«په لیبيا کې تر سېلابونو وروسته لس زره کسان لادرکه دي»
۱۴۰۲ شهریور ۲۱, سهشنبه
چارواکي اټکل کوي چې يوازې په ختیځ بندري ښار درنا کې تر زرو ډېر کسان مړه شوي دي. دوی په عين حال کې خبرداری ورکړی دی چې د مړو شمير ښايي نور هم لوړ شي.
د سره صليب او سرې مياشتې ټولنو د فدراسيون د مشر تامر رمضان، له خوا په لیبيا کې خبريالانو ته ويل شوي: «د مړو شمير ډېر زيات دی او ښايي تر زرونو ورسيږي.»
نوموړي زياته کړه چې موږ د خپلو خپلواکو سرچينه د معلوماتو پر اساس دا تائيدولی ش چې د لادرکه شويو کسانو شمير تر لسو زرو رسيږي.
د سرې میاشتې مسئولين په دې باور دي چې ښايي د قربانیانو شمېر زیات شي. د هغوی له خوا زياته شوې چې راغلي «وضعیت ناورین ته ورته دی» او ډېر انسانان لادرکه دي. زياته شوې چې طوفان ډير زيانونه اړولي دي.
د لیبیا په ختیځ کې د مرکزي حکومت مخالف حکومت اټکل کوي چې د مړو شمير به تر زرونو ورسيږي. لومړي وزیر اسامه حماد، د المسار ټلویزیوني چینل ته وویل، چې د دوو زرو تنو د وژل کیدو ویره شته. په دغه هېواد کې چې شاوخوا اوه میلیونه نفوس لري، زرګونه نور کسان لادرکه دي. تر اوسه د مرګ ژوبلې په اړه خپلواک معلومات نشته.
د شمالي افریقا دغه هیواد له کلونو راهیسې د واک پر سر مبارزې له کبله کمزورې شوی. د هېواد په لویدیځ پلازمینه طرابلس کې د ملګرو ملتونو په ملاتړ جوړ شوي موقت حکومت پر ضد په ختیځ کې مخالفین د واک له پاره مبارزه کوي چې د محلي پارلمان او د ځواکمن جنرال خلیفه اختر له خوا يې ملاتړ کیږي.
دانیل طوفان له کبله د ختیځ لیبیا لویې برخې سیلاب وړي
د «دانیل» طوفان چې سخت باران ورسره مل وو، د یکشنبې په ماسپښین له ختیځ لیبیا څخه تېر شو. د بن غازي، سوسي، البيضاء، المرج او درنا ښارونو ځينې برخې تر اوبو لاندې دي. اوسیدونکو راپور ورکړی چې اوبه کله ناکله په کوڅو کې مترونو ته لوړیږي. ښوونځي او دوکانونه تړل شوي دي. چارواکو د ختیځ په يو شمیر ښارونو کې بیړنی حالت اعلانی کړی دی.
د بیړنیو خدماتو په وینا، د سیلابونو له امله د ژغورنې اقدامات ستونزمن وو او دوی د چورلکو په ملاتړ تکیه کوي. د البیدا ښار یوه اوسېدونکي وویل چې وضعیت «ډیر خراب» دی او د بریښنا او انټرنیټ اړيکه پري شوی ده. هغه زیاته کړه: «دا تر ټولو لوی سیلاب دی چې موږ په کلونو کې لیدلی دی.»
د ژغورنې عملیاتو په لړ کې سرتیري ورک شوي
د ليبيا د وسله والو ځواکونو يوه وياند احمد المیسماري وويل، د ژغورنې عملياتو پر مهال يې له پنځو سرتېرو سره اړيکې پرې شوې دي. د چارواکو په وینا په هغو سيمو کې چې لاس رسی ورته سخت دی، له نورو سيمو سره یې تماس پرې شوی دی. د ژغورنې ډلې د پوځ په ملاتړ دوی ته د رسیدو هڅه کوي.
«دانیل» طوفان تر دې مخکې په یونان، ترکیې او بلغاریا کې له سختو بارانونو سره مل وو او د ویجاړونکي سیلابونو لامل شو، په ځانګړې توګه د يونان په تیسالي کې. د یکشنبې تر ورځې پورې، یوناني چارواکو د ۱۵ مړینو راپور ورکړی وو، او د مدني خوندیتوب د معلوماتو له مخې دوه کسان لا تر اوسه لادرکه دي. د چارواکو په وینا په ترکیه او بلغاریا کې دولس تنه وژل شوي دي.