په کابل کي چاودنو تر ۲۰ زيات کسان وژلي دي
۱۳۹۷ شهریور ۱۵, پنجشنبه
د افغانستان د کورنيو چارو وزارت ويلي دي چي د چهارشنبې په ماښام د کابل په دشت برچي سيمه کي د پهلوانۍ پر يوه کلب باندي په دوو پرلپسې بريدونو کي تر ۲۰ زيات کسان او خبريالان وژل سوي دي.
د کابل د پوليسو وياند حشمت ستانکزي ويلي دي چي لومړی په کلب کي دننه ځانمرگی بريد سوی او وروسته چي پوليس او خبريالان سيمي ته رسېدلي دي يو موټر بم چاودلی دئ.
ويل سوي دي چي په دوهمه چاودنه کي د تلوع تلويزيون دوه خبريالان هم وژل سوي دي. د افغانستان د خبريالانو د ملاتړ ټولني ويلي دي چي ۴ نور خبريالان ټپيان سوي دي.
د ميوند په نوم پهلوانۍ د کلب مشر پهلوان شير بيا ويلي دي چي په دغو چاودنو کي تر ۳۰ زيان کسان وژل سوي دي چي ډيری يې پهلوانان ول.
هغه ويلي دي چي د چاودني پر مهال دی خپله په کلب کي نه وو. عيني شاهدانو ويلي دي چي ځانمرگي بريدگر لومړی د کلب امنيت ساتونکي وژلي او بيا يې په ځان پوري تړلي چاودېدونکي توکي چولي دي.
د بريدونو مسئوليت ترهگري ډلي داعش منلی دئ. وسله والو طالبانو بيا په دغه بريد کي لاس لرل تر چاودنو لږ وروسته ژر رد کړل.