په تونس کې بیړنې حالت اعلان شوې
۱۳۹۴ تیر ۱۴, یکشنبه![](https://static.dw.com/image/18561667_800.webp)
دغه پریکړه په «سوسه» ساحلي سیمه کې پر یوه هوټل تر خونړي برید یوه اوونۍ وروسته نیول کیږي. د تونس ولسمشر الباجي قائد السبسي د یوې تلویزوني وینا په ترڅ کې وویل چې هیواد یې د جگړی په وضعیت کې قرار لري. هغه په لومړي قدم کې په خپل هیواد کې د یو ۳۰ ورځني بیړنې حالت اعلان کړی دی.
السبسي وویل: « په ځانکړي توگه په گاونډي هیواد لیبیا کې د هرج مرج له امله اوس تونس په یوې ځانګړې جگړې کې ښکیل شوی دی».
د تونس ولسمشر وویل چې ټول اړین تدابیر باید په عاجله توگه عملي شي. په دې ترتیب سره نو د تونس امنیتي ځواکونو لا ډیر صلاحیتونه ترلاسه کړي دي.
د تیرې جمعې په ورځ (د ۲۰۱۵ کال د جون میاشتې۲۶) اسلامپالو د تونس په ختیځ ساحل تفریحي ساحه «سوسه» کې ۳۸ تنه سیلانیان ووژل. اکثره دغه سیلانیان بریتانویان ول. د دغې پيښې په قربانیانوکې دوه تنه آلمانان هم شامل ول. د څیړنو د پایلو پر اساس بریدگر د گاونډي هیواد لیبیا د جهادیانو په یو مرکز کې روزل شوې وو.
په بیړني حالاتو کې د دې تر څنگ چې پولیس او پوځ ته ډیر صلاحیت ورکول کیږي مدني حقونه لکه د غونډو آزادي محدودیږي. مخکې تر دې په ۲۰۱۱ کال کې د هغه وخت ولسمشر زین العابدین پر وړاندې د خلکو د پاڅون پر مهال په تونس کې یو بیړنې حالت اعلان شوې وو.
وروستیو ترهگریزو بریدونو تونس ته ډیر سخت ټکان ورکړی دی. دغو بریدونو د شمالي اقریقا د دغه هیواد پر اقتصاد ډیره منفي اغیزې پریښې ده ځکه د سیاحت سکتور د دغه هیواد د کورني ناخالص تولید اووه سلنه برخه جوړوي. په تونس کې تر وروستیو بریدونو وروسته ډیر شمیر سیلانیان په عاجله توگه له دغه هیواد څخه ووتل.
د IS یا «اسلامي دولت» په نامه ترهگرۍ ډلې د دغه خونړي برید مسئولیت پر غاړه اخیستی دي. تونس تر اوسه پوری ۸۰ هغه جوماتونه تړلي دي چې گمان کیده د تندلارو پلویان به په کښې وي.