د سیلاني توب له پاره د مشهور ټاپو پولیسو تیره اوونۍ دغه ۴۱ کلن پاکستانی نیولی دی. پر دغه کس تور دی چې په ۲۰۰۹م کال کې یې خپله میرمن په ډزو وژلې وه. د پاکستان تحقیق کوونکي تر څیړنو وروسته دې پایلې ته رسیدلی چې دغه کس له خپلو درو ملګرو سره په ګډه خپل میرمن وژلې وه.

چارواکو گومان کاوه چې مجرمین کيدای شي د نيول کيدو له ويري له هیواده وتښتي. پاکستان د دغو کسانو د نیولو له پاره په نړیواله کچه هلې ځلې کولې.

د شکمن قاتل د نیول کیدو له پاره په نړیواله کچه خبرداری ورکړل شوی وو او د نړۍ د نورو هیوادونو په څیر د هسپانيا د یوه کوچني سیاحتي ټاپو پولیس ته هم دغه راپور رسیدلی وو.

د مایورکا ټاپو د ځایي انټرنټ پاڼې «مایورکا سایټنګ» په وینا د چهارشنبې په ورځ د دغه ټاپو مرکزي ښار پالما، پولیسو یو راپور تر لاسه کړ چې په یوه څیرمه سیمه کې د میشت پاکستاني معلومات د هغه کس له معلوماتو سره سر خوري چې په نړیواله کچه یې د نیولو هڅې کیږي.

پولیسو ته تر شک پیدا کیدو وروسته هغوی د پالما ښار په ختیځه څنډه کې د دغه پاکستاني پر کور چاپه وهلې او هغه یې نیولی دی. د دغه کس د اسنادو تر پلټلو وروسته پولیسو هغه وپيژند.

د هسپانيا پولیس اوس پاکستان ته د دغه کس د استولو چمتووالی نیسي. پاکستان ته د سپارلو له پاره د پولیسو د اسنادو له مخې د میرمنې شکمن قاتل به محکمې ته وړاندې کیږي.

د دغه هیواد یوه محکمه به د پولیسو له لوري د دغه کس د اخراجیدو او پاکستاني چارواکو ته د سپارلو د عریضې په هکله پریکړه کوي.

دا لا روښانه نه ده چې د میرمنې د وژل کیدو په قضیه کې نور مطلوب کسان نیول شوي دي که نه.

زموږ له آرشیف څخه: