د اسیا د کاتولیکانو د اتحادیې د خبري آژانس «یوکا نیوز» د یوه رپوټ پر اساس د هندوستان د اترپردیش د ایالتي عالي محکمې قاضي د خپل حکم د صادرولو په پريکړه کې دا دلیل راوړی دی، چي اذان د «اسلام یو نه جلاکیدونکئ جزء دی» خو د لوډسپیکرونو د لاري بیا داسي نه ده. هغه ویلي دي، چي که اذان د لوډسپیکرونو له لاري پخش سي، نو د ښار هغه اوسیدونکي، چي مسلمانان نه دي او اذان ته غوږ نه نیسي، هم مجبوره دي هغه واوري. قاضي ویلي، چي دغه ډول یو څه په اساسي قانون کي د اتباعو د »اساسي حقونو« سره په ټکر کي راځي.
د هندوستان د اسلامي ټولني یو تن همدې خبري آژانس ته ویلي دي، چي «زما او نورو دپاره دا ډیره ټکان ورکونکې ده، چي عالي محکمه دي دا ډول یو حکم صادر کړي.» دا هم پداسي حال کي چي د اترپرديش د ۲۰۰ میلیونو اوسیدونکو څخه یې ۴۰ ملیونه مسلمانان تشکیلوي، یعني هر پنځم تن یې مسلمان دی.
د کاتولیکي عیسویانو د تبلیغي ټولني (میسیونر) څخه پوشپا انبو هم «یوکانیوز» خبري آژانس ته ویلي دي، چي د محکمې دغه حکم د دیموکراتیک هندوستان په ګټه نه دی. هغه اضافه کړي، چي په هر دین او مذهب کي داسي اعمال او کردارونه موجود دي، چي د قوانینو یا اساسي قانون تر چوکاټ لاندي نه دي، «خو دا پدې معنی نه ده، چي هغه دي بند سي.»
که څه هم د هندوستان اکثریت اتباع هندواڼ او هندو مذهبه تشکیلوي، خو دغه هیواد د ۱۷۰ میلیونو مسلمانانو په درلودلو سره تر اندونیزیا او پاکستان وروسته په دنیا کي د مسلمانانو دوهم لوی نفوس تشکیلوي. د مسلمانانو نیمايي برخه په اترپرديش، غربي بنګال او بیهار کي ژوند کوي.
د هندوستان د بهارتيه جنتا گوند نشنلستي حزب، چي د هندوستان مرکزي حکومت په اختیار کي لري، د اترپردیش په ایالت کي هم حکومت کوي. پر دغه حزب دا تور لگول کيږي چې غواړي د افراطي هندوانو د سیاسي اړخ په حیث دغه هیواد په یوه هندو مذهبه هیواد تبدیل کړي، چي د اقلیتونو حقوق به پکښي خوندي نه وي او لږ ځای به ولري.
MQ/BS (KNA)
زموږ له آرشيف څخه:
تر ټولو لوی د مسلمانانو ټاټوبی به وګرځي کوم هيواد؟
تر ۲۰۵۰ پوري به دغه هيواد د نړۍ تر ټولو لوی د مسلمانانو نفوس لرونکی هيواد وګرځي. د امريکايي مرکز (PEW) د يوې څېړنې له مخي به په دغه هيواد کي د مسلمانانو شمېر ۳۱۱ مليونو ته ورسيږي. په هکله يې انځوريز راپور دلته وګورئ:
انځور: AFP/Getty Images/W. Kohsar
زيات مسلمان نفوس لرونکي هيوادونه
دمګړی اندونيزيا تقريبا ۲۰۴ مليونه، پاکستان ۱۷۸ مليونه، هند ۱۷۲ مليونه، بنګله دېش ۱۴۵ مليونه او نايجيريا ۷۵ مليونه، ايران ۷۴ مليونه، ترکيه ۷۴ مليونه، مصر ۷۳ مليونه، الجزاير ۳۴ مليونه، مراکش ۳۲ مليونه، عراق ۳۱ مليونه، سودان ۳۰ مليونه، سعودي ۳۰ مليونه او افغانستان ۲۹ مليونه مسلمانان لري. [ ترتيب کوونکی: احمدولي اڅکزی]
انځور: Getty Images/AFP/D. Sarkar
په مستقبل کي تر ټولو زيات
دمګړی د تر ټولو زياتو مسلمانانو ټاټوبی د اندونيزيا هيواد دی. خو د امريکايي فکر خونې (PEW) د يوې څېړني پايلي ښيي چي تر ۲۰۵۰ کال پوري به د هندي مسلمان وګړو شمېر ۳۱۱ مليونو انسانانو ته جګ سي. هغه وخت به د هند مسلمانان د نړۍ د ټولو مسلمانانو ۱۱ فيصده او په دې توګه په يو هيواد کي تر ټولو زياته برخه وي. تر ۲۰۵۰ پوري به په هند کي د هندوانو شمېر ۱۳۰۰ مليونو ته جګ سي.
انځور: Fotolia/Tjui Tjioe
د نفوس زياتېدنه
په هند کي د ماشومانو د زېږېدنې د لوړي شرحي له کبله په دغه هيواد کي د ځوانانو او منځني عمر لرونکو فيصدي زياته ده. د هند د مسلمانانو له نفوس څخه ميديان (رياضي) عمر ۲۲ کاله دی. حال دا چي د هندوانو ۲۶ او د هندي عيسويانو ميديان عمر ۲۸ کاله دی.
انځور: picture-alliance/ANP/R. Vos
اوسط اولادونه
په هند کي هره مسلمانه ښځه اوسط ۳،۲ ماشومان زېږوي، حال دا چي هندو مېرمني اوسط ۲،۵ ماشومان راوړي. د هند په مسيحي ښځو کي هره مېرمنه اوسط ۲،۳ ماشومان زېږوي.
انځور: AP
د نفوس برخه
په هند کي د مسلمانانو په نفوس کي په دوامداره توګه اضافه سوې ده. په ۲۰۱۰ کال په هند کي د مسلمانانو نفوس د ټول هيواد ۱۴،۴ فيصده ؤ. خو اټکل کيږي چي په هند کي به تر ۲۰۵۰ پوري د مسلمانانو د نفوس فيصدي و ۱۸،۴ فيصدو ته جګه سي. خو د هغه باوجوده به په دغه هيواد کي د هرو څلورو وګړو څخه ۳ هندوان وي.
انځور: Sajjad Hussain/AFP/Getty Images
مسيحيان
د (PEW) د څېړني له مخي به په هند کي تر ۲۰۵۰ کال پوري د مسيحيانو فيصدي کمه سي. په داسي حال کي چي دمګړی د هند د نفوس ۲،۵ فيصده مسيحيان دي، تر ۲۰۵۰ پوري به دغه فيصدي و ۲،۳ ته راټيټه سي.
انځور: P. Bronstein/Getty Images
د هندوانو شمېر
د يادي څېړني له مخي اټکل سوی چي تر ۲۰۵۰ کال پوري به په هند کي د هندوانو شمېر دومره زيات سي، چي که د هند، پاکستان، اندونيزيا، نايجيريا او بنګله دېش ټول مسلمان نفوس سره يوځای کړل سي، نو بيا به هم د هندي هندوانو شمېر باندي زيات وي.
انځور: Getty Images/AFP/STR
په لوړه اندازه زياتېدنه
د دغې څېړني له مخي په نړۍ کي د مسلمانانو نفوس د نورو ټولو په پرتله په چټکۍ مخ په زیاتېدو دی. د (PEW) راپور له مخي د نړۍ د نورو انسانانو په پرتله به په راتلونکي کي هم د مسلمانانو شمېر تر ټولو په زيات سرعت مخ په زیاتېدو وي.
انځور: AP
افغانستان
د افغانستان نفوس تقريبا ۲۹ مليونه اټکل کيږي چي ۹۹،۸ يې مسلمانان دي. په دې توګه د افغانستان د مسلمانانو د زيات نفوس لرونکو هيوادونو په ليسټ کي ۱۴ مقام لري. [د دغه انځوريز مطلب معلومات د pewresearch.org له پاڼي څخه د ۲۰۱۷ کال د مارچ په ۴مه نېټه اخيستل سوي. ترتيب کوونکی: احمدولي اڅکزی]
