په هند کې افغان محصلين د ویزو او بورسیو د تمدید غوښتونکي دي
۱۴۰۲ شهریور ۲۳, پنجشنبه![Indien | afghanische Studenten | Protest](https://static.dw.com/image/66807063_800.webp)
هند په تیرو وختونو کې د افغانستان په څیر هیوادونو څخه په زرګونو زده کونکو ته د لیسانس او ماسټرۍ په کچه د لوړو زده کړو لپاره بورسیي ورکړي دي. په افغانستان کې د طالبانو تر واکمنۍ مخکې هند هر کال دغه هېواد ته زر تحصیلي بورسیې په پام کې نیولې. خو وروسته له دې چې طالبانو د ۲۰۲۱ کال د اګسټ په میاشت کې واک ترلاسه کړ، ډېری محصلان سره له دې چې بورسیې یې ختمې شوي، په هند کې پاتي دي. دوی په افغانستان کې د طالبانو د څارنې او ځورونې او یا بیکاري او اقتصادي کړکېچونو له امله خپل هېواد ته له ستنېدو وېره لري.
په نوي ډيلي کې د افغان محصلانو له ټولنې څخه ارسلان قیوم وویل: «د هند حکومت د روان کال لپاره تحصیلي بورسیې چې د جولای میاشت کې پیل شوې، ور نه کړې. موږ وروسته له دې چې د وېزو د اعتبار موده مو پای ته ورسېده، تل د پولیس لخوا د نیول کېدو له وېرې په ډار ژوند کوو.» قیوم وویل: «په هند کې افغان محصلين نه تحصیلي وېزې ترلاسه کوي او نه هم د کار اجازه لري.»
د هند د بهرنیو چارو وزارت د فرهنګي چارو د اړېکو شورا (اي سي سي آر) عمومي مدیر کمار توحین وویل: «موږ درک کوو چې افغان محصلين له ستونزو سره مخامخ دي، خو حکومت په جدي توګه هڅه کوي چې د دوی اندېښنو ته رسېدنه وکړي.» هغه زیاته کړه چې یاد محصلين به مجبور نه شي چې له هنده ووځي او د بهرنیو چارو وزارت لخوا به ډېر ژر د تحصیلي بورسیو په اړه پرېکړه وشي.
په تېرو وختونو کې د هند د فرهنګي اړېکو له شورا څخه د پوهنتون په لګښت سربېره په هره میاشت کې له ۲۵ زرو (۳۰۱ ډالر) تر ۲۸ زرو او ۵۰۰ هندي روپیو پورې ورکول کېدې. خو افغان محصلين وایي چې دوی په دوو وروستیو کلونو کې د یادو مرستو په ترلاسه کولو کې له ستونزو سره مخ شوي او ډېری خپلې زده کړې پرې اېښي یا هم نورو هېوادونو ته تللي دي.
پروانه حسیني چې په ۲۰۱۶ کال کې هند تهد زده کړو لپاره تللې ده، وايي: «زه غواړم خپلو زده کړو ته دوام ورکړم، حکومت زموږ بورسیه نه ده غځولې. زه نه غواړم افغانستان ته ولاړه شم او غواړم چې لا نورو لوړو زده کړو ته دوام ورکړم.»