د سپتمبر میاشتې په ۱۵ نیټه د آسیا جام سیالیو په لومړۍ لوبه کې بنګله دیش د سریلانکا پر وړاندې د لوبو ډګر ودانګل. بنګلدیش د لوبو په لومړیو توپونو کې خپل د سر دوه لوبغاړي له لاسه ورکړل او له لومړي سر څخه لوبه یو طرفه ښکاریده. خو د مشفق الرحیم ۱۴۴ منډې دا هر څه د بنګله دیش په ګټه تمام کړل.
د لوبې په لومړیو شیبو کې بنګله دیش هغه وخت نور هم له ستونزو سره مخ شو، کله چې د دوی تکړه لوبغاړی تمیم اقبال د سورنګا لکمال په توپ سخت ټپي شو او په دې ترتیب سره یې د مړوند هډوکي کسر وکړ او له لوبې پاتې شو. خو د حیرانتیا خبره دا ده چې د لوبې په ۴۷ اور کې کله چې بنګلدیش مستفيض الرحمن له لاسه ورکړ، ټپي شوی تمیم اقبال بیرته د لوبې ډګر ته راکوز شو. په دې وخت کې مشفق الرحمن لا هم نه وو سوځیدلی او په خبره یې د تمیم بیرته راتګ هغه ته روحیه ورکړه. په دې ترتیب سره بنګله دیش وکولی شول چې په ۴۹،۳ اورونو کې د ټولو لوبغاړو په له لاسه ورکولو سره سریلانکا ته د ۲۶۱ منډو هدف وټاکي.
انځور: picture-alliance/Zumapress/T. Basnayaka د دغه هدف د ترلاسه کولو له پاره سریلانکا لوبډله د لوبې ډګر ته راغله خو د توپ وهنې په لومړیو توپونو کې یې د سر خپل تکړه لوبغاړی منډیس له لاسه ورکړ. تر دې وروسته د سریلانکا لوبغاړي یو په بل پسې سوځیدل او د لوبې مسیر د بنګله دیش لوري ته د تغیير په حال کې وو. په پایله کې د سریلانکا ټوله لوبډله په ۳۵،۲ اورونو کې د ۱۲۴ منډو په ترلاسه کولو سره له ماتې سره مخ شوه.
په دې لوبه کې د سریلانکا له پاره ملینګا ښه توپ اچونه وکړه او په ۱۰ اورونو کې یې د یوازې ۲۳ منډو په ورکولو سره څلور بنګله دیشي لوبغاړي له مخې لیرې کړل. د بنګله دیش له لوري بیا تقریباً ټولو توپ اچونکو ښه توپ اچونه کړې چې پر مټ یې بنګله دیش دغه لوبه خپله کړه.
ټاکل شوې چې سریلانکا او بنګله دیش به خپلې راتلونکې لوبې په ترتیب سره د سپتمبر میاشتې په ۱۷ یعنې د راتلونکې دوشنبې په ورځ او د پنجشنبې په ورځ یعنې سپتمبر په ۲۰ نیټه له افغانستان سره ترسره کړي. دا چې تمیم اقبال په دې لوبه کې ټپي دی، نو ډیر ګمان کیږي چې له افغانستان سره به په لوبه کې ګډون ونه کړي او په دې توګه به بنګله دیش خپل یو غښتلی لوبغاړی له لاسه ورکړي.
پر ورته موضوع زموږ له آرشیف څخه:
په آسیا کپ کې افغانستان له چا او کله لوبې لري؟
ټاکل شوې چې د ۲۰۱۸م کال آسیا کپ د سپتمبر میاشتې په ۱۵ نیټه د متحده عرب اماراتو په دوبۍ ښار کې پیل شي. په دې جام کې یو ځای لا هم خالي دی چې د کوالیفایر سیالیو ګټونکی به دغه ځای ډک کړي.
انځور: Getty Images/William Westد ۲۰۱۸م کال د آسیا کپ سیالیو مهالویش تائید شوی دی. تر اوسه پورې افغانستان، هندوستان، پاکستان، سریلانکا او بنګلدیش هغه هیوادونه دي چې په دې سیالیو کې برخه اخلي. په دې سیالیو کې یو خالي ځای به د متحده عرب اماراتو، سنګاپور، عمان، نیپال، مالیزیا او هانګانک ترمنځ د روانو سیالیو اتل ډک کړي.
د دې لوبو په الف ګروپ کې هندوستان، پاکستان او د روانو کوالیفایر سیالیو اتله لوبډه قرار لري. په ب ګروپ کې بیا سریلانکا، افغانستان او بنګله دیش دي.
د دې سیالیو لومړۍ لوبه د سپتمبر میاشتې په ۱۵ نیټه د متحده عرب اماراتو په دوبی ښار کې د بنګله دیش او سریلانکا ترمنځ وشي.
د سیالیو دویمه لوبه بیا د سپتمبر میاشتې په ۱۶ نیټه د پاکستان او د کوالیفایر سیالیو د اتل ترمنځ ترسره کیږي. تر اوسه د کوالیفایر سیالیو اتل لا معلوم نه دی.
د سپتمبر میاشتې په ۱۷ نیټه به افغانستان د خپلې لومړۍ لوبې له پاره د ابو ظبي په ښار کې له سریلانکا سره د لوبې میدان ته ووځي.
د سپتمبر میاشتې په ۱۸ نیټه بیا هندوستان په دوبی ښار کې د کوالیفایر سیالیو له اتل سره د لوبې میدان ته وځي.
د سپتمبر میاشتې په ۱۹ نیټه به د تیر کال سیالیو اتل یعنې هندوستان خپل بخت له پاکستان سره وازمويي.
د دې سیالیو په ګروپي سیالیو کې وروستی لوبه د سپتمبر میاشتې په ۲۰ نیټه د افغانستان او بنګله دیش ترمنځ پلان شوې ده. دغه لوبه د متحده عربي اماراتو په ابوظبي ښار کې پلان شوې ده.
د دې سیایلو سوپر فور یا د څلورو غوره لوبډلو لوبې بیا د سپتمبر میاشتې په ۲۱ نیټه پیلیږي. د سوپر څلور پړاو لومړۍ لوبه د الف ګروپ د ګټونکي او د ب ګروپ د دویم مقام لرونکي ترسره کیږي.
د سوپر څلور دویمه لوبه هم د سپتمبر میاشتې په ۲۱ نیټه د ب ګروپ د ګټونکي او د الف ګروپ د دویم مقام لرونکي ترمنځ ترسره کیږي.
د سوپر څلور د لړۍ دریمه لوبه د سپتمبر میاشتې په ۲۳ نیټه د الف ګروپ د ګټونکي او د الف ګروپ د دویم مقام ترمنځ ترسره کیږي.
د سوپر څلور پنځمه لوبه هم د سپتمبر میاشتې په ۲۳ نیټه د ب ګروپ د ګټونکي او د ب ګروپ د دویم مقام لرونکي ترمنځ ترسره کیږيږ
د دې لړۍ شپږمه لوبه د سپتمبر میاشتې په ۲۵ نیټه د الف ګروپ د ګټونکي او د بې ګروپ د ګټونکي ترمنځ ترسره کیږي.
د دې لړۍ وروستی او اومه لوبه بیا د سپتمبر میاشتې په ۲۶ نیټه د الف ګروپ د دوهم مقام لرونکې لوبډلې او د بې ګروپ د دویم مقام لرونکې لوبډلې ترمنځ ترسره کیږي.
د آسیا کپ پای لوبه بیا د سپتمبر میاشتې په ۲۸ نیټه د متحده عرب اماراتو په ابوظبي کې ترسره کیږي.
