د امريکا متحدو ايالاتو د دفاع وزارت په عراق کي د رمادي ښار د آزادولو له پاره عملياتو پر نوم باندي چي «يا حسين» دئ، نيوکه کړې ده. دوی وايي چي دا د شيعه او سني تر منځ د تاوريخوالي سبب کېدای سي.
انځور: M. Sawaf/AFP/Getty Images
اعلان
د سه شنبې په روځ د امریکا د دفاع وزارت پر عراقي چارواکو باندي د انبار ولايت د مرکز رمادي ښار د آزادۍ عملياتو پر نامه باندي نيوکي وکړې.
پنتاگون وايي چي د عملياتو دغه نوم يو «فرقه يي» حرکت دئ، چي په عراق کي د سنيانو او شيعه گانو ترمنځ تاوتريخوالی ډېرولای سي. د رمادي ښار د آزادولو عملياتو ته د شيعه امامانو يو نوم په داسي حال کي ورکړل سوی چي د دغه ښار نزدې ټول اوسېدونکي سني مذهبه دي.
د پنتاگون وياند ستيو وارن، له خبريالانو سره په خپل اونيز خبري کنفرانس کي ويلي دي چي د عملياتو له پاره د دغه نوم ټاکل د وضعيت په ښه والي کي مرسته نه کوي.
هغه ټينگار کړی دئ چي د امريکا متحدو ايالاتو په نظر پر افراطي ډلي «اسلامي دولت» باندي بريا يوازي په يوه يوموټي عراق سره چي ټول مذهبونه او قومونه پکښې متحد وي امکان لري.
تر دې دمخه په عراق کي د څو ډلو يوه ائتلاف «حشد شعبی» اعلان وکړ چي د رمادي ښار د آزادۍ عملياتو له پاره ئې د «لبيک يا حسين» شعار ټاکلی دئ.
حشد شعبی هغه ائتلاف دئ چي په عراق کي د شيعه گانو له ۶۰ ډلو څخه د افراطي ډلي «اسلامي دولت» پر ضد جوړ سوی دئ. دغه ائتلاف د رمادي ښار د بيرته آزادولو له پاره له عراقي ځواکونو سره په گډه عمليات پيل کړي دي.
د عراق پوځ د رمادي ښار د آزادۍ له پاره له سه شنبې ورځي راهيسي پوځي عمليات پيل کړي دي. دا په داسي حال کي ده چي د امریکا د دفاع وزير اشتون کارتر د تيري يکشنبې په ورځ د عراق پر پوځ باندي نيوکه وکړه چي له داعش څخه د انبار ولايت په بيرته نيولو کي جدي عزم نه دئ ښوولی.
د امريکا د دفاع وزير د عراق پوځ په دې تورن کړی چي تر داعش ښه تجهيزات لري او يو ناڅاپه بې له مقاومته له دغه ولايت څخه پرشا سوی دئ.
خو د عراق لومړي وزير حيدر عبادي ويلي دي چي د تروريستي ډلي «اسلامي دولت» پر ضد مبارزه ئې جدي ده.
انځورونه: داعش رمادي ښار څرنگه ونيو
پر رمادي ښار باندي د تروريستي ډلي «اسلامي دولت» په يرغل سره له دغه ښاره په زرونو انسانان په تېښته کي دي. رمادي چي د عراق د انبار ولايت مرکز دی له سوريې، سعودي عربستان او اردن سره اوږد سرحد لري.
انځور: picture-alliance/AP Photo/K. Kadim
په انبار ولايت کي د تروريستي ډلي «اسلامي ولت» د پرمختگ پر مهال د دغه ولايت د مرکز کنترول د وسلي خلکو په لاس کي وو، او د امريکا او د متحدانو له هوايي بمباريو سره سره «اسلامي دولت» ډلي پرمختگ ته دوام ورکړ.
انځور: Reuters/Stringer
د «اسلامي دولت» ډلي جنگياليو د می مياشتي پر ۱۴ نېټه پر رمادي باندي يرغل پيل کړ او په څو ورځو کي ئې دغه ښار ونيو.
انځور: Reuters
په رمادي کي د عراق حکومتي ځواکونو له اسلامي دولت ډلي سره څو ورځي سخته جگړه وکړه.
انځور: picture-alliance/AP Photo
په رمادي کي جگړو سخت زيان اړولی دئ. د دغه زيان جبرانول به ډېر کلونه وخت ونيسي.
انځور: AFP/Getty Images/A. Al-Rubaye
په رمادي کي اوس هم مقاومت روان دی، خو داسي ښکاري چي د بشپړ د اسلامي دولت ډلي په کنترول کي به وي. دغه ښار ۲۵۰ زره نفوس لري او د بغداد په سل کيلومترۍ کي پروت دئ.
انځور: picture-alliance/AP Photo
اټکل کيږي چي په رمادي کي به د می مياشتي پر ۱۶ او ۱۷ نېټه نزدې ۵۰۰ حکومتي ځواکونه او ملکي وگړي وژل سوي وي.
انځور: picture alliance/AP Photo
په رمادي کي د «اسلامي دولت» ډلي په پرمختگ سره دغه ښار سخت ويجاړ سوی او خلک ئې په هره وسيله چي کيږي له دغه ښار څخه په تېښته کي دي.
انځور: Reuters/Stringer
د عيني شاهدانو په خبره تروريستي ډلي «اسلامي دولت» هغه مهال په رمادي کي پرمختگ وکړ چي حکومتي ځواکونو له مقاومته لا واخيست او يو ناڅاپه له دغه ښار څخه ووتل.
انځور: picture-alliance/AP Photo/K. Kadim
د عراق د چارواکو په خبره په رمادي کي د تيري جمعې ورځي په جنگ کي اسلامي دولت ډلي نزدې ۶۰۰ انسانان وژلي دي چي ډېر ئې ښځي او کوچنيان دي.