په جوزجان کې ترافيکي پيښې ۹ کسانو ته مرگژوبله اړولې
۱۴۰۱ دی ۱۰, شنبه
د جوزجان ولايت د ترافيکو مديريت سيمه ايز مسوولين نن د شنبې په ورځ د جوزجان – بلخ پر لويه لاره د يوې ترافيکي پېښې د رامنځته کېدو خبر ورکوي.
په دې پېښه کې د دوو مېرمنو په ګډون پنځه تنه مړه او د دوو مېرمنو او دوو ماشومانو په ګډون څلور تنه نور ټپيان شوي دي.
په جوزجان کې د طالبانو د ترافيکو مدير عبدالبشير فيضي وايي، دغه پېښه هغه مهال رامنځ ته شوه، چې يو مسافر وړونکى موټر د شبرغان ښار په »چيغچي« سيمه کې له يوه سراچه ډوله موټر سره ټکر وکړ.
د هغه په وينا، د دې پېښې قربانيان د سراچه ډوله موټر مسافر دي.
په جوزجان کې د طالبانو د ترافيکو مديريت امر وايي چې دغه پيښه د مسافر وړونکي موټر د چلوونکي د بې احتياطۍ له امله رامنځ ته شوې او اوس چلوونکى نيول شوى دى.
خراب سړکونه، د موټر چلوونکو بې احتیاطي، تېز سرعت او د یو شمېر موټر چلوونکو له خوا د نشه یي توکو کارول د افغانستان په بېلابېلو سیمو کې د ترافیکي پېښو د زیاتوالي لامل شوي دي.