فرانسوي چارواکو د سه شنبې په ورځ ويلي چې د آلمان سرحد ته څيرمه يوه هديره کې یې ۱۰۷ داسې قبرونه موندلي چې د سپرې په واسطه پرې د نازيانو د مات سمبول نښان رسم شوی وو.
د شتراسبورگ ښار په لويديځ کې په پراته ښارگوټي ويستهوفن کې دغه پېښه په نزدې پراته کلي شافهاوسزر – څورن کې تر يوې ورته پېښې څو ساعته وروسته رامنځته شوې ده.
د فرانسې د کورنيو چارو وزير کرستيف کاستنر د تويتر له لارې دغه پېښه د «کرکې وړ عمل» په توگه غندلې. هغه زياته کړې چې د عاملينو د پیژندلو او نیولو له پاره به له هرې لارې چارې کار واخيستل شي.
په داسې حال کې چې پوليسو خپلې پلټنې پيل کړي دي، سيمه ایزو چارواکو ويلي چې هغوی د دې ډول نورو بريدونو د مخنيوی په موخه يو لړ اقدامات پر لاره اچولي دي.
په فيبرورۍ میاشت کې هم په فرانسه کې د يهودانو تر ۹۰ زيات قبرونه زیانمن شوي انځور: Reuters/V. Kessler الساس سیمه په دې وروستيو کې د راسسټي او د يهودانو ضد پېښو د لړۍ شاهده وه چې دې په فرانسه کې د زغم په اړه بحثونه راوپارول. د اروپايي هېوادونو له جملې څخه په فرانسه کې تر ټولو زيات يهودان ميشت دي.
په فبرورۍ میاشت کې هم د شتراسبورگ په شمال لويديځ کواتڅنهايم سيمه کې د يهودانو په يوه هدیره کې تر ۹۰ زيات قبرونه زيانمن شوي ول. د چارواکو په حواله د ۲۰۱۷ م کال په پرتله د يهودانو پر ضد د رپوټ شويو بريدونه شمير په ۲۰۱۸ م کال کې ۷۴ سلنه زيات وو.
bs/mq (AP,AFP,dpa)
زموږ له آرشيف څخه:
آلمانان خپل مړي څه ډول خاورو ته سپاري
هر انسان بلاخره يوه ورځ مري او هره ټولنه خاورو ته د مړو د سپارلو خپل خاص مراسم لري. خو آیا دغه مراسم تغيير هم کوي؟ په آلمان کې تر شل کاله مخکې پورې خلکو خپل۷۰ سلنه مړي خاورو ته سپارل، خو اوس په کې ډير توپير راغلی دی.
انځور: DW/J. Ospina-Valencia په ۲۰۱۷م کال آلمان کې ۹۳۲ زره او ۵۳۸ تنه مړه شوي دي. دغه هيواد کې له ۳۲ زرو څخه ډيرې هديرې او څه د پاسه ۳۲ ميليونه قبرونه شتون لري.
انځور: Imago/W. Otto په ورستيو کلونو کې د هغو کسانو په شمير کې ډيروالی څرګند شوی چې غواړي تر مړينې وروسته يې جسدونه وسوځول شي. خو تر شل کاله مخکې پورې ۷۰ سلنه مړي خاورو ته سپارل کيدل.
انځور: Kai Nietfeld/picture-alliance/dpa هغه کسان چې غواړي جسدونه يې وسوځول شي ايرې يې په يوه ګلدان ته ورته لوښي کې اچول کيږي او بيا په يوه قبر کې ښخول کيږي. بریمن، د آلمان يوازينی ايالت دی چې په کال ۲۰۱۵م کې په قبرونو کې د مړو خښولو لزوم په کې لغو شو. بريمن کې کورنۍ کولای شی د خپلو مړو ايرې هر ځای ېې چې خپله خوښه وي وساتي او يا يې ښخې کړي.
انځور: Klaus-Dietmar Gabbert/picture-alliance/dpa د آلمان هديرې تر ډيره يوه شنه باغ يا ښايسته پارک ته ورته دي. ځينې کسان وصيت کوي چې ايره يې د هديرې د يوې ونې بيخ ته واچول شي.
انځور: Arno Burgi/picture-alliance/dpa داسې کسان هم شته چې مړي يې پرته له کومې نخښې خاورو ته سپارل شوي دي، يعنې په قبرونو يې نومونه نه ليکل کيږي. هغه مړې چې په ناپيژانده توګه خاورو ته سپارل شوي وي په قبرونو باندې يې د نوم تخته، ګل، شمعې او داسې نور شيان نه ليدل کيږي.
انځور: Imago په آلمان کې د غير مذهبي افرادو له پاره هم جنازې يا خاورې ته د سپارلو مراسم شتون لري. د دغو کسانو په مراسمو کې د کليساوو استازي ګډون نه کوي او نه هم د کوم مذهب سمبول په کې کارول کيږي.
انځور: Roland Mühlanger/Imago په ګلزن کرشن ښار کې د شالکه د فوټبال ټیم قبرونو انځور چې له هوا څخه اخيستل شوی دی. په دغې هديره کې يوازې د شالکه ټيم مينه وال خاورو ته سپارل کيږي تر څو يې ښودلي وي چې تر مرګه يې مينان ول.
انځور: picture-alliance/augenklick/firo Sportphoto د آلمان د ايسن ښار په هديره کې د دې امکانات هم برابر شوي دي چې انسان او د کورني حيوان مړی په يوه قبر کې ګډ ښخ کړل شي.
انځور: DW/K. Domagala-Pereira د آلمان په کسل ښار کې د مړو چارو اړوند موزيم. دغه موزيم د ۱۹۹۲م راهيسې وجود لري او پر دې موضوع چې په آلمان کې اوس او پخوا د مړو مراسم څنګه ترسره او څه تغيرات په کې رامنځ ته شوي دي، تمرکز کوي. په دغه انځور کې د جنازې ليږدونکې د ۱۸۸۰ کال يوه بګۍ او د ۱۹۷۸ کال يو زوړ ماډل موټر ليدل کيږي.
انځور: Museum für Sepulkralkultur Kassel په آلمان کې له ۲۰۰۳م کال راهيسې د مړو او وير مراسمو د خدماتو رسمي کورسونه يا د زدکړې مرکزونه جوړ شوي دي. په دغو کورسونو کې روزنيزه دوره درې کاله ده. څه د پاسه ۵ زره شرکتونه د مړو په برخه کې خدمات وړاندې کوي.
انځور: C. Löwinger د روزنيزو کوروسونو زده کونکي په دغې هديره کې خاورو ته د مړو د سپارلو مراسم او اړوندې نورې چارې په عملي توګه زده کوي.
انځور: Rosina Eckert د مړي کورنۍ د جنازې يا خاور ته د مړي د سپارلو مراسمو له پاره خپل دوستان او خپلوان نه يوازې په مطبوعاتو کې د اعلان له لارې بلکې د بلنلیک له لارې هم دعوتوي. د بلنې په دغو کارتونو باندې د مړو ځانګړی پوستي ټيکټ هم نښلول کيږي.
انځور: Dagmar Breitenbach/DW خاورو ته د مړي تر سپارلو وروسته، محدود شمير راغليو ميلمنو ته په يو رستورانت يا کافې کې دعوت ورکول کيږي. په رستورانت کې د نورو خوړو ترڅنګ د اشترویزل کوخن (Streuselkuchen) په نوم کيک موجود وي.
انځور: Daniel Karmann/picture alliance/dpa
