په يوه ۲۸ ثانيه يي ويډيويي فلم کي ښکاري چي څنګه د دوسلدورف د ښار پوليس د شنبې په ماښام د يوه ۱۵کلن هلک پر سر چي پر مځکه پروت دي، فشار راوړي.
د نوردراين وستفالين ايالت داخله وزير هربرت رويل په ډيري انديښنې سره ويلي چي ددغي ويډيو له لومړنۍ لحظې څخه يې سخت ټکان خوړلي دي.
اوس ددغي ويډيو خپريدل چي په امريکا کي د تورپوستي جورج فلويد په وړاندي د پوليسو چلند ته ورته ده، سخت جنجالونه راپورته کړي.
د پلټونکو په خبره په دغه ويديو کي چي تيره هفته په چټکۍ سره په ټولنيزو رسنيو کي خپره سوه، ليدل کيږي چي څنګه يو ۱۵ کلن ځوان په تړلو لاسونو پر مځکه پروت دی، يو پوليس يې پرملا او هغه بل يې پر سر باندي ګونډه وهلې ده. د ويديو شاته چي ښايي د فلم اخيستونکي ږغ وي، اوريدل کيږي چي، زنګون دي ايسته کړه، وروره دا کومه شوخي نه ده!
د جرمني د نوردراين وستفالين ايالت داخله وزير رويل ددغي ويديو تر ليدو وروسته سمدستي وويل چي «ماهم سخت ټکان وخوړ» او امر يې وکړ چي ژر تر ژره دي موضوع وڅيړل سي. د هغه په خبره د شنبې په ماښام پوليسو په يوه رستوران کي د بلواکوونکو له يوې حملې څخه خبر ترلاسه کړی وو، دغه ۱۵ کلن هلک که څه هم په هغو کي شامل نه وو خو په خپله يې مداخله وکړه او له پوليسو سره په فزيکي شخړه کي راښکيل سو.
پر يوې المانۍ پوليسي د يوه مهاجر د جنسي تيري هڅه
د څو تنو د څرګندونو او لومړنيو پلټنو پر اساس هغه په خپله پوليسو ته ښکنځل کول او وروسته يې پر هغو حمله وکړه.
رويل ويلي چي د پوليسو د عملياتو په چوکاټ کي د يوه سړي پر غاړه باندي فشار ورکولو ته اجازه نه ورکول کيږي له همدې کبله بايد موضوع په دقيق ډول وڅيړل سي.
د څارنوالۍ په حواله اوس ددغه پوليس په وړاندي د شکنجې په تور پلټني پيل سوي دي. همدارنګه پر دغه ځوان هم تور لګول کيږي چي پوليسو ته يې توهين کړی دی او پر هغو يې فزيکي حمله کړې ده. د رپوټونو په حواله دواړوو خواته ته جسمي تاوان نه دي رسيدلي.
د دغي ويديو تر خپريدو وروسته مخالفو خواوو هم غبرګونونونه ښودلي. د سوسيال ديموکرات ګوند ځينو غړو ويلي دي: «موږ هيله من وو چي جورج فلويد ته ورته تصويرونه هيڅکله په آلمان کي خپاره نه سي.» له زرغون ګوند څخه د داخلي چارو کارپوهي ويريانا شيفر په خپل تويتر کي ليکلي: «دا چي يو پوليس په خپل زنګانه سره د يو چا پر غاړه يا ملا باندي چي پر مځکه پروت وي فشار راوړي، مناسب چلند نه دي.»
له بلي خوا د نورد راين وستفالين ايالت د پوليسو د اتحاديې مشر تر يوه حده د پوليسو په ملاتړ وايي چي د پوليسو دغه ډول چلند د څيړني وړ دی، خو هيچاته دا حق نه ورکول کيږي چي مخکي له مخکي قضاوت وکړي.
زموږ له آرشيف څخه:
په آلمان کي د افراطي مسلمانانو له خوا د «شریعت پولیسو» جوړول
په آلمان کې یو شمیر سلفي مسلمانانو داسي کمیسان اغوستي ول چې ورباندې د Sharia Police یا د شریعت پولیس عبارت لیکل شوی وو. هغوی د آلمان په اوپرتال ښار کې گرځیدل او په خپله خبره یې ځوانان اسلام ته دعوتول.
انځور: Shariah-Polizei-Germany/Facebookیو شمیر افراطي سلفي مسلمانانو د آلمان په اوپرتال ښار کې د شپې له خوا تگ راتگ کاوه او په خپله خبره يې ځوانان اسلام ته رابلل. هغوی د نارنجي رنگ کمیسانو په اغوستلو سره ځان پولیسو ته ورته کاوه. دا کار د آلمان د پولیسو له پاره د منلو وړ نه وو.
د هغوی پر کمیسانو باندي د Sharia Police عبارت لیکل شوی وو. هغوی د شپې له خوا ځوانان درول او د اسلام په اړه يې معلومات ورکول.
د بېلگې په توگه دغه کسان د شپې له خوا ځوانان دروي او ورته دیسکو ته د نه تلو سپارښتنه کوي. پر دې سربیره دغه سلفیان پلورنځایونو ته ننوتلي ول او پیریدونکو ته یې په خپله خبره اسلامي قوانین تشریح کړي ول.
دغو کسانو د خپلو فعالیتونو په اړه په انترنت کې یوه لنډه ویدیو خپره کړې ده. دغه افراطي وگړي د ۱۹ او ۳۳ کلونو تر منځ عمر لري.
دغې ډلې د خپلو فعالیتونو انځورونه هم خپاره کړي دي.
د آلمان د اوپرتال پولیسو د ښار په مرکز کې خپل حضور ډیر کړی دی او پر خلکو یې غږ کړی دی چې د شکمنو کسانو د لیدو په صورت کې پولیسو ته خبر ورکړي.
د اوپرتال د پولیسو مشر ویلي دي: «په آلمان کې واک یوازي د دولت په لاس کې دی. د خلکو ویرول او هڅول د تحمل وړ نه دي.»
د آلمان د کورنیو چارو وزیز توماس دمزیر، هم په دې اړه غبرگون ښوولی وو. هغه ویلي ول: «د آلمان په خاوره کې شریعت د منلو وړ نه دی. هیڅوک د دې حق نه لري چې د آلمان د پولیسو له نوم څخه ناوړه گټه پورته کړي.»
په عین حال کې آلماني سیاستوالو پر دې باندي ټینگار کړی دی چې د قانون پلي کول یوازي د حکومت په واک کې دي.
د اوپرتال ښار په آلمان کې د سلفیانو مرکز بلل کیږي. د آلمان په نورد راین ویستفالن ایالت کې د سلفیانو شمیر ۱۸۰۰ تنو ته رسیږي.
سلفیانو هغه مهال اعلان کړی وو چې د اوپرتال په څیر عملیات به د آلمان په نورو ښارونو کې هم ترسره کړي.
د آلمان د اساسي قانون د ملاتړ فدرالې ادارې مشر گئورگ ماسن، له بیلد ورځپاڼي سره په مرکه کې ویلي ول چې سلفیان له ځانه سره د داسي شعارونو د لېږدولو حق نه لري چې د نورو پر وړاندې نفرت خپور کړي.
ویل کیږي چې آلماني پولیس له ډیري مودې راهیسې سلفیان تر نظر لاندي لري.
له بلي خوا یو شمیر افراطي آلماني مسلمانان لا وختي سوریې ته د تندلارو اسلامپالو ډلو تر څنگ د جگړې په موخه تللي دي.
په آلمان کې اوس د هغو کسانو د برخلیک په اړه خبري رواني دي چې د سوریې له جگړې څخه بیرته دې هیواد ته راستنیږي.
