په زرونو پاکستانیان چې له خپلو کورونو د مهاجرت په نېت وتلي، د یوه ښه ژوند د موندلو له پاره یې منزل آلمان او نور لویدیځ اروپایي هیوادونه ول. خو ښایي د چا په فکر کې هم نه وي گرځیدلي چې د ژوندانه په بیه د سختو لارو وهلو وروسته به په آتن کې د مهاجرو په یو کمپ کې تشنابونه پاکوي.

زیاتره پاکستاني مهاجر چې د پنجاب ایالت دي، وايي د یوې ښې راتلونکی خوب انساني قاچاقیانو انځور کړی وي. تر آلمانه د رسیدو لومړی لگښت د سړي پر سر پنځه لکه کلداري ښوول شوې وې، او کابو له هر چا څخه دغه پېسې تر مخه اخیستل شوې وې. خو کله چې هغوی یونان ته ورسیدل نو د وړاندي تگ ټولې لارې بندې شوي وې او هغه مهال د قاچاقبرانو ټولي ژمنې دروغ وختې.

د سوریې او نورو جگړو ځپلو هیوادونو مهاجرو ته د بالکان هیوادونو له لاري اجازه ورکول کیږي چې جرمني او نورو اروپایي هیوادونو ته ولاړ شي. د اروپایي حکومتونو له نظره زیاتره پاکستاني اتباع یوازې د اقتصادي ستونزو له کبله خپل هیواد پریږدي. له دې کبله په اروپا کې هغوی ته د پناه ورکولو چانس لږ دی. خو زیاتره پاکستانیان شکایت کوي چې په یونان کې چارواکي له دوی سره ناروا او توپیري چلن کوي.

په لسونو پاکستاني مهاجر وایي چې یوناني چارواکي په کمپونو کې د پاکوالي کار یوازې دوی ته سپاري. دوی ته ویل شوي دي چې پاکستاني اتباعو ته په عمومي شکل د مهاجرو په کمپونو کې د اوسیدو اجازه نه شته. خو هغوی ته په کمپونو کې مؤقتي پناه یوازي په دې شرط ورکړل شوې ده چې د پاکۍ کار به کوي.

په سونو پاکستاني مهاجر له یونان څخه د وړاندي سفر تر بندېدو وروسته اوس بیرته خپل وطن ته ستنیدل غواړي. د یوې یونانۍ ویب پاڼې د رپوټ له مخې تیره اوونۍ دوو پاکستانیانو د ځان وژلو هڅه هم کړې وه.

په یونان کې د پناه په لټه کې زیاتره پاکستانیان وایي چې په مهاجر کمپونو کې دوی ته ورکول کیدونکي خواړه ډیر لږ وي او کیفیت یې هم ښه نه وي. دغسې ډېرو مهاجرو وویل چې د ژوندي پاتېدو له پاره د ورځې یو وخت ډوډۍ تر لاسه کوي. په دغسې یوه حالت کې ډېر خلک د روحي ناروغیو تر څنگ په جسماني توگه هم ډنگر او ناروغه شوي دي.

د ډیرو نا امیده شویږ پاکستاني مهاجرو له پاره تر ټولو ځورونکی پړاو دا دی چې د سفري اسنادو د نه لرولو له کبله اوس په عاجل ډول خپل هیواد ته هم نه شي تلای. د هغوی په وینا په آتن کې د پاکستان سفارت له خوا هغوی ته د مؤقتي اسنادو ورکولو بهیر ډیر اوږد او لویه حوصله غواړي.

د پاکستان د گجرات سیمې ۴۱ کلن اوسیدونکی سجاد شاه، هم خپل هیواد ته ستنیدل غواړي. څو میاشتې کیږي چې سجاد شاه چې د درو ماشومانو پلار دی له خپلې کورنۍ بیل شوی دی او نن ورځ یې مالي ستونزې تر پخوا ډیرې دي. هغه وایي کله چې په کمپونو کې ماشومان وویني چې لوبي کوي نو خپل ماشومان وریادیږي او له همدې وجې بیرته خپل کور ته ستنیدل غواړي.

د نورو هیوادونو وگړو ته یوناني چارواکو په پخو کورونو کې ځای ورکړی دی، خو زیاتره پاکستانیان په مؤقتي خیمو کې چې پکښې په ډله ایز توگه خلک اوسیږي، ژوند کوي. دا حالت د هغوی له پاره ځکه د اندیښنې وړ دی چې د اروپا له سړې هوا سره نا آشنا دي.

په یونان کې دغه پاکستانیان وایي، چې سفارت ته یې د سفري اسنادو د ورکولو عریضه ورکړې ده او د څو میاشتو تر تیریدو وروسته هم یوازې انتظار باسي. د یوه مهاجر په وینا څو کسانو د مهاجرت نړیوالي ادارې څخه هم خپل هیواد ته د بیرته ورگرځیدو په برخه کې د مرستې غوښتنه کړې خو هغوی ورته ویلي دي چې سفري اسناد یوازی د پاکستان سفارتي نمایندگۍ ورکولای شي.

په یونان کې ډیر پاکستاني مهاجر د اسلام آباد له حکومته غوښتنه کړې ده چې ژر بیرته خپل هیواد ته د ستنیدو له پاره عملي گامونه واخیستل شي. دغه کسان ادعا کوي چې په آتن کې د پاکستان سفارت «پر تکراري ژمنو سربیره هم مناسبه مرسته نه کوي.»