د فرانسې په کالې سیمه کې د «ځنگل کمپ» خېمې او په خپل لاس جوړي شوې کوډلي ویجاړیږي. تر اوسه دغه لړۍ په سوله ییزه توگه پر مخ روانه ده. ښایي د دغه کمپ ځینې مهاجر آلمان ته راوستل شي.
انځور: Reuters/N. Hall
اعلان
په کالې کې د مهاجروکمپ د خالي کولو په دوهمه ورځ، پولیسو د هغه کارکوونکو چې خیمې او کوډلې یې ورانولې ساتنه کول، څو په دغه ځای کې له ځینو پاتو مهاجرو سره یې آخ او ډب رامنځ ته نه شي. دغو کارکوونکو چې نارنجي کالي یې اغوستي ول له یو ډول کوچني بلدوزرو او ماشیني آرو څخه کار واخیست.
دغو کارکوونکو خالي خېمې او خوني ویجاړي کړي او له مهاجرو څخه پاته شوي شیان لکه توشکي، کمپلې او دیگونه یې د کثافاتو کانتیرونه ته ورغورځول. ځینې خونې یا کوډلي سوځول شوې دي، خو دا خبره نا معلومه ده چې آیا دغه کوټې د مهاجرو له لوري سوځول شوي دي که نه.
انځور: Reuters/P. Rossignol
د فرانسې د کورنیو چارو وزارت د معلوماتو له مخې د سه شنبې په ورځ ۱۲۶۴ مهاجر له «ځنگل کمپ» څخه وتلي دي. زیاته شوې ده چې دغه کسان د فرانسې په بیلابیلو برخو کې د نوم لیکنې لومړنیو مرکزونو ته د سرویسونو په واسطه استول شوي دي. په دې ترتیب د دوشنبې له ورځې راهیسې له دغه کمپ څخه ۳۲۰۰ مهاجر انتقال کړل شوي دي.
زیاتره مهاجر د افغانستان، ایتوپیا، ایریتریا او سوډان دي. د دوی ډېری بریتانيا ته د سفر کولو په موخه په دغه غير قانوني کمپ کي ځای پر ځای شوي ول.
شا او خوا ۷۷۰ تنه چې نوي ځوانان دي له «ځنگل کمپ» څخه د هستوگني کانتینرونو ته انتقال شوي دي، چې دغه کمپ ته څیرمه موقعیت لري. د فرانسې د کورنیو چارو وزیر برنر کازنو ویلي دي چې بریتانيا دې ته چمتووالی ښوولی دی چې له کالې کمپ څخه ټول هغه ماشومان چي سنونه ئې لږ وي يا سرپرست و نه لري او يا په بريتانيا کي خپلوان ولري، ومني.
بې سرحده ډاکټرانو انتقاد کړی دی چې یوازي د څیرې په کتو سره دا ارزول کیږي چې د چا سن کم دی (یعنې عمر یې د ۱۸ کلنۍ تر قانوني سن ټیټ دی) څو په دې سره د پناه غوښتنې د یوې ځانگړې پروسې څخه برخمن شي.
په پام کې ده چې د چهارشنبې په ورځ به په دغه کمپ کې پاته نور مهاجر د سرویسونو په واسطه نورو مرکزونو ته انتقال شي. له هغوی څخه یې ځینو د مقاومت اعلان کړی دی.
انځور: Picture-Alliance/dpa/T. Vandermersch
اتلس کلن سوډانی علي اوتمه وایي: «هغوی کولای شي ما ونیسي، محبس ته مې واچوي او یا مې پر سړک وغورځوي. خو زه بیا هم بریتانيا ته تگ غواړم.» دا چې په اصطلاح له دغه ډول خلکو سره چې هرو مرو پاتېدل غواړي، څه ډول چلن به وشي، په دې هکله په ښکاره ډول څه نه دي ویل شوي. خو په غیر رسمي توگه اوریدل کیږي چې په پای کې ښایي پولیس پر دنده وگومارل شي.
خو تر اوسه پورې د کمپ د خالي کولو چارې په سوله ایزه توگه پر مخ روانې دي. د انتقال د مرکز د دروازې مخې ته له پولیسو سره کشمکش رامنځ ته شوی وو، خو کوم څوک پکښې ټپي شوی نه وو. د ماښام له خوا هم په کمپ کې کوم آخ او ډب نه وو رامنځ ته شوی. تر دې دمخه ورځو کې د کمپ او په شا او خوا کې آخ او ډب رامنځ ته شوی وو چې پولیسو له اوښکن گاز کارولی وو.
د آلمان د کډوالو او مهاجرو چارو فدرالې ادارې ویلي دي چې د کالې کمپ خالي کیدل ښایي د دې سبب شي چې ځیني پناه غوښتونکي بیرته آلمان ته راوگرځي. دغې ادارې د فرانسې خبري آژانس د یوې پوښتنې په ځواب کې ویلي دي چې په دې تړاو له فرانسوي چارواکو سره له نزدې په اړیکه کې دي.
تر دې دمخه د «راینشه پوست» په نامه آلمانۍ ورځپاڼې رپوټ ورکړی وو چې آلماني چارواکي د فرانسې له لوري د په سونو مهاجرو بیرته دغه هیواد ته وراستولو اټکل کوي، چې ترمخه په آلمان کې ثبت شوي دي. خو لا تر اوسه فرانسې په دې هکله کومه رسمي غوښتنه نه ده کړې.
نور مطالب:
د کاله په کمپ کي د مهاجرو حالت
د کاله په نامه مهاجرو کمپ کي عصبانیت وار په وار زیاتیږی. د فرانسې حکومت غواړي د نوموړي کمپ او یورو تونل ترمنځ چي بريتانيا ته ځي، یوه حایله سیمه جوړه کړي، خو کډوال د دغه کار په مقابل کي خپل مقاومت ښيي.
انځور: DW/D. Cupolo
تر جبري انتقالولو مخکي
داوطلبه کسان له مهاجرو سره د سرپناهوو په انتقال کي مرسته کوي. مخکي تر دې چارواکو له مهاجرو غوښتي ول چي د حایلي سیمي د رامنځته کولو له پاره ځای خالي کړي. دغه سیمه به د يورو تونل له خوا هغه لار بنده کړي چی ډېر مهاجر غواړي له هغه ځايه ځانونه بريتانيا ته ورسوي. یو داوطلب کس وايي چي موږ د کډوالو ملاتړ کوو، څو حیثیت یې وساتل سي.
انځور: DW/D. Cupolo
د اوبو لار او نور امکانات
د يورو تونل ته نژدې ولاړي خیمې. له دغه ځايه په وارو وار مهاجر هڅه کوي نقلیه وسایلو ته ځانونه واچوي او بریتانيا ته ورسیږي. پولیس په هر صورت هڅه کوي چي د هغو مخه ونیسی. یو ځوان سوریايي وايي چي اول پلان مي دا دی چی د یوې لارۍ په واسطه ځان بريتانيا ته ورسوم. دوهم پلان د ریل له لاري او دریم پلان مي د بیړۍ په واسطه د اوبو له لاري دی.
انځور: DW/D. Cupolo
په عاجل ډول د ځان ژغورنه
د تیري پنجشنبې په ورځ د حایل زون جوړولو کار پیل سو. دا چي څه وخت به د مهاجرو پاته سرپناوي په بشپړه ډول انتقالیږي، تر اوس لا معلومه نه ده. خو مهاجر باید په هر صورت له دې ځايه ولاړ سي. هغوی د داوطلبه کسانو په مرستو تر سلو زیاتي سرپناوي انتقال کړي دي. نورې ۴۰ غیر رسمي سرپناوي هم وراضافه سوي دي.
انځور: DW/D. Cupolo
د نورو خیمو له پاره نوی ځای
له کاله کمپ څخه د ملاتړي سازمان غړي هڅه کوي چی د خیمو د درولو له پاره نوې ساحه د وچو وښو او کثافاتو څخه پاکه کړي. د روټ بوگیوت په نامه یوه داوطلبه وايي، کله چي ما په افغانستان کی ژوند کاوه نو د هغو ډیره مېلمه پالنه می ولیدله، اوس غواړم چي د هغې یو څه عوض ورکړم.
انځور: DW/D. Cupolo
د نامعلومي ورځي په تمه
د ۱۵۰۰ او ۴۵۰۰ تنو ترمنځ مهاجر د انتقال له خطر سره مخامخ دي. ځیني بیا يوازي انتظار باسي. د سیف الله برات په نامه یو افغان وايي چي زه به خپله سرپناه بل ځای ته انتقال نه کړم. هغه چي له څلورو میاشتو راهیسي د کاله په کمپ کي اوسیږي، زیاتوي، که پولیس ما دې کار ته مجبور کړي زه به یې مخنیوی ونه کړم.
انځور: DW/D. Cupolo
د گوتو لگول؟ نه مننه!
چارواکي غواړي کاله ته نژدې یو بل کمپ هم جوړ کړي. د کانتینرونو په دغه کلي کي به ۲۰۰۰ کسان ځای پر ځای سي. ډیر مهاجر نه غواړي چي هلته ورسي، ځکه مخکي تر هغه باید د خپلو گوتو نخښي ورکړي. د دوی په نظر، هغوی ښايي په دې ډول په فرانسه کي پاته کیدو ته مجبوره سي او د خپلي خوښي هیواد بریتانیا ته ولاړ نه سي.