دا معلومات د آلمان حکومت د پارلمان د کيڼ اړخو د جناح د يوې اړوندې پوښتنې په ځواب کې شريک کړي دي. په دې ترڅ کې زياته شوې چې د روان ميلادي کال په لومړيو نهو مياشتو کې د تېر کال د همدې مودې په پرتله دا ډول ډېرې پېښې ثبت شوي دي.
د معلوماتو په حواله د روان ۲۰۲۳م کال په دريو ربع کې پر کډوالو او پناه غوښتونکو او د هغوی پر سرپناو ۱۵۱۵ بريدونه شوي دي، په داسې حال کې چې د ۲۰۲۲م کال په همدې موده کې د دې ډول بريدونو شمير ۱۳۷۱ وو.
د هغه احصايې پر اساس چې د آلمان خبري آژانس «ډي پي ای» ته رسېدلي، هغه بريدونه چې په ترڅ کې یې د مهاجرو يوه سرپناه د سياسي انګیزه لرونکي بريد هدف ګرځيدلي وي، د روان کال په دريمه ربع کې ۳۰ برابره ډير ول.
له دې بريدونه څخه یې درې په اصطلاح د زور زياتي پېښې يا سنګين جرمونه ول. پر سرپناو ډېر بريدونه، يعني ۲۳ جرمونه پولیسو په ښی اړخو پورې تړلي دي.
د پوليسو په وينا د سياسي انګیزه لرونکو هغو ۴۱۷ بريدونو څخه یې چې په دې موده کې د سرپناو دباندې په نورو ساحو کې پر پناه غوښتنونکو او مهاجرو شوي دي، هم ښی اړه انګیزه لرونکي جرمونه دي.
د پوليسو په حواله له دې بریدونو څخه یې ۱۹ د «خارجي ايديالوژۍ» پديدې ساحه کې راځي لکه د مثال په توګه پر کردانو او يا پي کې کې ګوند سره پر تړاو لرونکو. همدا راز پر پناه غوښتونکو او مهاجرو له بريدونو څخه دوو یې کيڼ اړخه انګیزه درلودله.
د يو شمير قضيو شاليد روښانه نه دی. په ټولیزه توګه ۵۵ قضيو کې بيا د زور ښکاره کولو مهم نقش درلود.
د آلمان پارلمان د کيڼ اړخو استازې کلاره بيونګر، وويل: «په آلمان کې واقعاً پر راکډه شويو بريدونه کيږي، سپکاوې یې کیږي او دښمني ورسره پالل کیږي.»
نوموړې وويل چې فدرالي حکومت او ایالتونه بايد ژر تر ژره د کډوالو د ساتنې طرحې رامنځته او عملي کړي. د بيونګر په نظر په دې وروستیو کې د کډوالو پر وړاندې د تاوتريخوالي د زياتوالي علت د پناه غوښتنې په تړاو د حکومت تازه بحثونه دي.
د نوموړې په آند دا څه «پر سړکونو د توکمپالنې انګیزه لرونکو تحرکاتو او د کډوالو پر وړاندې تاوتريخوالي ته زمينه برابروي.«
ب. ص/ ن. ز (dpa)
زموږ له آرشيف څخه:
هغه څه چې د آلمان تابعيت د ترلاسه کولو له پاره پرې بايد وپوهيږئ
د المان حکومت په پام کې لري، چې بهرنيانو ته د تابیعت ورکړه اسانه کړي. د حکومت پروګرام څه دی؟ اوسمهال د المان د تابیعت ترلاسه کولو بهیر څنګه دی؟ د انځورونو په دې البوم کې دغو پوښتنو ته ځواب موندلی شئ:
انځور: Winfried Rothermel/picture allianceاوس مهال د المان تابعیت څنګه ترلاسه کیږي؟
اوسمهال هغه کسان د المان تابعیت ترلاسه کولی شي، چې په دې هېواد کې یې اته کاله ژوند کړی وي او دایمي اقامت ولري. پر دې سربېره دا شرائط یې هم بايد پوره کړي وي: د الماني ژبې سره بلدتیا ( معمولآ د ب ۱ په کچه)، د ژوند لګښتونه یې په خپلواکه توګه تمویل کړی وي او د تابعیت ازموينې کاميابې کړي وي.
له اتو کلونو څخه په لږ وخت کې د تابعیت ترلاسه کول؟
هو، ممکنه ده، خو دا خپل ځانګړي شرایط لري. د اوسنیو قوانینو له مخې هر هغه څوک چې د ادغام په برخه کې ښې لاسته راوړنې ولري، لکه د ژبې او مسلکي زده کړو برخه کې یې ډېر پرمختګ کړی وي، کولی شي چې له شپږو او اوو کلونو وروسته د تابعیت غوښتنه وکړي. هر هغه څوک چې الماني پاسپورت په لاس راوړي، د المان د تبعه په توگه له ټولو حقوقو او همدا راز مکلفیتونو څخه برخمن کیږي.
د المان ایتلافي حکومت کوم بدلونونه په پام کې لري؟
د آلمان ایتلافي حکومت د ایتلافي تړون پرمهال توافق کړی و، چې د تابعیت ورکړې په برخه کې به خنډونه را کم کړي. له دې جملې څخه حکومت په پام کې لري، چې د خارجيانو له پاره د تابعيت ترلاسه کولو د اتوو کلونو اقامت د اړتيا موده اوس پنځوو کلونو ته راټيته کړای شي. دا هم په نظر کې ده چې د هغو کسانو له پاره چې د ادغام په برخه کې ښې لاسه راوړنې لري، دا موده دریو کلونو ته راکمه کړي.
هغه شرایط چې بدلون نه کوي
د المان فدرالي حکومت په پام کې نه لري، چې د الماني تابعیت په برخه کې نور اساسي شرایط بدل کړي. لکه د الماني ژبې سره کافي بلدتیا او د ژوند لګښتونو برابرول. البته، د هغو کسانو په اړه چې د « کاري کډوالو نسل» بلل کیږي، د دوه ګوني تابعیت د اجازې په اړه بدلون په پام کې دی.
آيا د پخواني تابعيت ساتل امکان لري؟
اوس مهال، قانون حکم کوي چې هر هغه څوک چې د آلمان تابعیت ترلاسه کوي باید «په اصولو کې» خپل پخوانی تابعیت پریږدي. مګر دا اصل په ډیری قضیو کې نه پلي کیږي، د بیلګې په توګه د اروپایي اتحادیې د غړو هیوادونو د اتباعو او د هغو هیوادونو اتباعو په برخه کې چې خپلو وگړو د تابعیت پریښودلو اجازه نه ورکوي.
ایا افغانان کولی شي، چې خپل اصلي تابعیت وساتي؟
اوسمهال د ۲۵ هېوادونو اتباع کولی شي، چې د الماني پاسپورټ په ترلاسه کولو سره خپل اصلی تابعیت هم وساتي، چې د افغانستان، ایران او سوریې اتباع هم په دې کې شامل دي. تېر کال اوکراين هم په دغو هېوادونو کې شامل شو، ځکه چې په دغه هېواد کې د جګړې له امله د تابعيت پرېښودل له اداري پلوه ناشوني دي.
د دوه ګوني تابعیت په اړه وړاندیز شوی بدلون
د المان د کورنیو چارو وزارت په وینا، د لومړي تابعیت د ساتلو په برخه کې د دغو استثناوو له امله، په ۲۰۲۱ کال کې د هغو کسانو دوه پر درېیمه برخه يعني ۶۹ فيصده چې د المان تابعیت یې اخیستی، خپل لومړنی تابعیت یې ساتلی دی. د آلمان ایتلافي حکومت پلان لري چې په عامه توګه د دوه ګوني تابعیت اجازه ورکړي.
هر کال څومره کسان د آلمان تابعيت ترلاسه کوي؟
د هغو کسانو شمير چې د المان تابعيت ترلاسه کوي، په دغه هیواد کې د میشتو بهرنیانو د شمیر په پرتله ډیر کم دی. د بېلګې په توګه، په ۲۰۲۱ کال کې د هغو بهرنیانو يوازې ۲،۴۵ سلنه یې چې لږ تر لږه ۱۰ کاله یې په جرمني کې ژوند کړی، د دغه هېواد تابعیت ترلاسه کړی دی. په دې عکس کې د آلمان ولسمشر فرانک والتر شټاین مایر لیدل کیږي، چې یوې میرمنې ته یې د المان د تابعیت سند ورکړی دی.
د المان تابعيت ته د تقاضا ډېروالی
د آلمان د فدرالي حکومت د شمیرو له مخې په ۲۰۲۱ کال کې ۱۳۱ زره او ۵۹۵ بهرنیانو د المان تابعیت ترلاسه کړی چې دا د تیر کال په پرتله ۲۰ سلنه زیاتوالی ښيي. د دې زیاتوالي لامل په عمده توګه د سوريايي کډوالو ډېر شمېر دی چې له ۲۰۱۵ وروسته آلمان ته راغلل. په ټولنه کې د ښه ادغام له امله یو زیات شمیر سوریایي کډوال توانیدلي، چې له شپږو کلونو وروسته د دالمان تابعیت ترلاسه کړي.
