په هسپانیې کې یو شمیر ترسره کیدونکي فیستیوالونه په ټوله نړۍ شهرت لري. په دوی کې یو هم د «ټوماټینا فیستيوال» په نوم د رومیانو د جګړې فیستیوال دی. د فیستیوال ګډون کونکي چې نیمه لوڅې جامې یې پر تن وي پر یو بل د رومیانو ګوزارونه کوي.

په پنځوسمه لسیزه کې د څو کلونو له پاره پر دې دود یا فستيوال بندیز ولګول شو، خو وروسته یې بیا بیرته د لمانځنې لړۍ پیل شوه. په دې کلني دود کې د ګډون کونکو شمیر زرګونو کسانو ته رسیږي.

د فیستیوال پر مهال په یوه لارۍ کې په ټنونو رومیان بار کړای شوي وي چې د «بونول» پر تنګو سړکونو تیریږي. هڅه کیږي چې د سړک پر غاړې ولاړ کسان په رومیانو وویشتل شي. د رومیانو فیستیوال په ۱۹۴۵ م کال کې پيل شوی دی او هر کال د اګست میاشتې په وروستۍ چهارشنبه کې ترسره کیږي.

د «بونول» د سیمه ایزو چارواکو په حواله په دې وروستیو کلونو کې د ځای د نشتوالي له امله دغه دود کم رنګه شوی دی. د نندارچیانو د شمیر د زیاتیدو له امله د خطر ګواښ هم زیاتیږي، خو تر نویو اقداماتو وروسته به دغه فیستیوال په لا زیاتې په زړه پورې طریقې سره ترسره شي.

ټوماټینا فیستیوال د جنوني حالت له کبله ځانګړی شهرت لري او له همدې امله د نړۍ له مختلفو برخو څخه سیلانیان د دې فیستيوال د نندارې له پاره هسپانیې هیواد ته مخه کوي.

د نړۍ له مختلفو برخو څخه د راغلو نندارچیانو په بدن او جامو یوازې د رومیانو اوبه، تخم او پوټکي لیدل کیږي.

د فیستیوال پر مهال د سیمې اوسیدونکي د خپلو کورونو او دوکانونو د خوندي ساتلو په موخه دروازې یې تړلي ساتي.

چارواکو د دې فیستيوال د تنظيم، امنیت او له ګډون کونکو څخه د فیس اخیستنې مسئولیت یوې شخصي کمپنۍ ته سپارلي چې له دې کار سره ډیر سهولت رامنځته شوی دی.

۲۷ کلنه جیسکا له امریکا څخه په دې فیستیوال کې د ګډون کولو له پاره هسپانیې ته راغلې ده. دا وایي چې په رومیانو د یو چا ویشتل او هغه هم کله چې نښه په خپل ځای ولګیږي، ډیر خوند کوي. رومیان د باران د څاڅکو په څیر وریږي.

جیسیکا وایې چې له یوې خوا دا فیستیوال تفریح او له بلې خوا ویره هم موجوده وي: «که تاسې د رومیانو د پورته کولو له پاره ښکته شئ شاید دوباره د پورته کیدو چانس دې کم وي، ځکه بیروبار او ټیل ماټیل زیات وي».

بل لور ته د خوراکي موادو د ضایع کیدو ضد فعاله بنسټونه پر دې دود ډیرې سختې نیوکې کوي. د دوی په خبره په دې ډول د رومیانو له ضایع کولو څخه ښه به دا وي چې هغه مستحقو کسانو ته ورسول شي.