له پلان سوو جرايمو سره د آلمان د مبارزې مرکزي ادارې او د دوسلدورف څارنوالۍ د جمعې په ورځ اعلان کړی دی چي «د څو ميلياردو ډالرو په ارزښت يې په لسونو ټنه کوکاين ضبط کړي دي».

چارواکو ويلي دي چي د کوکاينو دغه مقدار چي تر اوسه پوري يې سارۍ نه لاره تيرکال په هامبورګ بندر کي ضبط سوي ول، خو له رسنيو سره يې په اړه معلومات د جمعې په ورځ شريک کړل.

دا په آلمان کي د کوکاينو د کشف او ضبط تر ټولو ډېر مقدار دی. د آلمان د نورد راين ويستفالن ايالت د عدليې وزارت ويلي دي چي دا تقريباً ۳۵ ټنه کوکاين دي.

د دې موضوع په اړه تر مياشتو پوښتنو ګرويږنو وروسته، د آلمان په نورد راين ويستفالن، بايرن، براندنبورګ، هامبورګ، هسن او نيدرزاکسن ايالتونو کي تلاشۍ شوي او د ۷ کسانو د نيولو حکم صادر سوی دی.

هامبورګ بندري ښار اروپا ته د کوکاينو د راوړلو په ستر مرکز بدل سوی دی. هامبورګ په آلمان کي تر ټولو ستر او په اروپا کي دريم ستر بندر بلل کيږي چي د ورځي ۲۳ زره کانتينره ورته راځي او ترې وځي.