فرانسوي چارواکو د دوشنبې په ورځ(اکتوبر میاشتې ۱۴) په پاريس کې د پولیسو په یوه ماموریت کې د اکتوبر میاشتې پر ۳ نیټه د چړې په برید کې د لاس درلودلو په شک پنځه تنه نیولي دي. په دغه بريد کې څلور تنه وژل شوي ول.

دغه کسان د دوشنبې ورځې په سهار وختي د پاریس ښار په اطرافو کې نیول شوي دي.

د کمپیوټري پروګرامونو کارپوه میشایل هارپون، د اکتوبر میاشتې پر دریمه نیټه په پاریس کې د پولیسو په ماموریت کې پر خپلو همکارانو د چړې برید وکړ او څلور کسان یي ووژل. وروسته بیا هغه پخپله هم د پولیسو په ډزو کې ووژل شو.

پلټونکي په دې هڅه کې دي چې معلومه کړي آیا نوموړي کس دغه عمل په یوازیتوب سره کړی دی او که د یوه پلان شوي ترهګریز اقدام یوه برخه وه.

هارپون لس کاله مخکې مسلمان شوی وو او په مخ پر ډیریدونکي ډول یي افراطي نظر درلود. په نیول شویو کسانو یو تن د هغه جومات امام دی چې هارپون ورته ډیر تګ راتګ درلود. د نوموړي امام نوم د فرانسې د احتمالي امنیتي ګواښونو په لیست کې هم موجود دی.

kp/rt (AFP, Reuters)/sn/nz