د متحده ایالاتو ولسمشر ترمپ ویلي دي چې هغه د نیکي هیلي استعفا منلې ده. د هغه په خبره هیلي نیم کال مخکي ده ته د خپلې دندې د پریښودو هیله څرګنده کړې وه. د ترمپ په خبره هیلي فوق العاده کار وکړ. ترمپ به د نیکي هیلي د ځای ناستي د ټاکلو په هکله په راتلونکو دوو یا درو اونیو کې پریکړه وکړي. ترمپ هیله څرګنده کړې چې هیلي په یوه بل موقف کې بیا وروګرځي.
نیکي هیلي بیا ویلي دي چې نه غواړي په ۲۰۲۰م کال ولسمشرۍ ته ځان کاندید کړي، بلکې غواړي د ترمپ د بیا ځلې ټاکل کیدو له پاره هلې ځلي وکړي. هغې ویلي دي چې «دا مهمه ده چې څوک پوه شي چې کله د تګ وخت رارسیدلی دی.»
نوموړي محافظه پاله جمهوري غوښتونکي چې د ترمپ پر وړاندې يي وفاداري وښوده، د ولسمشریزو ټاکنو د انتخاباتي کمپاین دمخه د ترمپ په ملاتړو کې نه شمیرل کیده. هغه متحده ایالاتو ته د یوه کډه شوي سک پلار لور ده، چې په سویلي کارولینا کې زیږیدلې ده او بیا وروسته عیسویت ته اوښتې ده.
مخکې له دې چې په ۲۰۱۰م کال کې نیکي هیلي د سویلي کارولینا ګورنره شي، د خپل ایالت استازې وه. د ۲۰۱۷م کال په جنورۍ میاشت کې سنا مجلس په ملګرو ملتونو کې د هغې استازیتوب تائید کړ. په امريکا کې دغه څوکۍ ډیره مهمه بلل کيږي.
استعفاوې او له دندو ګوښه کول
نیکي هیلي د هغو مامورینو په ډله کې راځي چې د ترمپ له ادارې څخه یا وخت ترمخه تلل غواړي او یا هم باید تللي وای. د هغو کسانو په نوملړ کې چې د ۲۰۱۷م کال په جنورۍ کې د ترمپ د واکمنۍ له پیلیدو راهیسې یا یي باید استعفا کړې وای او یا باید ایستل شوي وای پر نورو سربیره د ترمپ امنیتي سلاکاران مایکل فلن او مک ماسټر، د ترمپ د اړیکو د نیولو چارو مشره هوپ هکس او همداشان د بهرنیو چارو وزیر ریکس تیلرسن شامل دي.
زموږ له آرشیف څخه:
له دندې ګوښه شوې! د ترمپ د ادارې تلفات
د امریکا ولسمشر ترمپ تر بل هر چا ژر د سپنې ماڼۍ کارکوونکي یو په بل پسې له دندې ګوښه کوي. په دې انځوریز البوم کې تراوسه پورې د هغه د ادارې تلفات در پیژنو.
انځور: picture-alliance/AP Photo/C. Pizzello/Invisionبینون سپینې ماڼۍ ته د ترمپ په رسولو کې ډیر مهم رول لوبولی، خو ان د ترمپ د ستراتیژۍ مشر هم په سپینه ماڼۍ کې یو کال پوره نکړ. بینون د اقتصادي نیشنلزم او د ترمپ د «امریکا لومړي» شعار په برخه کې ډیر فعالیت کوو. بینون تیره اونۍ تر یو لړ جنجالونو وروسته له دندې ګوښه کړل شو او بیرته خپلې پخوانۍ دندې ته ګرځیدلی. تر دې مخکې هغه د برایتبارت په نامه د یوې انترنتي خبرې پاڼې مشر وو.
انتوني سکاراموچي ۵۳ کاله عمر لري او یوازې د ۱۰ ورځو له پاره د سپینې ماڼۍ د اړیکو د مسؤل په توګه یې کار وکړ. د نیویارک ښار اوسیدونکي سکاراموچي پس له ډیرې مودې خپل د خوښې دنده ترلاسه کړه، خو هغه یوازې لس ورځې تر کار کولو وروسته له دندې لیرې کړل شو.
والټر شاوب د امریکا د حکومت د اخلاقي مسائلو د حکومتي ادارې پخواني مشر د جولای په میاشت کې له خپلې دندې د ولسمشر ترمپ د جنجالي مالي سرچینو له امله استعفا ورکړه. ویل کیږي چې شاوب د ترمپ ادارې ته د «خندا د بوجۍ» کلمه کارولې وه.
د سپینې ماڼۍ د دفتر پخوانی مشر راینس پریبس یوازې تر شپږو میاشتو کار کولو وروسته له دندې ګوښه کیدو ته اړ کړل شو. ویل کیږي چې پریبس د هغو کسانو له ډلې څخه وو چېد ساکاراموچي له ګمارلو سره یې مخالفت ښوولی وو.
شان سپایسر د سپینې ماڼۍ ویاند هم له ولسمشر سره د سپینې ماڼۍ د اړیکو د چارو د مسؤل په توګه د سکاراموچي پر ټاکنې سخت جنجال کړی وو. هغه وروسته له هغه چې له رسنیو او ترمپ سره یې اړیکې خرابې شوې، له خپلې دندې استعفا ورکړه.
د سپینې ماڼۍ د اړیکو له پخوانۍ مشر مایکل ډوبکه څخه د مې په میاشت کې هغه وخت د استعفا غوښتنه وشوه چې پر نوموړې باندې د امریکا په ټاکنو کې د روسیې د لاس وهنو د تورونو د نیمګړي مدیریت له کبله نیوکې وشوې.
د امریکا ولسمشر دونلد ترمب د اف بي آي پخوانی مشر جیمز کومي وروسته له هغې له دندې ګوښه کړ چې پر نوموړې باندې د هیلري کلنټن د ایمیلونو د څیړنو له امله نیوکه وشوه. انتقاد کوونکي بیا په دې باور دي چې د هغه د ګوښه کیدو تر شاه اصلي دلیل د ترمپ د کمپاین د ټیم او د روسیې د اړیکو د څیړلو موضوع وه.
د ترمپ د ملي امنیت سلاکار، مایکل فلین په فبروري میاشت کې وروسته له هغې استعفا وکړه چې پر روسیې باندې د بندیزونو له امله نوموړي د روسیې له سفیر سره خبرې کړې وې. دغه خبرې واک ته د ترمپ تر رسیدو مخکې شوي او په هکله یې د امریکا مرستیال ولسمشر مایک پینس ته هم نیمګړي معلومات ورکړي وو.
