د آلمان امنيتي چارواکي وايي چې په دغه هيواد کې داسې اسلام پاله افراطيان ډير دي چې کولای شي يو تروريستي ګواښ وي.
د پوليسو او امنيتي ادارو (د اساسي قانون ساتونکې اداره) په آند، شاوخوا ۲۲۲۰ کسان، افراطي اسلام پاله د تعصباتو په لرلو تروريزم ته معتقد دي. يو کال مخکې د دغو کسانو شمير شاوخوا ۱۷۰۰ اټکل کيده.
د آلمان د داخلي امنيت د ادارې مشر، هانس ګئورګ ماسن، د «اسلامپاله تروريزم» د خطر کچې لوړيدو ته په کتو وايي چې دغه اداره په پام کې لري تر څو افراطي اسلامپاله فعالان مخکې له مخکې تر خپل څار لاندې ونيسي.
د هغه په وينا، د «خطرناکو» افرادو سربيره، کوم چې تروريستي کړنو ته چمتوالی لري، هغه کسان چې په دغه برخه کې فعال دي هم تر نظارت لاندې نيول کيږي.
د امنتي ادارې مشر وايي چې د «افراطي اسلامپالو» د شمير لوړيدل، کيدای شي د دغې ادارې د لا ډيرو او کره اطلاعاتو د لرلو پايله وي.
د آلمان د داخلي امنيت د ادارې مشر، هانس ګئورګ ماسنانځور: picture-alliance/dpa/M. Kappeler په لومړي ځل په آلمان کې د شاوخوا ۱۱۲۰۰ کسانو چې د سلفي ډلو پلويان دي، د مشخصاتو په اړه يو کره نوملړ چمتو شوی دی. ترلاسه شويو اطلاعاتو څخه داسې ښکاري چې د سلفي ډلو ۲۷ سلنه پلويان د ۲۵ کلونو څخه ښکته او ۳۸ سلنه نور بيا د ۲۶ او ۳۵ کلونو تر منځ عمرونه لري.
د آلمان د امنيتي ادارې په وينا، په سلفيانو کې يوازې ۱۲ سلنه يې ښځې تشکليوي. د همدې آمارو له مخې، ۹۰ سلنه افراطي افراد، مهاجرتي ريښې لري.
که څه هم يو شمير سلفيان تاوتريخوالو لور ته ميلان لري، خو له دې سره سره دغه ډله د مستقيمو تروريستي ګواښونو له بابته خطرناکه نه ده.
له آرشيف څخه يو انځوريز البوم:
په آلمان کي د افراطي مسلمانانو له خوا د «شریعت پولیسو» جوړول
په آلمان کې یو شمیر سلفي مسلمانانو داسي کمیسان اغوستي ول چې ورباندې د Sharia Police یا د شریعت پولیس عبارت لیکل شوی وو. هغوی د آلمان په اوپرتال ښار کې گرځیدل او په خپله خبره یې ځوانان اسلام ته دعوتول.
انځور: Shariah-Polizei-Germany/Facebookیو شمیر افراطي سلفي مسلمانانو د آلمان په اوپرتال ښار کې د شپې له خوا تگ راتگ کاوه او په خپله خبره يې ځوانان اسلام ته رابلل. هغوی د نارنجي رنگ کمیسانو په اغوستلو سره ځان پولیسو ته ورته کاوه. دا کار د آلمان د پولیسو له پاره د منلو وړ نه وو.
د هغوی پر کمیسانو باندي د Sharia Police عبارت لیکل شوی وو. هغوی د شپې له خوا ځوانان درول او د اسلام په اړه يې معلومات ورکول.
د بېلگې په توگه دغه کسان د شپې له خوا ځوانان دروي او ورته دیسکو ته د نه تلو سپارښتنه کوي. پر دې سربیره دغه سلفیان پلورنځایونو ته ننوتلي ول او پیریدونکو ته یې په خپله خبره اسلامي قوانین تشریح کړي ول.
دغو کسانو د خپلو فعالیتونو په اړه په انترنت کې یوه لنډه ویدیو خپره کړې ده. دغه افراطي وگړي د ۱۹ او ۳۳ کلونو تر منځ عمر لري.
دغې ډلې د خپلو فعالیتونو انځورونه هم خپاره کړي دي.
د آلمان د اوپرتال پولیسو د ښار په مرکز کې خپل حضور ډیر کړی دی او پر خلکو یې غږ کړی دی چې د شکمنو کسانو د لیدو په صورت کې پولیسو ته خبر ورکړي.
د اوپرتال د پولیسو مشر ویلي دي: «په آلمان کې واک یوازي د دولت په لاس کې دی. د خلکو ویرول او هڅول د تحمل وړ نه دي.»
د آلمان د کورنیو چارو وزیز توماس دمزیر، هم په دې اړه غبرگون ښوولی وو. هغه ویلي ول: «د آلمان په خاوره کې شریعت د منلو وړ نه دی. هیڅوک د دې حق نه لري چې د آلمان د پولیسو له نوم څخه ناوړه گټه پورته کړي.»
په عین حال کې آلماني سیاستوالو پر دې باندي ټینگار کړی دی چې د قانون پلي کول یوازي د حکومت په واک کې دي.
د اوپرتال ښار په آلمان کې د سلفیانو مرکز بلل کیږي. د آلمان په نورد راین ویستفالن ایالت کې د سلفیانو شمیر ۱۸۰۰ تنو ته رسیږي.
سلفیانو هغه مهال اعلان کړی وو چې د اوپرتال په څیر عملیات به د آلمان په نورو ښارونو کې هم ترسره کړي.
د آلمان د اساسي قانون د ملاتړ فدرالې ادارې مشر گئورگ ماسن، له بیلد ورځپاڼي سره په مرکه کې ویلي ول چې سلفیان له ځانه سره د داسي شعارونو د لېږدولو حق نه لري چې د نورو پر وړاندې نفرت خپور کړي.
ویل کیږي چې آلماني پولیس له ډیري مودې راهیسې سلفیان تر نظر لاندي لري.
له بلي خوا یو شمیر افراطي آلماني مسلمانان لا وختي سوریې ته د تندلارو اسلامپالو ډلو تر څنگ د جگړې په موخه تللي دي.
په آلمان کې اوس د هغو کسانو د برخلیک په اړه خبري رواني دي چې د سوریې له جگړې څخه بیرته دې هیواد ته راستنیږي.
