د آلمان د مهاجرت اداره غواړي دغه په غلطۍ سره اخراج کړل شوی افغان مهاجر په خپل لګښت بيرته آلمان ته راولي. د دغه افغان مهاجر نوم نصيب الله س. ښودل شوی دی. په پام کې ده چې نوموړی په راتلونکو لنډو ورځو کې آلمان ته راوستل شي.
آلمانۍ مجلې «شپيګل» د جمعې په ورځ (د ۲۰۱۸ کال د اګست ۳ نېټه) رپوټ ورکړ، چې دغه افغان مهاجر په دې دليل بيرته آلمان ته راوستل کيږي چې تر څو يوې آلمانۍ محکمې ته خپله ادعا ورواوري. ځکه دغه افغان په داسې حال کې اخراج شوی وو چې د محکمې د پريکړې په اړه يې له سره د بياکتنې غوښتنه کړې وه.
نصيب الله س. په کال ۲۰۱۵م کې آلمان ته راغلی وو او له هماغه وخته د آلمان په ختيځ ايالت مکلنبورګ فورپورمن کې اوسيده.
شپيګل زياته کړې چې وروسته له هغې چې دغه ځوان افغانستان ته اخراج شو، د آلمان د مهاجرت او پناه غوښتنې فدرالي ادارې (بامف) اعلان وکړ چې هغه په سهوې سره اخراج شوی دی. د دغې ادارې په وينا، دغه افغان مهاجر د محکمې د هغې پريکړې پر وړاندې چې د ده په هکله يې کړې وه، له سره د کتنې درخواست وړاندې کړی وو. په پام کې وه چې هغه په راتلونکو اوونيو کې د خپلې دعوا له پاره محکمې ته حاضر شي، خو مخکې له دې چې دغه بهير پيل شي کابل ته اخراج کړل شو.
د رپوټ پر اساس، اوس آلمانۍ ادارې غواړي نصيب الله س. په خپل لګښت د پاکستان پلازمينې اسلام له طريقه بيرته آلمان ته راولي. په پام کې ده چې نصيب الله به آلمان ته تر پرواز د مخه، خپله آلمانۍ ويزه په اسلام آباد کې د آلمان له سفارت څخه ترلاسه کړي.
له دې ټولو سره سره، د آلمان د بهرنيو چارو وزارت په دې اړه څه نه دي ويلي. له بل لوري دا هم په بشپړه نه ده روښانه شوې چې دغه افغان مهاجر به څه وخت له اسلام آباده آلمان ته راوستل کيږي.
د مهاجرت پر موضوع له آرشيف څخه يو انځوريز البوم:
آلماني چارواکو اعلان وکړ چې د آلمان له دوسلدورف هوايي ډګر څخه ۱۲ تنه رد شوي افغان مهاجرین بیرته خپل هیواد ته اخراجیږي خو په کابل کې رسنیو رپوټ خپور کړی چې له دوی څخه یوازې ۸ کسان له هوايي ډګر څخه بیرون شوي.
انځور: Getty Images/AFP/W. Kohsarله آلمان څخه اخراج شوي ۸ تنه رد شوي افغان مهاجرین د کابل هوايي ډګر ته رسیدلي. په پیل کې آلماني رسنیو ویلي وو چې په دې پرواز کې ۱۵ افغان مهاجرین بیرته خپل هیواد ته استول کیږي، خو تیره ورځ بیا رسنیو د ۱۲ کسانو یادونه وکړه. په پای کې د کابل له هوايي ډګر څخه یوازې ۸ مهاجرین بهر شوي.
د دې رد شوو افغان مهاجرینو الوتکه د سې شنبې (د ۲۰۱۷ کال د سپتمبر میاشتې په ۱۲ نیټه) د آلمان له دوسلدورف هوايي ډګر څخه د کابل هوايي ډګر په لور والوته. آلماني چارواکو ویلي چې د اخراج کیدونکو افغانانو په دې دور کې داسې مهاجرین دي چې د پناه غوښتنه یې رد شوې او ځینو یې جرمونه ترسره کړي.
په کابل کې د آلمان پر سفارت باندې تر خونړي برید وروسته، افغانستان ته د رد شوو اخراجیدونکو مهاجرینو لړۍ ځنډیدلې وه. له هغې پیښې وروسته، دا لومړی ځل دی چې یو ډله افغان رد شوي مهاجرین له آلمان څخه افغانستان ته اخراجیږي.
د افغانستان د مهاجرینو وزارت چارواکو ویلي چې ټاکل شوې وه په دې پرواز کې ۱۱ افغان مهاجرین افغانستان ته اخراج شي، خو یوازې ۸ مهاجرین رسیدلې دي. د یاد وزارت یو چارواکي آصف عباسي د فرانسې خبري آژانس ته ويلي چې «دا چې پاتې درې کسان ولې نه دي اخراج شوي، دلیل یې موږ ته هم معلوم نه دی.»
په داسې حال کې چې آلماني چارواکو ویلي چې د اخراجیدونکو مهاجرینو په ډله کې لږ تر لږه درې کسان د آلمان له زندان څخه د کابل هوايي ډګر ته اخراج شوي، خو افغان چارواکو د دې کسانو د راتلونکي برخلیک په هکله تر اوسه پورې کوم نظر نه دی ورکړی.
د اخراج شوو کسانو له ډلې څخه پنځه رد شوو افغان مهاجرینو د آلمان په بایرن آیالت کې ژوند کوو. د بایرن د کورنیو چارو وزیر یواخیم هرمن ویلي چې دغه کسان مجرم وو. د هغه په وینا له دوی څخه لږ تر لږه دوه کسان یې د جنسي تیري د جرم له امله په زندان کې وو.
د رد شوو افغان مهاجرینو له ډلې څخه ځینو یې هیڅ هم نه درلودل. دوی ادعا کوله چې دوی په کور کې وو او د آلمان د پولیسو لخوا ونیول شول او سمدلاسه د دوسلدروف هوايي ډګر ته انتقال او له هغه ځایه افغانستان ته اخراج شول. آلماني چارواکي وايي چې څو میاشتې وړاندې یې دغو کسانو ته خبر ورکړی چې باید د آلمان خاوره ترک کړي.
د آلماني چارواکو د څرګندونو سربیره، ځینې اخراج شوي مهاجرین وايي چې دوی په آلمان کې کوم جرم نه دی کړی او یوازې له دې امله اخراج شوي چې د دوی د پناه غوښتنه نه ده منل شوې. دغه مهاجر هغه مهال چې کابل ته ورسیدو، سترګې یې له اوښکو ډکې شوې خو معلومه نه ده چې دغه اوښکې د خوښی دې که د خفګان.
بل لوري ته بیا په آلمان کې د بشري حقونو مدافع سازمانونه او ګڼ شمیر نورې ډلې افغانستان ته د دې مهاجرینو پر اخراج نیوکې کړي. دوی ویلي چې د بشري حقونو او امنیت له امله افغانستان په داسې حالت کې نه دی چې آلمان دې وکولای شي رد شوي افغان مهاجرین هلته اخراج کړي.
د سپتمبر په ۱۲مه په آلمان کې د دوسلدروف هوايي ډګر په مخ کې د بشري او د مهاجرینو د حقونو فعالانو د رد شوو افغان مهاجرینو د اخراج پرضد لاس لاریون او اعتصاب وکړ. ویل کیږي چې د آلمان په لږ تر لږه څلورو ایالتونو کې د رد شوو مهاجرینو د ساتلو له پاره ساتن ځایونه جوړ شوي.
د سپتمبر په ۱۲مه د آلمان د دوسلدورف په هوايي ډګر کې د لاریون سره په یو وخت کې شاوخوا ۲۰۰ کسانو افغانستان ته د رد شوو افغان مهاجرینو د ډله ایز اخراج پر ضد لاریون وکړ.
لاریون کوونکو داسې شعارونه لیږدول چې د افغانستان امنیتي وضعیت یې تشریح کوو. دوی افغانستان ته د «اخراج د توقف» غوښتنه کوله.
په دې لاریون کې ګڼ شمیر افغان مهاجرینو هم ګډون کړی وو. د دوی په لاسونو کې په ځینو شعارونو کې لیکل شوي وو چې «افغانستان خوندي نه دی.»
