په هندوستان کې ظاهراً د سیاسي دښمنیو له کبله لسو کورونو ته اور اچول شوی او د معلوماتو له مخې په دې پېښه کې لس ژوندي کسان هم سوځول شوي دي. دغې پیښې د هندوستان له کلکتې ښار نه نیولې تر نوي ډهلي پورې غبرګونونه راپارولي دي. په دې ترڅ کې د ځايي ایالات د والي او لومړي وزیر ترمنځ جنګي شخړه هم رامنځ ته شوې ده.

تر دغې پیښې وروسته د هندوستان د حکومت اپوزیسیون بهارتیه جنتا پارټي د ځايي حکومت د ګوښه کولو غوښتنه کړې ده. د هندوستان د کورنیو چارو وزیر امیت شا بیا چارواکو ته ۷۲ ساعتونه وخت ورکړی څو د پیښې په هکله رسمي راپور وړاندې کړي. زیاته شوې چې د پیښې د څیړنې له پاره د دغه ایالت د پولیسو د مشر په مشرۍ یو پلاوی ټاکل شوی ترڅو یاده پیښه وڅیړي.

د کورونو او خلکو سوځولو دغه پیښه د سه شنبې په ورځ د مغربي بنګال په بهوم سیمه کې رامنځ ته شوې ده. تر دې وړاندې د دوشنبې په ورځ د ترنمول ایالت د کانګرس غړی پردهان بهادو شیخ، چې د همدې کلي اوسیدونکی دی د یوه نامعلوم کس له لوري وژل شوی وو. تر پیښې وروسته، یو شمیر قهرجنو کسانو پر دغه کلي برید کړی او یو شمیر کورونو ته یې اور اچولی وو.

د معلوماتو له مخې په دغه پیښه کې د دوو ماشومانو په ګډون لږ تر لږه اته کسان ژوندي سوځیدلي او خپل ژوند یې له لاسه ورکړی دی. یو شمیر نورې سرچینې بیا په دې پیښه کې د ۱۲ کسانو د وژل کیدو خبر ورکوي. د بي جي پي ګوند غړي او د پارلمان وکیل لاکټ چټرجي بیا په دې پیښه کې د ۲۰ کسانو د وژل کیدو ادعا کړې ده. په دې ترڅ کې تر سوځول کیدو مخکې د یادو کسانو د وژلو ادعاوې هم شوي دي.

د سیمي د پولیسو چارواکو ویلي چې د اور اچونې په دې پیښه کې اوه تنه د پیښې په سیمه کې وژل شوي او درې تنه نور ټپیان بیا روغتون ته انتقال شوي دي. پولیسو همدا راز ویلي چې د پیښې په تړاو یې یو شمیر کسان هم نیولي دي.