د خبري آژانسونو د رپوټونو له مخې دغه کمپ چې د فرانسې د پلازمېنې پاریس په شمالي څنډه کې د مهاجرو د راجستر کیدو یوه مرکز ته څیرمه پروت وو د جمعې په سهار یې په خالي کولو پېل وشو. د ځایي چارواکو په وینا له دغه مؤقتي کمپ څخه د سیمي سپورتي جمنازیمونو ته د سرویسونو په واسطه د مهاجرو انتقالیدل د جمعې په سهار پیل شول. په ټوله کې په دغه ماموریت کې ۳۵۰ پولیسو ونډه درلوده. دا په تیرو دوو کلونو کې په پاریس کې ۳۵ وار دی چې دغسې یو ګام پورته کیږي.
مهاجر چې زیاتره یې د افغانستان، سومالیا، اریتریا او سودان هیوادونو سره تړاو لري، د پاریس ښار په شمالي څنډه کې د یوې لوی لارې تر پله لاندې د سړک پر غاړه مؤقتي کمپ جوړ کړی وو. په دغه سیمه کې د تیر میلادي کال په نومبر میاشتې کې د مهاجرو د ثبتیدو یو مرکز پرانیستل شوی وو، خو پاریس ته د ټولو راتلونکو پناه غوښتونکو له پاره یې بسنه نه کوله.
په اروپا کې د مهاجرینو د کړکیچ په ترڅ کې فرانسه د نورو اروپایي هیوادونو لکه آلمان او ایټالیې په څیر نه دی اغیزمن شوی. خو د دغو کسانو نورو مؤقتي سرپناو ته د انتقالولو په برخه کې بیا هم غټې ستونزې وي.
د جولای میاشتې په نیمایي کې له دې کبله حکومت اعلان وکړ چې په راتلونکو دوو کلونو کې د پناه غوښتونکو او قبول شوو مهاجرو له پاره ۱۲۰۰۰ سرپناوې برابرول غواړي. همدا څه موده وړاندې د فرانسې ولسمشر ایمانویل مکرون ویلي وو چې د روان میلادي کال تر پای پورې به هیڅ کوم مهاجار د سړک پر سر نه وي.
په ورته موضوع زموږ له آرشیف څخه د انځورونو گالري:
له ځنګل کمپ څخه پاريس ته او بيا ...
د فرانسې په کاله کې پولیسو لخوا د «ځنګل» موقت کمپ له ورانيدو وروسته، په زرونو مهاجر پلازمينه پاریس راوړل شول. خو لا هم زیات شمير مهاجر غواړي بيرته کاله ته ولاړ شي تر څو له هغه ځایه بريتانيا ته تللي وي.
انځور: Reuters/C. Platiau پاریس کې د مهاجرو د خيمو غورځول
د فرانسې پولیسو د پاریس ښار د ستالينګراد ميترو ستيشن ته نژدې د پياده روونو پر سر د مهاجرو درول شوې خيمې او د خوب لپاره هوارې کړل شوې دوشکې او بیسترې ټولې کړې. د کالې کمپ له ورانيډو وروسته پاريس کې د مهاجرو شمير تر ۳۰۰۰ پورې لوړ شو.
دا به د کمپ د پاک کارۍ وروستی ځل وي؟
مهاجرې ښځې په سړه هوا کې بسونو ته ولاړې دي تر څو یې د فرانسې ښار بلې سيمې ته د مهاجرو د پزيرش مرکز ته رسولي وي. په پاريس کې د مهاجرو کمپ په وروستيو مياشتو کې هم دوه ځله پاک کاري شوی وو. د پزيرش مرکزونه به په راتلونکې کې د موقتي کمپونو د جوړيدو مخنيوي وکړي.
په زرونو هغه مهاجر چې د «ځنګل» کمپ تر ورانيدو وروسته د فرانسې پلازمينې پاریس ته راغلي، په دې هيله دي چې بيرته کالي ته ولاړ شي، تر څو له هغه ځايه بريتانيا ته تللي وي.
د فرانسې حکومت لخوا په کالې کې د مهاجرو کمپ تر ويجاړيدو وروسته، یو شمير مهاجرو د پاريس ښار په کوڅو کې خپلې خيمې ودرولې. له همدې کبله اوس د فرانسې په کوڅو کې د مهاجرو شمير زیات شوی دی.
کوم مهاجر چې تيرکال فرانسې ته رسيدلي ول، اکثره یې د افغانستان، عراق، اريتيريا او سوډان هيوادونو څخه دي. دوي غالباً هڅې کړي تر څو د لاريو او نوور وسايطو په ذريعه د بريتانيا پر لور وتښتي.
يوه ډله ځوان مهاجر په کاله کې «ځنګل» کمپ ته نژدې ولاړ دي. د اکتوبر میاشت په ۲۶ مه، کله چې پوليسو له کمپ څخه د شاوخوا ۱۰ زره مهاجرو د وښکلو کار پیل کړ، کمپ ميشتو په اعتراض کې اورونو بل کړل.
مهاجر له کالې څخه د وتلو په حال کې
د فرانسې د کالې په «ځنګل» نومې کمپ کې شاوخوا لس زره مهاجر په دې اميد ميشت ول چې بريتانيا ته به ځي. چارواکو د فرانسې نورو سيمو ته د دغو مهاجرو د انتقال پر وخت هڅې وکړې، تر څو يې د اعتراضاتو د پيښيدو څخه مخنيوی کړی وي.
دا په کاله کې د «ځنګل» کمپ یوه برخه ده. په دغه کمپ کې مهاجر په ناپاکه کانتينرونو او خيمو کې په بد حالت کې ژوند کاوه. دغو خيمو د باد او لمر په مقابل کې ډیر کم مقاومت لاره.
د فرانسې ولسمشر فرانسوا اولاند وویل چې نور به څوک پرې نښودل شي چې د کالې د مهاجرو په کمپ کې له سره میشت شي. د «ځنګل»کمپ په اروپا کې د مهاجرو د بحران د سمبول په توګه بدل شو.
