د کاناډا په کېبک ایالت کې د ماښام د لمانځه پر مهال درې تنو وسله والو پر مسجد یرغل کړی او شپږ تنه یې وژلي دي. د کاناډا حکومت د یوه ترهرگر برید خبره کړې ده. د پیښې په تړاو څو شکمن کسان نیول شوي دي.
انځور: Reuters/M. Belanger
اعلان
د دغه مسجد د چارو مشر محمد یانگویي، په وینا د ماښام د لمانځمه پر مهال برید کوونکو په کیوبک کې پر اسلامي کلتوري مرکز یرغل کړی او د مسجد د نارینه وو په ساحه کې یې فیرونه کړي دي. د کیوبک پولیسو خبر ورکړی دی چې په دغو ډزو کې شپږ تنه وژل شوي دي او اته کسان نور ټپیان شوي دي. د عیني شاهدانو د رپوټ له مخې د پیښې پر مهال په مسجد کي تر سلو کسان پوري موجود ول.
د کاناډا لومړي وزیر جستن ترودو او د کېبک ایالتي لومړي وزیر فلیپ کوېلراد د یوه ترهگر برید خبره کړې ده. جستن ترودو، په یوه بیانیه کې پر مسجد باندې دغه ترهگر برید غندلی دی. هغه یادونه کړې ده چې «تنوع زموږ یوه پیاوړتیا ده او مذهبي زغم هغه ارزښت دی چې موږ ورته د کاناډایانو په توگه ډیر ارزښت ورکوو.»
د رسنیو د رپوټونو له مخې د برید په تړاو دوه مشکوک کسان نیول شوي دي. زیاته شوې ده چې امنیتي ځواکونو یو کس تر تعقیبیدو وروسته نیولی دی. د ``Le Soleil`` په نوم ورځپاڼې د رپوټ له مخې له یوه نیول شوي کس سره کلاشنکوف وو.
انځور: Reuters/M. Belanger
د پولیسو ویاند دیوید پویترس، تیر ماښام ناوخته وویل چې «وضعیت تر کنترول لاندې دی. چار چاپیره سیمه خوندي ده او موږ ټولې ودانۍ خالي کړي دي.»
یوه عیني شاهد «ریډیو کاناډا» ته ویلي دي چې دوو نقاب لرونکو کسانو پر ودانۍ باندي هجوم وروړی او پر عبادت کوونکو باندې یې په داسې حال کې فیرونه وکړل چې د «الله اکبر» نعرې یې وهلې.
په کېبک کې په اسلامي کتلوري مرکزي کې تیر کال هم یوه بله پیښه رامنځ ته شوې وه. د ``Le Devoir`` په نوم ورځپاڼې د رپوټ له مخې تیر کال په روژه کې د روژه مات پر مهال نامعلومو کسانو د مسجد مخې ته د یوه خنځیر سر ایښی وو.
په مسکو کي تيره ورځ يو ستر مسجد پرانيستل سو. دغه مسجد چي پر ۲۰۰۰۰ ميتره مربع مځکي جوړ سوی په یوه وخت کي ۱۰۰۰۰ انسانان پکښې ځايږي. په دې انځوريز راپور کي د نړۍ نور ستر مسجدونه هم ښوول کيږي.
انځور: Reuters/M. Zmeyev
په مکه کي الحرام مسجد
دا په مکه شريفه کي د مسلمانانو تر ټولو مهم مسجد دئ. دغه مسجد پر ۳۵۰۰۰۰ متره مربع مځکه جوړ سوی او په نړۍ کي تر ټولو ستر مسجد دئ. مسجد په ۱۶مه مېلادي پېړۍ کي جو سوی او نهه مناره لري. پر مسجد اوس هم کار روان دئ او په بشپړېدو سره به ئې په يوه وخت کي تر يو ميليون ډېر انسانان لمونځ پکښې وکړای سي.
انځور: picture-alliance/dAP Photo/K. Mohammed
په مدينه کي نبوي مسجد
تر الحرام مسجد وروسته په مدينه کي نبوي مسجد د مسلمانانو له پاره دوهم مقدس مسجد دئ، ځکه چي هلته د حضرت محمد (ص) زيارت دئ. مسجد په ۶۲۲م مېلادي کال کي جوړ سوی او په يوه وخت کي ۶۰۰۰۰۰ انسانان پکښې ځايږي. د دغه مسجد منارونه ۱۵۰ متره لوړوالی لري.
انځور: picture-alliance/epa
په بيت المقدس کي الاقصي مسجد
الاقصي مسجد د بيت المقدس د زاړه ښار په هغه سیمي کي جوړ سوی چي د مسلمانانو او يهوديانو له پاره سپېڅلی دئ، جوړ سوی دي. که څه هم چي دغه مسجد په يوه وخت کي ۵۰۰۰ انسانان ځايوي او دومره ستر نه دئ، خو په ډبريني او طلايي گنبدي سره تر الحرام او نبوي مسجد وروسته د مسلمانانو له پاره ډېر قدرمن دئ. دغه مسجد په ۷۱۷م کال کي پرانيستل سوی.
انځور: picture alliance/CPA Media
په کازابلانکا کي د دوهم حسن مسجد
د انتلانتیک سمندر د ساحل پر غاړه دغه مسجد د مراکش د پخواني پاچا دوهم حسن په نوم دئ. دغه مسجد په ۱۹۹۳م کال کي د هغه د ۶۰ کلنۍ پرمهال پرانيستل سو. په نړۍ کي تر دې ډېر ستر مسجدونه سته، خو هغه څه چي دغه مسجد ته لومړيتوب ورکوي هغه د مسجد هسک منار دئ، چي ۲۱۰ ميره جگ دئ. په نړۍ کي بل دغه شان هسک منار نسته.
انځور: picture alliance/Arco Images
په ابوظبی کي د شېخ زايد مسجد
دغه مسجد په ۲۰۰۷ کال کي پرانيستل سو او په نړۍ کي اتم ستر مسجد دئ. د مسجد غولی ۲۲۴ واري ۱۷۵ متره دئ او منارونه ئې ۱۰۷ متره لوړ دي. د مسجد ځانگړتيا په گنبده کي ده چي ۳۲ متره قطر لري چي دا به نړۍ کي تر ټولو ستره گنبده ده. په دغه مسجد کي په لاس اودل سوې ۵۰۰۰ متره مربع غالۍ هم اواره ده چي دا په نړۍ کي تر ټولو ستره بلل کیږي.
انځور: imago/T. Müller
په روم کي مسجد
د نړۍ د کاتوليکانو په مرکز روم کي هم ستر مسجد سته. دغه مسجد پر ۳۰۰۰۰ متره مربع مځکه جوړ سوی او په اروپا کي ترټولو ستر مسجد بلل کيږي. د دغه مسجد جوړولو کار تر لس کاله ډېر دوام وکړ او په ۱۹۹۵م کال کي پرانيستل سو.
انځور: picture-alliance/akg-images
په گروزني کي د احمد قديروف مسجد
دغه مسجد د چيچنيا د پخواني مفتي او جمهور رئيس چي په ۲۰۰۴م کال کي په يوه چاودنه کي ووژل سو، په نوم دئ. د مسجد د جوړېدو کار په دغه هيواد کي د جنگونو له کبله څو واري وځنډېد. مسجد په ۲۰۰۸م کال کي پرانيستل سو. دغه مسجد د زلزلې مقاومت هم لري.