د جنورۍ میاشتې له لومړۍ نیټې څخه د نوامبر مياشتي تر ۱۹ نیټې پوري په افغانستان کې ۳۴۳۹۵۸ افغانان د جګړو له کبله دې ته اړ شوي دي چې خپل ټاټوبي پریږدي. دغه رپوټ د ملګرو ملتونو د بشري مرستو همغږي کوونکي دفتر د دوشنبې په شپه خپور کړی دی.
د رپوټ له مخې د افغانستان شمالي سيمه چې پخوا په نسبي توګه آرامه ګڼله کیده د جګړې د بې ځایه شوو کسانو ۳۲ سلنه له دغه سیمې سره تړاو لري.
دغه رپوټ چې تل په منظم ډول خپریږي او د جګړو په هکله جزئیات رانغاړي د بیلګې په توګه پکښې کندز ولایت یاد شوی دی چې یوازي په تیره اوونۍ کې پکښې د بې ځایه شوو کسانو شمیر ۱۶۰۰۰ ښوول شوی دی.
تر ۲۰۱۳م کاله پوري په کندز ولایت کې آلماني سرتیري مستقر وو او اوس هم آلماني ځواکونه په مزار شریف کې په یوه ستره پوځي اډه کې حضور لري.
د رپوټ له مخې په تیر میلادي کال کې تر۶۶۰ زرو ډیر افغانان له خپلو کلیو تښتیدلي وو. دا په داسې حال کې ده چې ملګرو ملتونو اټکل کاوه چې د ۲۰۱۷م کال په پیل کې به د هغو کسانو شمیر چې په جبري توګه د خپلو کورونو پریښوولو ته اړ شوي ۴۵۰ زرو کسانو ته ورسیږي.
په ورته موضوعو زمو له آرشیف څخه د انځورونو ګالري:
بې ځایه شویو ښځو د خپلو زیوراتو په پیسو رستورانت جوړ کړی
ځينو کوڼدو میرمنو چې د کندز په جګړه کې یې خپل مړونه له لاسه ورکړي او هرات ته تښتیدلي دي، اوس د خپل ژوند د لګښتونو پوره کولو له پاره یو رستورانت جوړ کړی دی. هغوی د خپلو زیوراتو په پلورلو سره دغه رستورانت پرانیستی دی.
انځور: Tanhaیو شمیر کندزي میرمنو چې د کندز په جګړه کې یې خپل مړونه له لاسه ورکړي دي، په هرات ولایت کې خپل زیورات پلورلي او رستورانت یې پرانیستی دی.
دغو میرمنو خپل رستورانت «هریوا» نومولی دی. هریوا د هرات ولایت د پخوانیو نومونو څخه یو دی.
په دې رستورانت کې لس میرمنې خواږه او د افغانستان د شمال خواړه پخوي.
په دې رستورانت کې ښځې د سهار له اتو بجو څخه بیا د شپې تر ۱۲ بجو پورې کار کوي. ځینې خو یې خپل ماشومان هم له ځان سره راولي.
دغه نجلۍ د کندز د جګړو له کبله له ښوونځي پاتې وه خو اوس په هرات کې زده کړې کوي. هغه د ښوونځي تر څنګ په رستورانت کې له خپلې مور سره مرسته کوي.
دغه میرمنې چې ډیري یې کونډې دي، وایي د رستورانت له لارې د خپل ژوند یوه برخه لګښتونه پوره کوي.
میرمن صفیه محیطي د دې رستورانت مسوولیت پر غاړه لري. هغه وایي چې تر اوسه پورې یې له دولت څخه هیڅ ډول مرسته نه ده ترلاسه کړې.
میرمن محیطي وايي چې که کار یې ښه پر مخ ولاړ شي نو د ښځو د فیزیوتراپي او لاسي صنایعو بخش به هم رامنځ ته کړي.
د رستورانت مسوولان وایي چې د لګښتونو د پوره کولو له پاره یې خپل زیورات وپلورل او پور یې واخیست ترڅو دغه ځای پرانیزي.
د رستورانت ډیری پیریدونکي هغه کورنۍ دي چې خواړه خپل کور ته وړي. ډیر کم داسې کسان شته چې دې رستورانت ته د ډوډۍ خوراک له پاره راځي.
دغه میرمني وايي چې د بازار موندنې په برخه کې مرستې ته اړتیا لري. د رستورانت مسووله وایي چې که کار یې ښه پر مخ ولاړ شي نو نورو بیځایه شویو میرمنو ته هم کار ورکولی شي.
