په فرانسه کې درې سیلانیان وژل شوي
۱۳۹۸ مرداد ۷, دوشنبه![Paris Frankreich Symbolbild Polizeiabsperrung](https://static.dw.com/image/45192130_800.webp)
د یکشنبې په ماښام ناوخته د فرانسې په اولیولس ښار کې د تیلو په یوه پمپ کې د ډزو په پایله کې درې کسان وژل شوي او یو تن ټپي شوی دی.
د یوې ځایي رسنۍ د رپوټ له مخې وژل شوي کسان دوه نارینه او یوه ښځه ده.
د ورکړل شوو رپوټونو له مخې پيښه د یکشنبې په ماښام د سیمې په وخت اته بجې هغه مهال رامنځ ته شوه چې دوو زلمکیو د تولون ښار په اطرافو کې د تیلو په پمپ کې ډزې وکړي. دا لا معلومه نه ده چې آیا په دغه پيښه کې نور کسان هم ښکیل دي که نه.
د وژل شوو کسانو هویت په ډاګه شوی نه دی. خو فرانسوي چارواکي وایي چې داسې نه بریښي چې هغوی دې هدف ول.
د برید کوونکو لټون روان دی
د اولیولس ښاروال روبرت بنیفنتي، ویلي دي چې شکمن کسان چارواکو له مخکې پيژندل او باور کیږي چې په محلي کچه په جرمي فعالیتونو کې ښکیل دي. هغه د فار مارتین، په نوم له ځایي ورځپاڼې سره په خبرو کې ویلي دي چې دغي پيښې متاثره کړی دی. هغه له میندو او پلرونو غوښتي دي چې پر خپلو اولادونو جدي پاملرنه وکړي او خبرداری یې ورکړی دی چې داسې کوم جرم نه شته چې عواقب و نه لري.
د فرانسې د کورنیو چارو وزیر کریستوف کاستانیر، د خپل ټویټر په پیغام کې لیکلي دي چې د عاملینو د تشخیصولو او نیولو له پاره له ټولو امکاناتو کار اخیستل کیږي.