په مرسېل کې د چاقو بريد پايله کې دوه تنه ووژل شول
۱۳۹۶ مهر ۹, یکشنبه![Frankreich Marseille Messerattacke Bahnhof Saint-Charles](https://static.dw.com/image/40768349_800.webp)
اعلان
د پوليسو په حواله ښايي دغه بريد تروريستي انګيزه ولري. ويل کيږي چې بريدکوونکي د «الله اکبر» ناره کوله. د سېنتينل په نوم د ترهګرۍ ضد عسکرو پر بريدکوونکي ډزې وکړې او هغه يې وواژه. امنيتي کړيو ويلي چې بريدګر «خنثی» کړل شوی دی. د ترهګرو پېښو ارزونکې د پاريس لويې څارنوالۍ د دغې پېښې په اړه لا پلټنې نه دي پيل کړي. د ماسپښين په موده کې له عدلي چارواکو څخه داسې اورېدل کېدل چې د پېښې ارزونه لا جريان لري. د فرانسې د کورنيو چارو وزير، ژېرارد کولومب، د تويتر د لارې اعلان کړی دی چې د فرانسې په سويل کې پروت د مرسېل ښار ته به ډېر ژر ورشي. له دې وروسته د فرانسې ولسمشر، امانويل مکرون، هم وويل چې هغه د چاقو په واسطه د «بربري» بريد له کبله چې په پايله کې يې دوو ښځو خپل ژوند له لاسه ورکړی دی «خورا راپارېدلی او په غوسه» دی.