په ننگرهار کي بې پيلوټه الوتکي ۱۴ شکمن ياغيان وژلي
۱۳۹۴ تیر ۱۰, چهارشنبه![](https://static.dw.com/image/18246132_800.webp)
د ننگرهار ولايت د امنيې قوماندانۍ وياند حضرت حسين مشريقوال د چهارشنبې په ورځ د آلمان خبري آژانس ته ويلي دي چي د سه شنبې په ورځ د امريکا متحدو ايالاتو د بې پيلوټه الوتکي په بريد کي ۱۴ ياغيان ووژل سول.
د مشريقوال په خبره په دغه بريد کي چي په لعل پور ولسوالۍ کي د ياغيانو پر پټنځايونو باندي سوی دئ، ډېر نور وسله وال ياغيان ټپيان سوي دي.
د هغه په خبره په دغه هوايي يرغل کي د تروريستانو دوه پټنځايونه هم په بشپړه توگه ويجاړ سوي دي.
د ننگرهار ولايت لعل پور ولسوالي له پاکستان سره پوله لري او په دې وروستيو وختونو کي د ياغيانو د فعاليت مرکز گرځېدلی دئ.
ويل کيږي چي وسله وال ياغيان پر افغان امنيتي ځواک باندي د يرغل له پاره د سرحد له هاغاړي را اوړي.
دا لومړی وار نه دی، چي د ننگرهار په هغو ولسواليو کي چي ويل کيږي وسله وال ياغيان فعال دي د امريکا بې پيلوټه الوتکي بريدونه کوي.
نزدې يوه نيمه اونۍ دمخه هم د دغه ولايت په اړوندو سيمو کي پر وسله والو ياغيانو باندي د امريکا د بې پيلوټه الوتکي په بريد کي د دبانديو جنگياليو په گډون ۱۵ وسله وال ووژل سول.
له هغه وروسته چي د ننگرهار په څو ولسواليو کي د افراطي ډلي «اسلامي دولت» (داعش) د فعاليتونو خبرونه خپاره سول، د دغه ولايت د څو سرحدي ولسواليو د امنيت په اړه اندېښنې نوري هم زياتي سوې.
څو ورځي دمخه د ننگرهار ولايت اوسېدونکو خبر ورکړ چي د دغه ولايت له نا آرامو ولسوالیو څخه په سوونو کورنيو کډه کړې ده.