د منځني ختیځ یوې مشهورې ورځپاڼې «ګُلف نیوز» د سعودي عربستان د چارواکو په حواله رپوټ ورکړی دی چې په روانه اونۍ کې پنځو پاکستانیانو ته د مرګ سزا ورکړل شوې ده.
د هغو کسانو چې سرونه یې پرې کړای شوي دي، پر یوې کمپنۍ د هجوم ور وړلو او د شرکت د ساتونکي په وژنې تورن ول.
د رپوټونو په حواله د دغو کسانو د مرګ سزا د سه شنبې په ورځ د مسلمانانو په مقدس ښار مکه کې عملي شوې ده.
په سعودي عربستان کې د قتل او ترهګریزو بریدونو ترڅنګ د نشه یې توکو په قاچاق کې ښکیلو مجرمینو ته د مرګ سزا ورکول کیږي. په دې هیواد کې له دا ډول جرمونو سره تړاو درلودونکو لسګونو کسانو ته د مرګ سزا ورکول کیږي.
پيښه څنګه رامنځته شوې ده؟
ګلف نیوز د سعودي عربستان د کورنیو چارو وزارت د یوې اعلامیې په حواله لیکلي دي «مجرم ګڼل شوو پاکستاني اتباعو پر یوه شخصي شرکت برید کړی وو او په دې ترڅ کې یې د کمپنۍ دوه ساتونکي تړلي، وهلي او ټکولي چې له امله یې یو بنګله دیشی ګارد مړ شوی دی».
د سعودي عربستان د کورنیو چارو وزارت په حواله په دې اړه تر پلټنو وروسته ټول پنځه تورن کسان یوې محکمې ته وړاندې کړای شول چې د محکمې له خوا تر مجرم بلل کیدو وروسته ورته د اعدام یا مرګ سزا واورول شوه.
د ابتدایي محکمې حکم وروسته بیا د استئناف او سترې محکمې له خوا هم تائید شو. بیا د یوه شاهي فرمان په اساس د سه شنبې په ورځ په مکې معظمې ښار کې دغه سزا عملي شوه.
سعودي عربستان د خپلو سختو قوانينو له کبله شهرت لري او عموماً د قتل، ترهګریزو بریدونو او نشه یې توکو قاچاق کوونکو ته د مرګ سزا ورکول کیږي. په دغه هیواد کې هر کال په دا ډول جرایمو کې د ښکیلو لسګونو کسانو سرونه له تنې څخه پرې کيږي.
د بشري حقونو سازمانونه د دا ډول قانوني اقداماتو چې له مخې یې د مرګ په څیر سختې سزا ګانې ورکول کیږي، د ړونتیا او شفافیت په هکله اکثره وختونه اندېښنه څرګندوي.
آژانسونه: ش.ن/ ن.ز
په آلمان کي د اعدام وروستۍ سزا
پر نړیوالو هڅو سربیره، بیا هم د نړۍ په ډيرو برخو کي د اعدام سزا عملي کیږي. په آلمان کي وروستی ځل دغه سزا ۷۰ کاله مخکي عملي سوه. په دغه هیواد کي په اعدام باندي محکوم وروستی کس ریچارد شوو نومیده.
انځور: picture-alliance/W. Steinbergپه آلمان کي د ګیوتین وروستۍ دستګاه
ریچارد شوو، هغه وروستی مجرم وو چي په آلمان د اعدام په سزا محکوم سوی وو او د ګیوتین یا سر پرې کولو د دستګاه په مرسته ورباندي دغه حکم عملي سو. خو درې میاشتی وروسته د ۱۹۴۹د می مياشتي پر ۲۳ مه په آلمان کي د اعدام سزا د لغو قانون تصویب سو. ددغه هیواد د اساسی قانون په ۱۰۲ ماده کي په واضح ډول د اعدام سزا لغو اعلان سوې ده.
انځور: د لودویگسبورگ په موزیم کي د ګیوتین دستګاه.
په لویدیځ آلمان کی د اعدام سزا
لویدیځ برلین یو ځانګړی حالت درلود. که څه هم د آلمان په اساسي قانون کی د اعدام سزا لغوه اعلان سوه، خو په غربي آلمان کي چی تر جګړې وروسته يې اداره د درو متفقو غربي دولتونو امریکا، فرانسې او بریتانیا ترمنځ ویشل سوې وه، په رسمي ډول هغه د ۱۹۸۹م کال د مارچ مياشتي پر ۱۴مه لغو سوه.
انځور: ۱۹۶۱م کال، د برلین د براندنبورګ دروازې مخي ته بریتانیايي سرتیري.
د متفقو ځواکونو له خوا د اعدام حکمونه
د ۱۹۴۵ څخه تر ۱۹۴۹م کاله پوري چي دوهمه نړیواله جګړه پای ته ورسیده، په آلمان کي ډیري لږ د اعدام سزاوي عملي سوې. په دغو څلورو کلونو کي د اعدام سزا په هغو احکامو پوري اړه پیدا کړه چي متفقو ځواکونو پس له جکړې پر نازیانو باندي صادر کړل. په ۱۹۵۱م کال کي هم د نازي آلمان یو جنګیالی په لندسبرګ کي د امریکایانو په زندان کي اعدام سو.
انځور. د لندسبرګ زندان.
په ختیځ آلمان کي د اعدام سزا
د آلمان په ديموکراتیک جمهوریت کي د ۱۹۸۷م کال د جنورۍ مياشتي پر۱۷مه د اعدام سزا په رسمي ډول لغو سوه. په اعدام باندي محکوم وروستی کس ددغه هیواد د اطلاعاتو د سازمان افسر، ورنر تسکه وو. هغه د ۱۹۸۱م کال د جون میاشتي پر ۲۶ مه د جاسوسۍ په جرم په لایپڅيگ کی اعدام سو. انځور: د لايپڅيگ زندان.
د اعدام سزا په هکله ټولپوښتنه
په ۱۹۴۹م کال کي د یوې نظر پوښتني نتایج ښيي چي۷۴ سلنه آلمانان د اعدام سزا له عملي کیدو سره موافق دي. په دغه نیټه یوازي ۲۱سلنه کسانو له اعدام سزا سره مخالفت وکړ او پنځه سلنه يې ممتنع رای ورکړه.
انځور: د ۱۹۴۹م کال د سپتمبر مياشتي پر اومه نیټه په بُن ښار کي د آلمان د فدرال پارلمان «بوندیستاګ» لومړني غونډه.
