د پنجاب ایالت د گجرانواله په شا او خوا سیمو کې سیلابونو ډیرې خرابۍ رامنځ ته کړی دي او په یو نیم ځایونو کې د کورونو د بامونو پر سر اوبه روانۍ دي. په دغه انځور کې گجرانواله ته څیرمه د وزیر آباد په سیمه کې یو مسجد په اوبو کې ډوب ښکاري.

د هر کال په شان سږ کال هم د سختو موسمي بارانونو له کبله د لاهور ښار د ایټالیې د وینس، ښار شکل غوره کړی وو چې خلک د پاخه سړک پر ځای د کښتیو په واسطه له یوه ځای څخه بل ځای ته تلل. په لاهور کې د کانال زیسیون سیستم په بشپړه توگه ناکاره شوی دی.

د پاکستان د پلازمینې اسلام آباد، په اطرافو کې یوه پوځي څرخي الوتکه د یوه کور پر چت موجود خلک یوه خوندي ځای ته انتقالوي. د سختو اورښتونو له کبله بې شمیره کلي اوبو لاندې شوي دي او ډیر شمیر کورونه بیا په بشپړه توگه له منځه تللي دي.

سږني موسمي اورښتونه دومره سخت ول چې د ډیری شمیر کلیو د اوبو لاندې کیدو سربیره په ښارونو کې هم ورته وضعیت وو. په دغه انځور کې ښکاري چې د راولپنډۍ ښار یو تن اوسیدونکی له خپل کور څخه د اوبو خالي کولو په حال کې دی.

د لاهور بې وسه ښاریان له یوه اړخه له کورونو اوبه د باندې باسې، او کورونه یې بیا له اوبو څخه ډکیږي، ځکه چې د کورونو د باندې هم هر لوري ته یوازې اوبه دي.

د لاهور په یو شمیر سړکونو او کوڅو کې څلور فوټه اوبه ولاړي دي. په دغسې یوه حالت کې پر موټر سایکل او یا هم موټر کې سفر نه شي کیدای. له دې کبله خلکو د تگ راتگ له پاره یو ځل بیا گاډیو ته مخه کړې ده.

د لاهور پر سړکونو هر لور ته اوبه تر سترگو کیږي. ویل کیږي چې د شاه جمال په ناحیه کې خلکو په وړو کښتیو کې تگ راتگ کاوه. د چناب، راوي، ستلج په سیندونو کې د اوبو سطحه لوړه او په یو شمیر نهرونو کې د درزونو له کبله ډیری شمیر کلي تر اوبو لاندې شوي دي.

په لاهور کې د یو شمیر زړو کورونو د چتونو د لویدو له کبله، یو شمیر انسانانو ته مرگ ژوبله هم اوښتې ده. په سړکونو او لارو کوڅو کې د اوبو له کبله خلک په خپلو کورونو کې بند پاتې شوي دي او یا باید د تگ پر مهال لکه چې په دې انځور کې ښکاري په څو فوټه اوبو کې تگ ته زړه ښه کړي.

د سیلابونو د راتلو له خبرونو سره سم د پاکستان پوځ هغو سیمو ته خپل سرتیري واستول چې د سیلابونو له کبله پکښې د زیان رامنځ ته کیدو امکانات وو. په دغه انځور کې يوه پوځي څرخي الوتکه د اسلام آباد په اطراف کې د مرستو رسولو په حال کې ده.

د سختو اورښتونو له کبله سړکونه تر اوبو لاندې شول او د یو شمیر موټرو ماشینونه هم ناکاره شول. په دغه انځور کې ښکاري چې د یوې رېکشا ماشین خراب شوی.

د لاهرر ښار یوه بله څنډه چې د بارانونو وروسته په سړک کې کنده جوړه شوې. کندې ته ورلویدلي موټر د راایستلو هڅه کیږي.

د لاهور ښار سړکونه پر سیندونو اوښتي دي. خلک د تگ راتگ پر مهال ډیر په احتیاط سره قدمونه اخلي، ځکه چې په هر ځای کې د پښې ښویدو امکان شته.

راولپنډۍ ته څیرمه له سیلاب څخه اغیزمن شوي یو شمیر خلک د خپلو کورونو د خرابیو تر څنگ ولاړ دي.

په لاهور ښار کې خلک د خپل ورځني ضروروتونو د پوره کولو له پاره مجبوره دي چې له کورونو راووځي او په اوبو کې مزل وکړي. په پورتني انځور کې لیدل کیږي چې یوه سړي خپل ماشوم په غیږ کې نیولی دی او له اوبو تیریږي.