د افغانستان د کورنیو چارو وزارت د سه شنبه په ورځ اعلان وکړ چي د امنیتي دلایلو له امله به ددغه هیواد په پلازمینه کابل کي به پر موټر سایکل چلولو بندیز ولګوي.
په کابل کي د پولیسو یوه ویاند ویلي دي چي «په تیر کال کي زیاتره جنایتونه او ترهګري فعالیتونه د موټرسایکلونو په مرسته تر سره سوي.» له همدې کبله به سر له سبا چهارشنبې څخه تر نامعلوم وخته پوري په پلازمینه کابل کي د هغوی چلول منع اعلان سي.
پولیس باید د موټرسایکلونو بندول د کابل په امنیتي کنترولي ساحو کي عملي کړي او د سرغړوني په صورت کي باید د نوموړو اشخاصو موټرسایکلونه ضبط سي.
د پولیسو ویاند زیاته کړې: «موږ غواړو چی خلک د وزارت له خوا د نوموړي پریکړي ملاتړ او له پولیسو سره د هغې د عملي کولو په برخه کي همکاري وکړي.»
نوموړې پریکړه په دغه لوی ښار کي د کرونا د بحران له امله وضعه سوو بندیزونو پر وخت رامنځته کیږي.
په تیرو وختونو کي ددغه څو میلیوني ښار اوسیدونکو، له داسي جرمونو څخه شکایت کاوه چي د موټرسایکلونو په مرسته ترسره سوي، لکه د موبایلونو غلاکول چي عاملین به یې نه پیژندل کیدل.
په پلازمینه کابل کي موټرسایکلونه د نقلیه وسایلو د بیروبار لویه برخه جوړوي. زیاتره وخت پر دغو موټرسایکلونو باندي د کورنۍ څو غړي هم سپاره وي، دا ځکه چي هغوی د موټر د اخیستلو توان نه لري.
همدارنګه د خدماتي تحویلاتو چلوونکي هم زیاتره وخت له موټرسایکل څخه کار اخلي. داچي په دغه بندیز کي به استثناوي هم موجودي وي او که څنګه، لا معلومه نه ده.
