د يونان حکومت وايي چي هغه مهاجر چي په دغه هيواد کي بند پاته دي شمېر يې ۵۴۰۰۰ زره دی. د يونان اړونده دولتي وزير جيانيس ماوسالاس د سه شنبې په ورځ (د ۲۰۱۶ کال د اګست ۲۳مه نېټه) دغه اعداد او شمېرې وړاندي کړې.
د روان مېلادي کال په پېل کي د مهاجرو پر مخ د بالقان مسير د تړل کېدو راهيسي د خپل طرز دغه لومړۍ اعداد او شمېرې دي چي د يونان حکومت وړاندي کړې. يونان په دغو کي د هغو مهاجرو حساب نيولی چي غوښتل يې د بالقان له لاري نورو اروپايي هيوادونو لکه آلمان ته ځان ورسوي، خو د بالقان مسير د بندېدو له کبله په يونان کي بند پاته دي.
د دې څخه تر مخه چي د ۲۰۱۶ کال په پېل کي د بالقان مسير وتړل سي، پر دغه مسير تر يو مليون څخه زيات پناه غوښتونکي و شمال لوېديځي اروپا ته واوښتل.
ماوسالاس وويل چي د يونان چارواکي په دې توانېدلي چي په تيرو مياشتو کي تر يوې اندازې د مهاجرو د ثبتولو په ترڅ کي «په ګډوډي کي نظم» رامنځ ته کړي. کله چي د مارچ په مياشت کي د بالقان مسير وتړل سو نو يونان يو شمېر نور اضافه مهاجر کمپونه فعاله کړل.
کله چي د مارچ په ۱۸مه نېټه د اروپايي اتحاديې او ترکيې تر منځ د مهاجرو پر سر تړون وسو، نو په يونان کي د پناه غوښتنې شمېرې جګي سوې. دا له دې کبله چي د ياد تړون له مخي هغه پناه غوښتونکي چي د ترکيې څخه و يونان ته راغلي وي او په يونان کي يې د پناه غوښتنه نه وي کړې، نو هغوی به بېرته ترکيې ته لېږدول کيږي. دا د دې لامل سو چي زياتو پناه غوښتونکو و ترکيې ته د بېرته لېږدول کېدو د مخنيوي له پاره په يونان کي د پناه غوښتنه وکړه.
د جون د مياشتي راهيسي د يونان چارواکي د پناه غوښتنې د غوښتنليکونو مقدماتي پلټنه کوي چي له هغه څخه څرګنده سوې چي د پناه غوښتونکو څخه به تقريبا څلورمه برخه قبولي تر لاسه کړي چي په دغو کي به ۵۴ سلنه سوريايان، ۲۷ سلنه افغانان او ۱۳ سلنه عراقيان وي.
پر ورته موضوع یو انځوريز البوم زموږ له آرشيف څخه (16.03.2016):
له ايدوميني د مهاجرو تېښته ـ «وهل ټکول او سوځل»
د دوشنبې په ورځ تر ۲۰۰۰ زياتو مهاجرو له ايدوميني کمپ څخه د مقدونيا پر لور څلور ساعته سفر پېل کړ. په دغه ورځ د درو پناه غوښتونکو د ډوبېدو خبر هم ورکړل سو. خو مقدونيا ته اکثره رسېدلي مهاجر پوليسو ونيول.
انځور: DW/D.Tosidisمقدونيا ته د داخلېدو نقشه
د ايدوميني په کمپ کي د په زرونو پناه غوښتونکو تر منځ د نامعلومو کسانو له خوا داسي شپې پاڼي ووېشل سوې، چي پکښي نقشه او هدايات ليکل سوي ول چي د مقدونيا سرحد ته څرنګه اوښتلای سي.
په سونو پناه غوښتونکو چي پکښي داسي کورنۍ هم وې چي کوچنيان ورسره ول، د ايدوميني د مهاجر له کمپ څخه حرکت وکړ، څو د مقدونيا سرحد ته ور واوړي.
له اوبو، خټو او ډبرو سره مبارزه
دغو مهاجرو تر سيند پوري وتلو وروسته هڅه وکړه چي د مقدونيا پر سرحد درول سوو خنډونو تر منځ داسي ځای پيدا کړي، چي ترې تير سي.
يوه کوچنۍ مهاجره چي له اوبو څخه وېره لري، نور پناه غوښتونکي مرسته ورسره کوي، څو تر سيند واوړي.
د يونان پوليسو هڅه وکړه چي د سونو هغو پناه غوښتونکو مخه ونيسي چي غوښتل يې مقدونيا ته د ورننوتلو لاره پيدا کړي.
په يونان کي د کاميلو په نوم کلي اوسېدونکي د مهاجرو تر منځ د هغوی د اوږد پلي سفر په جريان کي اوبه ويشي. دغه کلی له سرحد څخه په ۱،۵ کلومترۍ کي پروت دی.
تر اوږده پلي مزل او سفر وروسته ستړي او کمزوره سوي پناه غوښتونکي د خپل ژوند په بيه تر سيند پوري ووتل. په دغه ورځ د درو افغان مهاجرو د ډوبېدو خبر ورکړل سو.
د مقدونيا دغه ځايي سړی چي د مويي په نوم کلي اوسېدونکی دی، د پناه غوښتونکو د قطار په ليدو سره ښايي د تليفون له لاري د مقدونيا پوليسو ته خبر ورکوي.
کله چي مهاجرو د مقدونيا تر سرحد تېر سول او دغه هيواد ته داخل سول، نو ډېر ژر هلته عسکر هم ورسېدل.
د افغان مهاجر «وهل، ټکول او سوځل»
یو افغان مهاجر تور لګوي چي د مقدونيا پوليسو تر نيولو وروسته وواهه او وې ټکاوه. نوموړی تور لګوي چي پوليسو هغه وسوځاوه. د مقدونيا سرحد ته نژدې په يونان کي ډېر بند پاته مهاجر افغانان دي.
