د الجزیرې د ټلویزیوني شبکې د رپوټ له مخې چې مرکزي دفتر یې په قطر کې دی، د غزې په تراډه کې د اسرائیل د هوايي برید په نتیجه کې، ددغې شبکې یو خبریال له خپلو څلورو تنو نورو همکارانو سره وژل سوی دی. د الجزیرې د رپوټ په حواله، "انس الشریف" او همکارانو یې پر هغې خیمې د هدفمندانه برید په نتیجه کې خپل ژوند له لاسه ورکړ چې دغزې د تراډې په شمال کې د غزې د ښار د خبریالانو له پاره درول سوې وه. ځینو رسنیو د وژل سوو خبریالانو شمیر څلور تنه اعلان کړی دی.

د اسرائیل  پوځ د انس الشریف وژنه تأیید کړې او ادعا یې کړې ده چې هغه په خپله ځان د الجزیرې د خبریال په توگه معرفي کړی وو، خو په حقیقت کې یې د حماس په ترهگرې ډلې پورې مربوطې د یوې ترهگرې ډلې مشري پر غاړه درلوده. د الجزیرې د رپوټ له مخې، د الشریف په نورو څلورو تنوهمکارانو کې چی په دغه برید کې وژل سوي دي، یو بل خبریال او درې تنه فلم اخیستونکي شامل دي.

الجزیره د اسرائیل ادعا ردوي

اسرائیلي پوځ د هغو اسنادو او معلوماتو له مخې چې د غزې په تراډه کې ترلاسه سوي، ادعا کړې ده چې دغه اسناد په حماس کې د انس الشریف غړیتوب ثابتوي. د اسرائیل د پوځ په حواله، نوموړی د ملکي کسانو او اسرائیل د سرتیرو په وړاندې د توغنديزو بریدونو د ترسره کولو مسؤل ؤ.

خو دالجزیرې  شبکې ددغې ادعا په جواب کې اعلان کړی دی چې د اسرائیل پوځ هیڅ ډول کوم اسناد نه دي وړاندي کړي چې د خپلواکو نړیوالو بڼسټونو له خوا تأیید سوي وي. دغې شبکې ۲۸ کلن الشریف " یو پیژندل سوی عربي خبریال" بللی دی چې د الجزیرې له پاره یې د غزې د تراډې له شمال څخه هر اړخیز رپوټونه جوړکړي دي.

په اسرائیل کې د الجزیرې پر خپرونو بندیز

د اسرائیل او الجزیرې دشبکې ترمنځ اړیکې له کلونو راهیسې ترینگلي دي. په اوس وخت کې په اسرائیل کې ددغې قطري شبکې خپریدل منع دي. دغه بندیز د هغه قانون له مخې چې د ۲۰۲۵ م کال په اپریل کې تصویب سو، ممکن سو؛ نوموړی قانون د هغو بهرنیو رسنیو  بندیز ته اجازه ورکوي چې د اسرائیل د امنیت له پاره یو گواښ وبلل سي.

د اسرائیل د ارتباطاتو وزیر شلومو کارهی دغه شبکه "د حماس په خدمت کې د ترهگرۍ لاوډسپيکر" بللې ده. خو الجزیره دغه ډول تورونه ردوي.

د لویدیځې غاړې فلسطیني ادارې هم د اسرائيل تر اشغال لاندې سیمو کې د الجزیرې او د هغې د کارکوونکو فعالیت منع کړی دی.

د جگړې له پیل راهیسې د غزې تراډې ته د بهرنیو خبریالانو ورتگ تقریباً په بشپړ ډول منع سوی دی، خو سیمه ائیز خبریالان بیا هم رپوټونه جوړوي. تر اوسه پورې د اسرائیل د بریدونو له امله د خبریالانو د وژل کیدو په هکله گڼ شمیر رپوټونه خپاره سوي دي.