د افغانستان د کریکټ د ملي لوبډلې غړی حضرت الله ځاځی اوسمهال په متحده عربي اماراتو کې دی او د ټي ۱۰ یا T10 په نامه په لس اوریزو سوداګریزو سیالیو کې د ماراتا عربین لوبډلې له پاره لوبیږي. د متحده عرب اماراتو په شارجه ښار کې د ټي ۱۰ سیالیو په لړ کې د مراتا عربین او بینګال ټایګرز لوبډلو سره بخت و آزمویه. په دې لوبه کې حضرت ځاځي په کمه موده کې د هسکو شپږیزو او څلوریزو پر مټ ۷۶ منډې جوړې کړې او خپله لوبډله ماراتا عربین یې بریا ته ورسوله.
تر دې وړاندې د دې سیالیو په لومړۍ لوبه کې د افغانستان د کریکټ د ملي لوبډلې بل تکړه توپ وهونکي یا بیټسمن شهزاد محمدي یوازې په ۱۶ توپونو ۷۴ منډې کړې وې. ځاځي په دې لوبه کې یوازې په ۲۷ توپونو نیمه سلیزه ووهله او خپلې لوبډلې ته یې خورا ارزښتناکې منډې وکړې.
د ځاځي نړیوال ریکارډونه
حضرت ځاځي تر دې وړاندې د افغانستان په پریمیر لیګ سیالو کې یو بل نړیوال ریکارډ په خپل نامه ثبت کړی دی. نوموړی د یووراج سنګ او کریس ګیل ترڅنګ دریم نړیوال لوبغاړی دی چې په ۲۰ اوریزو سیالیو کې یوازې په ۱۲ توپونو چټکه نیمه سلیزه پوره کوي.
د ټي ۱۰ سیالیو په پرونۍ او دوهمه لوبه کې بینګال ټایګرز د ۷ لوبغاړو په سوځیدو سره ۹۱ منډې وکړي. د دې لوبې پچه یا ټاس عربین لوبډلې ګټلی وو او په خپله یې د توپ اچونې یا فیلډنګ پریکړه وکړه. د بینګال لوبډلې له پاره محمد نبي هم ۱۶ ارزښتناکې منډې وکړې چې بیا وروسته د راشد خان په توپ وسوځید.
د ماراتا عربین لوبډلې د ټاکل شوي ۹۲ منډو هدف د ترلاسه کولو له پاره حضرت ځاځی د خپلې لوبډلې له پاره د منډو په جوړولو پیل وکړ او د هغه په مقابل کې د افغانستان د ملي لوبډلې بل تکړه لوبغاړی مجیب ځدراڼ ولاړ دی او هڅه کوي چې د ځاځي ویکټ ترلاسه کړي او خپلې لوبډلې ته بریا په برخه کړي. ځاځي د مجیب الرحمن په ګډون د مقابل لوري پر یوه توپ اچونکي رحم ونه کړ او یو په بل پسې یې شپږیزې او څلوریزې وهلې. په دې لوبه کې څو ځله د ځاځي بخت ځان وښود او څو ځله یې کیچونه ډراپ یا ولویدل.
په دغه سوداګریز لیګ کې د کریلا کینګ، کراچینز، پښتون، راجپوت، پنجاب لیجیندز، مراتا عربین، بینګال ټایګرز او نارترن واریرز په نامه لوبډلې یو له بل سره سیالي کوي او په دې لوبډلو کې ۱۲ افغان لوبغاړي د مختلفو لوبډلو له لوري اخیستل شوي دي.
زموږ له آرشیف څخه:
د ۲۰۱۹م کال په نړیوال جام کې افغانستان له کوم هیواد سره او کله لوبې لري
د کریکټ نړیوالې شورا په ۲۰۱۹م کال کې د مې میاشتې له ۳۰ مې نه د جولای میاشتې تر ۱۴ پورې د نړیوال جام د سیالیو رسمي مهالویش اعلان کړ. په دې انځوریز البوم کې به وګورئ چې افغانستان له کوم هیواد سره او کله لوبیږي. په لومړي پړاو کې نهه لوبې افغانستان د کریکټ نړیوالې شورا د ۲۰۱۹م کال د نړیوال جام په لومړي پړاو کې چې د مې میاشتې له ۳۰ مې نه د جولای میاشتې تر ۱۴ پورې تر سره کیږي ټول ټال نهه لوبې ترسره وي.
۱. افغانستان د آسترلیا پر وړاندې په دې سیالیو کې د افغانستان لمړنۍ لوبه د جون میاشتې په لومړۍ نیټه او د شنبې په ورځ د آسترالیا پر وړاندې ده. دغه مهمه لوبه به د انګلستان په بریستول کونټی کریکټ لوبغالي کې ترسره شي.
انځور: Getty Images/Paul Kane ۲. افغانستان د سریلانکا پر وړاندې دوهمه لوبه بیا د جون میاشتې په ۴ نیټه د سه شنبې په ورځ له سریلانکا سره پلان شوې. دغه لوبه به په کاردیف والز ستدیوم کې ترسره شي.
انځور: picture-alliance/AP Photo/D. Manson ۳. افغانستان د نیوزیلاند پر وړاندې د افغانستان دریمه لوبه د جون په ۸ نیټه د شنبې په ورځ له نیوزیلاند سره ده چې د تنتون په کونتي لوبغالي کې به ترسره شي.
انځور: Reuters/D. Siddiqui ۴. افغانستان د سویلي افریقا پر وړاندې د افغانستان د کریکټ د ملي لوبډلې څلورمه لوبه د جون میاشتې په ۱۵ نیټه د شنبې په ورځ له سویلي افریقا سره پلان شوي. دغه لوبه به هم د کاردیف والز په ستدیوم کې ترسره شي.
انځور: Getty Images/AFP/R. Brooks ۵. افغانستان د انګلستان پر وړاندې په دې سیالیو کې د ا فغانستان پنځمه لوبه د جون میاشتې په ۱۸ نیټه د سه شنبې په ورځ د انګلستان پر وړاندې ده. دغه لوبه به د اولد ترافورد په لوبغالي کې ترسره شي.
انځور: Getty Images/G. Copley ۶. افغانستان د هندوستان پر وړاندې د افغانستان شپږمه لوبه بیا د هندوستان پر وړاندې د جون میاشتې په ۲۲ نیټه او د شنبې په ورځ پلان شوې. دغه لوبه به د انګلستان په همپشیر باول لوبغالي کې ترسره شي.
انځور: Getty Images/D. Kalisz ۷. افغانستان د بنګله دیش پر وړاندې د دې سیالیو په لړ کې د افغانستان اوومه لوبه د بنګله دیش پر وړاندې ده. دغه لوبه به د جون میاشتې په ۲۴ نیټه او د دوشنبې په ورځ ترسره شي. دغه لوبه به هم د همپشیر باول په لوبغالي کې ترسره شي.
انځور: Reuters ۸. افغانستان د پاکستان پر وړاندې د افغانستان اتمه لوبه بیا د پاکستان پر وړاندې ده. دغه لوبه د جون میاشتې په ۲۹ نیټه او د شنبې په ورځ پلان شوې. یاده لوبه به د هیډینګلي په لوبغالي کې ترسره شي.
انځور: Dibyangshu Sarkar/AFP/Getty Images ۹. افغانستان د ویسټ انډیز پروړاندې په لومړني پړاو کې د افغانستان وروستی لوبه د ویست انډیز پر وړاندې پلان شوې. دغه لوبه به د جولای میاشتې په ۴ نیټه او د پنجشنبې په ورځ ترسره شي. د افغانستان دغه وروستی لوبه به هم د هیډینګلي په لوبغالي کې ترسره شي.
انځور: Getty Images/AFP/R. Brooks
