پوليسو له يوه اورګاډي څخه چې ايټاليا څخه اتريش ته په لاره وو، د دوو مهاجرو مړي راوښکلي دي. له هغو څخه دريم کس کلک ټپي دی چې اوس په روغتون کې تر درملنې لاندې دی. ګمان دی چې دغو مهاجرو غوښتل تر څو په اورګاډي کې په پټه ځانونه آلمان ته ورسوي.
د تيرول سيمې پوليسو ويلي دی چې له اورګاډي څخه يې د يوې ښځې او يوه نارينه جسدونه راوښکلي دي. ويل کيږي چې دغو کسانو به په احتمالي توګه غوښتل خپل ځانونه آلمان ته ورسوي. د پوليسو په وينا له قربانيانو سره دريم کس کلک ټپي دی چې اوس په روغتون کې تر درملنې لاندې دی.
پولیس ګمان کوي چې دغو کسانو به په سر لوڅي اورګاډي کې ځانونه پټ کړي وي او د سړې هوا له وجې به مړه شوي وي. تر اوسه مالومه نده چې دا کسان د کوم هيواد اتباع دي.
د پولیسو پر وينا دغو کسانو د اورګاډي تر چالانيدو او حرکت کولو وروسته يوازې شل دقيقې وخت لرود تر څو په کې سپاره شي. د پولیسو يوه وياند وويل: « دا چې هغوي په هغه ځای کې بند پاتې وو، نو مونږ فکر کوو چې ښايي د سړې هوا په نتيجه کې به بې هوشه شوي وي او يا به يې د مخه ژوند له لاسه ورکړي وو».
له بل لوري د هسپانيا سمندري ځواکونو، په يوه تازه اقدام کې په مديترانه سمندرګي کې ۷۲ تنه مهاجر له ډوبيدو څخه ژغورلي دي. دغه کسان په درو جلا جلا قايقونو کې ځاي پر ځای شوي ول چې غوښتل یې اروپايي هيوادونو ته ځانونه ورسوي.
د مهاجرت نړيوالې ادارې تر دې مخکې ويلي وو چې په ۲۰۱۵ کال کې ۳۸۵۰ تنه مهاجر د مديترانې سمندرګي له لارې توانيدلي ول چې خپل ځانونه هسپانيې ته ورسوي. د دغې ادارې پر وينا نور مهاجر بيا د مليليه او سئوتا له لارو خپل ځانونه دغه هيواد ته رسولي دي.
تيرکال د ۱۱۶۰۰ تنو څخه زيات کسان د مديترانې سمندرګې له لارې اروپا د تلو پر وخت اوبو کې د ډوبيدو له امله مړه شوي ول.
پر ورته موضوع یو انځوريز البوم زموږ له آرشيف څخه (16.03.2016):
له ايدوميني د مهاجرو تېښته ـ «وهل ټکول او سوځل»
د دوشنبې په ورځ تر ۲۰۰۰ زياتو مهاجرو له ايدوميني کمپ څخه د مقدونيا پر لور څلور ساعته سفر پېل کړ. په دغه ورځ د درو پناه غوښتونکو د ډوبېدو خبر هم ورکړل سو. خو مقدونيا ته اکثره رسېدلي مهاجر پوليسو ونيول.
انځور: DW/D.Tosidis
مقدونيا ته د داخلېدو نقشه
د ايدوميني په کمپ کي د په زرونو پناه غوښتونکو تر منځ د نامعلومو کسانو له خوا داسي شپې پاڼي ووېشل سوې، چي پکښي نقشه او هدايات ليکل سوي ول چي د مقدونيا سرحد ته څرنګه اوښتلای سي.
انځور: DW/O. Sallet
د وتلو په تلاښ کي
په سونو پناه غوښتونکو چي پکښي داسي کورنۍ هم وې چي کوچنيان ورسره ول، د ايدوميني د مهاجر له کمپ څخه حرکت وکړ، څو د مقدونيا سرحد ته ور واوړي.
انځور: DW/D.Tosidis
له اوبو، خټو او ډبرو سره مبارزه
دغو مهاجرو تر سيند پوري وتلو وروسته هڅه وکړه چي د مقدونيا پر سرحد درول سوو خنډونو تر منځ داسي ځای پيدا کړي، چي ترې تير سي.
انځور: DW/D.Tosidis
بيره
يوه کوچنۍ مهاجره چي له اوبو څخه وېره لري، نور پناه غوښتونکي مرسته ورسره کوي، څو تر سيند واوړي.
