په ټولو نظرسنجيو کې په ډيره سلنه کې ثابته شوه چې ترامپ د «ښځو ښه نه راځي». په امريکا کې د رايو اکثريت ښځي تشکيلوي چې دغه رايې د هغه سيالې، هيرې کلينټن ته کارول شوي دي.
