قطر په ۲۰۲۲م کال کې د فوټبال نړیوال جام کوربتوب کوي. دغه هيواد ويلي دي چي ۱۰۰زرو پاکستانيانو ته به په پروژو کې کارونه ورکړي. پاکستان دغه اقدام ستايلی دی.
انځور: picture-alliance/dpa
اعلان
د پاکستان د بهرنیو چارو وزیر شاه محمود قریشي ویلي دي چې د هغو پاکستاني اتباعو چې د نړیوال جام په زیربناوو کې کار کوي د کار پر مناسبو حقوقو به یې ټینګار وکړي.
قطر چې د ګاز بډايه زیرمې لري پر لویو تعمیراتي پروژو باندې يې کار پېل کړی دی، څو د ۲۰۲۲م کال د فوټبال نړیوال جام سیالیو له پاره چمتووالی ونیسي. خو دغه هیواد د بشري حقونو او کارګرو د حقوقو د فعالانو تر څار لاندې دی.
د فرانسې خبري آژانس په خپل رپوټ کې لیکلي دي چې د روان میلادي کال په پېل کې د بخښنې نړیوال سازمان خبرداری ورکړی وو چې پر نوو اصلاحاتو سربیره قطر د وخت له کمي سره مخامخ دی او دغه سازمان د لسونو زرو مهاجر کارګرو د استثمار خبره کړې وه چې زیاتره یې د سویلي آسیا دي.
رپوټ زیاتوي چې مهاجر کارګرو ته د معاشونو د نه ورکولو، د کارفرمایانو له لوري د کارګرو د پاسپورتونو ساتل او همداشان ۱۴۸ ورځې په پر له پسې ډول کار کولو رپوټونه ورکړل شوي دي.
د پاکستان د بهرنیو چارو وزیر شاه محمود قریشي د قطر د دې پلان چې د دغه هیواد تر ۱۰۰ زرو کارګرو ته به د کار اجازه ورکړي هرکلی کړی دی. خو هغه په عین وخت کې ټینګار کړی دی چې د نړیوال جام له پاره په کارونو بوخت کارگرو حقوقو ته باید درناوی وشي.
قریشي بروکسل ته د خپل سفر په ترڅ کې له فرانسې خبري آژانس سره په خبرو کې ویلي دي: «البته موږ به د خپل سفارت او همداشان له استخدامونکو شرکتونو څخه وغواړو چې د [کار] ښه شرایط کيږدي.» هغه په خپلو خبرو کې زیاته کړه چي دا چې پاکستاني کارګر خپله ونډه ادا کوي، نو پالنه يې هم باید وشي.
خو قطر پر دې باندې ټینګار کوي چې د کارګرو د حقوقو په برخه کې اصلاحاتو ته ژمن دی.
له کله راهیسې چې قطر د نړیوال جام د کوربه په توګه غوره شوی دی، د يوه کارگر میاشتنی معاش يې لږ تر لږه ۷۵۰ ریاله ټاکلی چې شا او خوا ۲۰۶ ډالر کیږي. پر دې سربیره یې هغه سیستم هم له منځه وړی دی چې یو کارګر باید له دغه هیواده د وتلو له پاره له خپل کارفرما څخه اجازه تر لاسه کړي.
قریشي دغه بدلونونه ستایلي دي، خو ویلې یې دي چې پاکستان به په دې برخه کې د لا ډیرو آسانتیاو غوښتنه وکړي. هغه زیاته کړې ده: «زما په آند د نورو آسانتیاو لکه صحي بیمې او دې ته وروته شیانو په هکله خبرې کیدای شي او موږ به په دې هکله خبرې وکړو.»
د اروپایي اتحادیې له جګپوړو چارواکو سره به تر ملاقاتونو وروسته قریشي د ستراتیژیکي بوختیا پلان، د دغه اتحادیې له بهرنیو چارو مسوولي فدریکا موګیرني سره لاسلیک کړي.
(S.R/N.Z(AFP
زموږ له ارشيف څخه:
قطر ولې دومره اهمیت لري؟
د نفوس او مساحت له اړخه قطر د خلیج یو کوچنی هیواد دی، خو په ټوله عربې نړۍ کې یې هله گوله رامنځ ته کړې ده. د انځورونو په دې گالرۍ کې د قطر په هکله ځینې معلومات شته.
انځور: Reuters
تیل او گاز
قطر په نړۍ کې یو له هغو هیوادونو دی چې زیات «مایع طبیعي گاز» لري او په نړۍ کې دریم هیواد چې د طبیعي گاز ستري زیرمي لري. دغه خلیجي هیواد د تیلو او گازو په برخه کي بډای هیواد دی.
انځور: imago/Photoshot/Construction Photography
په نړیوالو شرکتونو کې ونډه
دغه هیواد د آلمان د موټر جوړولو شرکت فولکس واگن کې ۱۷ سلنه او د نیویارک د «امپایر سټیټ بلډنگ» کې لس سلنه ونډه لري. قطر په تیرو څو کلونو کې په بریتانيا کې میلیارده پونډه پانگونه کړې ده چې پکښې د بریتانيا د مشهور پلورنځي «هروډز» رانیول هم شامل دي.
انځور: Getty Images
د دریمگړي نقش
قطر د سوډان له حکومت او دار فور له قبایلو سره د څو لسیزو شخړې په هواري کې د دریمگړي نقش لوبولی وو. همداشان د فلسطین د الفتح او حماس ډلو تر منځ د منځگړتوب او همداشان له افغان طالبانو سره د سولې د خبرو اترو له پاره قطر نقش لرلی دی.
انځور: Getty Images/M. Runnacles
الجزیره شبکه
د دوحه، حکومت په ۱۹۹۶م کال کې د «الجزیره» په نوم یوه تلویزوني شبکه تأسیس کړه، چې په عربي نړۍ کې د خبرونو پوښښ او د خپرونو شکل ته بدلون ورکړ. اوس الجزیره نه یوازې په عربي، بلکې په ټوله نړۍ کې یو پیژندل شوی نوم دی.
انځور: picture-alliance/dpa/M. Ulmer
قطر هوایي شرکت
د قطر دولتي هوایي شرکت «قطر ایر ویز» د نړۍ په ښو هوایي شرکتونو کې حسابیږي. دغه شرکت ۱۹۲ الوتکې لري او د نړۍ په ۱۵۱ ښارونو کې فعالیت کوي.
انځور: picture-alliance/AP Photo/M. Probst
د فټبال نړیوال جام
په ۲۰۲۲م کال کې د فوټبال نړیوال جام سیالۍ په قطر کې تر سره کیږي. قطر د عربي نړۍ لومړنی هیواد دی چې د فوټبال د نړیوال جام کوربه توب کوي. دغه هیواد د فوټبال د سیالیو له پاره پر زیر بناوو باندې په میلیاردونو یورو پانگونه کوي.
انځور: Getty Images
د قطر نفوس
د قطر ټول نفوس ۲،۴ میلیونه دی چې د هغوی زیاتره یې په ۱۸مه میلادي پیړۍ کې د گاونډیو سیمو څخه دغه ځای ته ورغلي دي. دغه هیواد چې د طبیعي زیرمو له کبله بډای دی پکښې په کال کې د سړي سر متوسط عاید ۱۲۳ زره یورو دی.
انځور: picture-alliance/ZUMA Wire/S. Babbar
له بریتانیا سره اړیکي
قطر تر۱۹۷۱م کال پورې د بریتانيا تر حمایې لاندې وو. د بریتانيا د ځانگړې ادارې لاندي ټوله موده ۵۵ کلونو ته رسیږي. خو په ۱۹۷۱م کال کې قطر له دې انکار وکړ چې د متحدو عربي اماراتو یوه برخه دې وگرځي او د یوه خپلواک هیواد په توگه راڅرگند شو.
انځور: Reuters
شاهي نظام
په قطر کې له ۱۹مې پېړۍ راهیسې پاچاهي نظام واکمن دی او له همدغې مودې راهیسې د الثاني کورنۍ په واک کې ده. د قطر اوسني امیر شیخ تمیم بن حما الثاني، په ۲۰۱۳م کال کې هغه وخت د قدرت واگي په لاس کې واخیستل چې پلار یې خلیفه الثاني له خپلې واکمنۍ لاس پر سر شو.
انځور: Reuters
له بېلابېلو عربي هیوادونو سره د اړیکو خرابیدل
د سعودي عربستان په گډون اوو هیوادونو له قطر سره دیپلوماتیکي اړیکې پرې کړي دي. په دې سره منځنی ختیځ چې لا تر مخه له کړکیچونو سره لاس او گریوان دی له یوې بلې شخړي سره مخامخ شوی دی. پر قطر باندي د ترهگرو د ملاتړ تور پورې کیږي، چې دغه هیواد یې ردوي.
