د ټاکنو سیاسي بحثونه له دفترونو نیولې ان تر چای خانو پوري رسېدلي دي.
پهپاکستان کې د سیاسي ګوندونو مشران له ټاکنو وړاندې په مختلفو غونډو کې پر خپلو سیاسي مخالفینو توهین امیزه نیوکې کوي.
خو دا سیاسي تاوتریخوالی یوازې تر بحثونو پورې محدود نه دی، بلکې په کراچۍ کې د تاوتریخوالي څو پېښو د خطر زنګونه پورته کړي دي.
په کراچۍ کې د کړکېچ فضا
د پاکستان په اقتصادي مرکز او کوچني پاکستان مشهور کراچۍ ښار کې دا مهال سياسي فضا ډېره کړکېچنه ده، پوليسو تېره ورځ د تحريک انصاف ګوند پر لاريون کوونکو د کوتکونو ګوزارونه وکړل چې په نتیجه کې یې لاریون کوونکو پر پولیسو د تیږو ګوزارونه کړي او په دې سره یاده سېمه د جګړې په ډګر بدله شوې. د پولیسو په خبره چې په یاده پېښه کې ایس ایچ اوبوټ بیسن په شمول یو شمیر پولیس هم ژوبل شوي دي. پولیسو تر ۲۰ زیات لاریون کوونکي نیولي دي.
بل لور ته تيره شپه په مرکزي ضلع کې «ایم کیو ایم پاکستان یا د پاکستان متحده قومي موومنټ» او پاکستان پيپلز پارټۍ د ملاتړ کوونکو ترمنځ وسله واله نښته شوې ده چې په نتیجه کې د «ایم کیو ایم پاکستان» ملاتړی ۴۰ کلن فراز احمد قریشي وژل شوی او د پیپلز ګوند ملاتړی ۲۲ کلن محمد طلحه ټپي شوی دی. په یاده نښته کې دوه موټرونه هم سوځول شوي دي.
پاکستان کې د ټاکنیز کمپاین پر مهال د تحریک انصاف ګوند ملاتړيانځور: Arif Ali/AFP/Getty Images د پېښې په اړه د «ایم کیو ایم پاکستان» د مشرتابه غبرګون
د ایم کیو ایم پاکستان مشر مصطفی کمال له دویچه ویله سره په خبرو کې د دغه پېښې پړه د پیپلز ګوند پر مشر او پخواني لومړي وزیر ډاکټر عاصم حسین پر غاړه واچوله.
د دوی په خبره چې ډاکټر عاصم حسین زموږ د ملاتړي فراز احمد قریشي د وژلو مسوول دی.
د «ایم کیو ایم پاکستان» مشرانو په یوې خبرې ناسته کې وویل چې یاد ګوند په سند ایالت کې د دفاع په وروستۍ کرښه کې دی او پیپلز ګوند پاکستان له دننه څخه تباه کوي ځکه د یاد ګوند ترهګرو په ښکاره ډزې کړي چې ویډیوګانې یې موجودي دي.
خو بل خوا خالد مقبول صدیقي ویلي دي چې د ښار د ناامنۍ مسوول دپاکستان متحده قومي موومنټ ګوند نه دی.
پاکستان کې د ټاکنیز کمپاین پر مهالانځور: Aamir Qureshi/AFP د پيپلز ګوند دريځ او غبرګون
د دغي پېښې په غبرګون کې د کراچۍ د پیپلز ګوند مشر سعید غني هم دویچه ویله ته وویل چې په ښار کې د پاکستان متحده قومي موومنټ ګوند وضعیت خراب کړی دی.
دوی وویل، د شوې پېښې په اړه هر څه په ویډیوګانو کې شته چې دا پېښه څنګه او چا وکړه.
سعید غني ویلي چې مصطفی کمال په ښکاره د جګړې غوښتنه کوي. نوموړي تور ولګاوه چې ایم کیو ایم ګوند د پاکستان پیپلز پارټۍ کارکونکو ته ګواښونه کوي او د انتخاباتي کمپاین په ترسره کولو کې ستونزې جوړوي. سعید غني همدا راز د سند ایالت له سترې محکمې څخه د پرونۍ پېښې د تحقیقاتو غوښتنه کړې ده.
ټاکل شوې په پاکستان کې عمومي ټاکنې د را روانې فبرورۍ میاشتې پر اتمه نېټه ترسره شي، چې سر له اوسه ورته د نوماندو ګوندونو له لوري تیارۍ روانې دي.
زموږ له آرشيف څخه:
پاکستان: په قبايلي سيمه کې يوه ښځه ټاکنې گټلی شي؟
د پاکستان په قبايلي سيمو کې بايد ښځې د خپل کور د نارينه وو د خوښې کانديد ته خپله رای ورکړي. په دې دودیزه ټولنه کې د خيبر پښتونخوا ايالتي اسامبلۍ ته کانديده ناهيد افریدۍ کور په کور گرځي څو د خلکو رايې خپلې کړي.
انځور: Saba Rehmanد ناهيد افریدۍ دفتر د خيبر په جمرود سيمه کې دی. په همدې دفتر کې هغه په شا او خوا کليو کې غونډې تنظيموي. نوموړې د دې ترڅنگ چې کور په کور وگرځي او له خلکو د رايې غوښتنه کوي، له قبايلي مشرانو سره هم ملاقاتونه کوي. هغه د شلو نارينه وو کانديدانو سره مسابقه کوي. ټاکنې د جولای پر شلمه نيټه دي.
د ځوانو ښځو له پاره بيلگه
يوې کوچنۍ نجلې د ناهيد افريدۍ پوستر پر خپله سينه لگولی دی. ناهيد افريدۍ له دويچه ويله سره په خبرو کې وويل چې په يوه پلار سالاره ټولنه کې د انتخاباتي کمپاين پر مخ وړل ډېر ستونزمن کار دی خو هغه غواړي چې د ځوانو ښځو له پاره د اعتماد، زړورتيا او رهبرۍ يوه بیلگه رامنځته کړي. د سيمې ښځې خو د هغې په غونډو کې د گډون اجازه نه لري، خو ماشومان ورسره مل وي.
له قبايلي مشرانو سره ليده کاته
څلويښت کلنه ناهيد پر حجرو گرځي او له قبايلي مشرانو سره ليده کاته کوي. حجره چې يوازې د نارينه وو د ناستې او جرگو ځای دی، ناهيد افريدۍ په دې سيمه کې هغه لومړۍ ښځه ده چې په حجرو کې له قبايلي مشرانو سره گوري.
د سیمې د اوسيدونکو ستونزې
د ناهيد افريدۍ گرد چاپيره دوکانداران ولاړ دي. نوموړې په خپله ټاکنیزه وينا کې هغوی ته وايي چې هغه ولې غواړي ايالتي شورا ته وټاکل شي. د ناهيد په آند د بريا له پاره اړينه ده چې هغه کلي په کلي وگرځي او هلته نيغ په نيغه له خلکو سره خبرې وکړي او هغوی قانع کړي چې دې ته خپله رايه ورکړي.
ماشومان د ناهيد افريدۍ د ټاکنیز کمپاين په ترڅ کې پر موټرو د هغې انځورونه نښلوي. ماشومان د هغې انتخاباتي پوسترونه او انځورونه په کوڅو، کورونو او چوکونو کې لگوي. په داسې حال کې چې د سيمې ښځې له هغې سره د انځور اخيستو اجازه نه لري، ماشومان له هغې سره د انځور اخيستو ډېر شوق لري.
ناهيد آفريدۍ وايي چې د انتخاباتي کمپاين څخه یې موخه يوازې مسابقه نه ده، بلکي ايالتي اسامبلۍ ته په رسېدو سره غواړي چې د ښځو د ستونزو نمايندگي وکړي. د سیمې يوه مدني فعال دويچه ويله ته وويل چې د سیمې نارينه نه د ښځو د زده کړو پلوي کوي او نه هم دا خوښوي چې ښځې د خپل حق له پاره غږ پورته کړي.
د قبايلې سيمې له پاره يوه بېلگه؟
د ناهيد افريدۍ ټاکنیز کمپاين د سيمې د داسې ښځو له پاره يو پېغام له ځانه سره لري چې نه هم ښوونځي ته پريښوول کيږي او نه هم په خپله خوښه خپله رايه کارولی شي. دلته يو ځوان له هغې سره سیلفي انځور اخلي. هغه وويل چې د خپل کور ښځو ته به ووايي چې خپله رايه ناهيد ته ورکړي.
